Psalms 124: 7 - 8

PSALMS 124 : 7 - 8

7. Nunga malua tondinta i songon pidong, na malua sian sambil ni parsambil, nunga matos sambil i, jadi malua hita.

8. Ianggo pangurupion di hita di bagasan goar ni Jahowa, sitompa langit dohot tano on do

  Hea do ra hita manghilala sai songon na dipasombu Tuhan i hita manaon sitaonon na dokdok, isara ni kondisi na sangat kritis masa di bagasan ngolunta na so boi be hita mengalului jalan keluar sian kondisi i. Masa ma parsahiton, nunga sai martangiang laho mangido hamalumon hape tongtong dope dibagasan parsahiton, gariada olo lam posi parsahiton i.  Olo gabe tubu dibagasan rohanta ai halak Kristen do nian hita, hape laos so diurupi Tuhan i hita tahilala. Gabe olo do tubu sungkun-sungkun  dohot ungut-ungut di bagasan rohanta “aha do buktina na didongani Tuhan au ? “aha do buktina na diurupi Tuhan i ahu dohot keluargaku”? Ujungna madabu ma jolma i tu angka hagogoon na adong di portibi on, mangalului pangurupion sian dalan na so tingkos, dohot manghaporseai debata-debata na asing.

Mansai jotjot tahilala songon na hinilala si Daud di turpuk on. Di tingki susa ngolunta sai hira ndang adong be pangalualuan. Tarsosak pingkiranta gabe madabu tu pandelean. Dihilala rohanta Debata sandiri pe ndang olo paluahon hita. Hal na wajar do i molo sai tubu sungkun-sungkun dohot ungut-ungut di ngolu on molo masa angka songon na di ginjang i. Boasa ? Siala, tubu do dibagasan rohanta molo nunga porsea tu Tuhan i ndang adong be parungkilon, ndang adong be parsahiton songon na masa di donganta huria Kharismatik marhite teologi Sukses mamang teologi Kemakmuran. Didok nasida marhite Teologi Sukses, molo nunga gabe halak Kristen pasti ingkon sukses di sude gulmit ni ngolu on. Hape tangkas do dipasahat Jesus, “angka na giot mangihuthon ahu dipasoada dirina jala dihuti ma silang na tu ibana”. Lapatan dihuti silang na tu ibana marlapatan do i angka parsorion, parungkilon sahat tu na hamatean.

Na pasti ndang adong halak na so malua sian parungkilon sian portibi on. Gariada godang na mandok, lam solhot ngolunta tu Tuhan i lam godang parungkilon siadopan, tarlumobi parungkilon siala haporseaonta tu Tuhan i. Songon ido na masa dibagasan turpuk on di tingki na masa di ngolu si Daud. Tarbarita do si Daud ima sahalak na porsea jala sai marsigantung tu Tuhan i, hape godang do sitaonon dohot parungkilon siadopan na di ngolu na. Parungkilon na ro sian bangso na asing, jala ro do muse sian lingkunganna sandiri ima sian si Saul dohot Ianakhonna. Molo istilah nuaeng on “Maju kena, mundur pun kena” lapatanna sian sude penjuru ro na manosak ngoluna. Alai dibagasan parungkilon na manosak ido dihaporseai ibana na adong do Debata na mandongani dohot mangurupi ibana. Ido alana dibagasan bindu on adong 2 hali sai didok si Daud ima “AU UNANG JAHOWA MANDONGANI HITA”, tontu nunga dibondut angka musuhta hita, ninna (ay.124:1-3). Songoni do na didok Daud di turpukta on “Nunga malua tondinta I songon pidong, na malua sian sambil ni parsambil nunga matos sambil i, jadi malua hita” (ay.7). Digombarhon do ngolunta songon pidong na so margogo mangadopi parsambil (jerat/perangkap), alai dipalua Debata do hita sian parsambil i.

Sada do na ingkon ingotonta jala ingkon haporseanta, dihagaleonta dohot dihasusahanta disi do Debata mangalehon gogo di hita. Songon ido na dihatidanghon si Paulus “Dibahen i, sonang do huhilala di bagasan angka hagaleon, pangaleaion, hasosahan, pangaleleon dohot hagogotan ala ni Kristus; ai jumpa gale ahu, disi do ahu margogo” (II Kor. 12:10). Cara ni Debata mangurupi hita olo do marasing tu cara ni jolma. Molo di hita jotjot do molo mamereng pangurupion ingkon do tangkas tarida jala dibuktihon, alai anggo di Tuhan i sipata olo do hira dipasombu alai tongtong do dipaihutihut angka na masa di ngolu on. Molo hira na sanggup dope hita mangadopi parungkilonta dipaloas do holan hita paujunghon persoalan di ngolunta, alai molo diida Debata ndang sanggup be hita, disi ma Debata mambuat persoalan di ngolunta i. Di angka na asing, malah olo do Tuhan i paloas parungkilon manang boban i gabe lam tambah borat situtu songon na masa di ngolu si Job. Alai adong do tujuan manang maksud ni Debata disi ima asa lam tangkas botoonta olo Debata pargogo na so hatudosan di ngolu on.

  Sude na pinatupa ni Debata dingolu on asa sandok portibi on mananda Debata ima Tuhan na marmulia. Dihilala si Firaun do di hatihai ibana na paling hebat ido umbahen dipatangkang Debata rohana, gabe ditahi rohana naeng mamunu bangso Israel di halongonan. Alai disi ma Debata patuduhon hagogoonNa na so ni antusan ni bangso i. Dipangke nasida do pingkiranna sandiri gabe madabu tu biar, nunga targogot nasida dihilala, dilele sian pudi hape ndang adong be dalan haruar. Asa bangso i pe ditanda Debata, jala di haposi hagogoonNa. Ido umbahen didok si Musa tu nasida “unang mabiar hamu, marsihohot ma, ai naeng patuduon ni Jahowa do hamuliaonNa”. Marhite hagogoon ni Jahowa bola dua do laut, mardalan ma bangso i dina mahiang, alai anggo parangan ni si Firaun dilingkuphon laut i do. Debata sandiri do na patupahon gabe halongangan dibangsoNa (Psalm 118:23).

Molo mamereng ragam angka na masa di pardalanan ngolu on, yakin do ahu ndang mampu hita mangadopi saluhutna i. Ido umbahen lam godang jolma naung stress sahat tu na bunuh diri (maningkot) siala persoalan ekonomi, persoalan keluarga dohot angka na asing dope. Hape jolma manang portibi on pe terbatas do mangurupi ngolunta on. Alani i do songon na didok si Daud dibagasan turpuk on Holan Tuhan ido pangurupion di hita. Jala adong do hata ni Tuhan i na mandok : Jahowa do marporang humongkop hamu, asal ma hohom hamu. Hata na mansai pendek alai sangat berpengaruh di ngolu on. Lapatan ni hata on “Supaya mereka menyerahkan diri sepenuhnya ke tangan Allah dan hanya mengandalkan Allah” (bdn Psalm 23). Ndang adong na so tarpatupa Debata, saluhutna do di toru ni huaso ni Debata. Ibana do Debata na so hea lupa di padanNa. Manang aha pen a borat di adopi bangsoNa, manongtong do Debata mangurupi (Rom 8:31).

Panimpuli :

1.  Ndang adong hita na malua sian angka parsorion ngolu on na marragam angka parungkilon, angka boban, baik sian tonga-tonga ni keluarga, dohot parsoalan ekonomi dohot angka na asing.

2.  Alai ganup halak pasti marasing be cara mangadopi parungkilon, mangadopi boban di ngoluna. Adong do na mangalului dalan hagogoon ni portibi on sahat tu na mamake hagogoon haholomon, alai laos adong do halak na pasahaton parsorion ni ngoluna tu Debata. Ido na membedahon angka na porsea dohot na so porsea di Tuhan i. Amen