Rabu, 25 April 2012

Psalmen 23 : 1 - 6


                                                                                                                  
JAHOWA  PARMAHAN  NA  BURJU

Psalmen on ima sada sian psalmen na mansai populer jala jotjot do dijamitahon angka parjamita nang halak awam, siala murah do niantusan isi ni turpuk on. Psalmen on disurathon Raja David songon tanda Panghatindangion HaporseaonNa na mandok mauliate tu Debata siala pangaramotion na tangkas dipatuduhon Debata di pardalanan ngoluna sandiri. Dirajumi si David do godang angka parungkilon dohot angka na masa na niadopanna alai nda hea marpasombu Debata di ngoluna.
Adong do 4 ondolan na pinatuduhon si David dibagasan turpuk on :
1.              Jahowa do siparmahan ahu (ay.1)
Songon na metmet do berengon status ni sahalak parmahan on di ngolunta on. Tarlumobi molo diida sian ulaonna pe ndang pola borat, ai boi do sambil modom-modom. Ido umbahen di partingkian si nuaeng on ndang godang be olo gabe sahalak parmahan. Alai diturpukta di mingguon didok do Debata songon sahalak parmahan. Jala umbagas muse didok songon di epistel i ima Jesus sandiri sahalak parmahan na denggan (bnd.Johannes 10). Sasintongna ndada na neang ulaon sahalak parmahan alai tung balga do tanggungjawab sahalak parmahan, tarlumobi molo sahalak parmahani ima parmahan na denggan, ndang parmahan na losok dohot na jahat. Ndada holan na mamboan angka biru-biru i tu sada inganan laho minum dohot mangan, alai ingkon dohot do manjaga sian angka babiat panoro dohot angka binatang na asing. Jala molo mago sada biru-biru i ingkon luluanna do sahat tu na jumpang, mate manang mangolu. Tung sonang hian do birubiru i molo disi parmahan i.  Songoni do digombarhon si David taringot tu Debata na dihaporseai jala dihangoluhon ibana siganup ari. Debata ido songon parmahan jala dirina songon birubiru. Debata do na mamboan tu angka jampalan na lomak, jala dipadao do sian angka parmaraan dohot angka musuh. Gariada sai dipatongon do tu jampalan na lomak jala ditogutogu tu aek hasonangan.(ay.2). ima pasupasuNa na so boi dipatudus tu manang aha pe na adong di portibi on. Ndada hea Debata mangalehon angka na satonga-satonga manang tanggung-tanggung. Alai dipatuduhon Debata do tu angka birubiru na gok hasonangan dohot las ni roha i.
Molo didok si David : Jahowa siparmahan ahu” ima sada hubungan na mansai jonok. Jala hubungan i ndada alani saling menguntungkan (simbiosi mutualisme) lapatanna kedua belah pihak ingkon mar-untung; ai ndada songoni Debata. Ndada pola adong diaraphon Debata sian jolma i manang aha alai Debata tongtong do sai mangalehon angka na denggan di ngolunta.
2.              Ngolu na sai mardalan di bagasan hatigoran (ay.3)
Songon hea didok angka na malo : saotootona halode ndada hea tarrobung di lubang na sarupa, alai anggo jolma sai madabu do tu lubang na sarupa”. Lapatanna disi, bangko ni jolma do sai torus madabu tu bagasan dosa. nang pe sai madabu si David tu bagasan dosa, anggo Debata ndada pintor patuduhonNa rimas manang murukna. Alai sai ditogihon do tu dalan na tingkos i. Manang piga hali sai madabu do si David tu dosa, jala puncakna ima ditingki dibuat ibana jolma si Uria na margoar Betsyeba sian sahalak naposona gabe jolmana, ujungna ro do panurirang Nathan patingkoshon dalanna.
Tangkas do dihantusi si David, molo ndang Debata na sai paingothon pardalanan ngoluna nunga pasti lam so diboto be mardalan manang tudia. Ndada holan marnida hagaleonna songon jolma na biasa, alai naumborat muse ima mangadopi angka musuhna na sai ro naeng mandabuhon huaso dohot keluargana.
Songon singot-singot na mansai tangkas do on di ngolunta sandiri ima na sai mangasahon gogo dohot pingkiran na gale i. Jala naumborat ima na sai mangido pangurupion ni jolma dohot angka sian dalan na so dihalomohon ni Debata. Di jaman na so tontu on nunga godang jolma sai lomo rohana diboan arus ni ngolu. Gariada sai jotjot do binege “niihuthon ma angka na masa on, manang tudia sangkot laos tusi ma”.  Ido umbahen lam godang jolma na sai holan bergantung tu takdir manang nasib, hape hita do na manontuhon takdir manang nasibta sandiri jala saguru tu lomo ni roha ni Debata.
3.              Pos ni roha di Debata.
Songon didok si David “ai nang pe mardalan ahu di rura linggoman ni hamatean, ndang huhabiari parmaraan, ai Ho do mandongani ahu..”(ay.4). diboto si David do tangkas ia ngolu sidalanonna di portibion ima ngolu na gok parmaraan dohot hamatean. Digombarhon do parmaraan dohot hamatean i holan piga senti di baba pintu jabunta. Molo nunga didok di jolo ni baba pintu jabunta do angka parmaraan dohot hamatean i ? songon dia do hita laho mangadopisa. On do na membedaon hita sian si David. Boasa? Molo hita jolma, sai berusaha do mandao sian parmaraan dohot hamatean i, manang berusaha mangalului dalan songon dia asa malua sian ni sudena. Hape molo ro i, ndang tarbahenta malua sian i manang aha pe gogonta.. Anggo si david diboto do tangkas angka parmaraan na sai ro marganti soring alai ndang lari manang mangelak ibana sian i. Kuncina ima pos ni roha tu Debata, so hea Debata maninggalhon ngoluna jala tuk do tangan ni Debata na sai mangurupi ibana. Didok do tungkot dohot batahi ni Jahowa sai marsitoltol  (teracung) patuduhon hadirionna. Taboto do, molo nunga disi tungkot sahalak parmahan molo pe ndang disi parmahan i nunga pos roha angka birubiru i. Ai tungkot manang batahi ido symbol kehadiran parmahan i.
4.              Hasatiaon na mangihuthon Debata mangihut ma tong denggan basa dohot asi ni roha ni Debata.
Di parujung pandohan si David dirimpun ibana do marhite pandohan taringot hasatiaon mangolu di bagasan lomo ni roha ni Debata dohot sai tong masuhan bagas ni Debata rodi salelenglelengna.Toho do nian Debata ndada sai manggigil angka sibahenonta tu adopanNa marhite angka pelean dohot angka sibahenonta di ngolu on, alai na dipangido Debata sian hita ima ngolu na sai tongtong satia mangihuthon Ibana. Marhite hasatiaonta ido laos mangihut angka denggan basa dohot asi ni rohaNa. Ai ndada mungkin sai mangihut angka denggan molo sai mandao hita sian Ibana. Sarupa do molo mangula hita (karejo) di sada perusahaan molo satia hita manghaholongi inganan hita mangula tontu lehonon perusahaan ido angka na ringkot di ngolunta, jala diujung ni ulaonta ima di tingki pensiun dibahen do songon penghargaan na satimbo-timbona. Songoni do Tuhan i molo sai satia hita mangihuthon Ibana manang aha pe na masa di pardalanan ni ngolunta digohi Debata do angka na ringkot di ngolunta, jala diujung ni ngolunta dipasahat Tuhan ido Tumpal tu hita (patudos Pangkungapon 2 :10b).

Sungkun-sungkun na mansai nalnal nuaeng on di ngolunta ima : Ise do Tuhan i hombar tu pardalanan ngolunta be? Godang do jolma mambahen pandapotna be taringot tu Tuhan i, isarani rupani : Tuhan tukang stempel, na holan patulushon angka na tapangido molo ndang songon hombar tapangido pintor manimbil hita. Adong na asing mandok : “Tuhan reperasi”, ima mereparasi na sega asa denggan dungkon i molo sega dipadenggan muse. Adong muse mandok : Tuhan tukang service, ima molo nunga adong na mancet ro ma tu Tuhan i asa di service. Ndada songoni Tuhan na tatanda i, tingkos do ibana “me-stempel” “me-reperasi” dohot “me-service” alai sude i holan na manjalo do ndang adong manang aha pe natabahen. Tuhan na tatanda ingkon do songon si David na mandok Jahowa siparmahan ahu, na mangula jala ingkon do adong responta na denggan mangihuthon parmahan i manang tudia pe diboan. Amen

Sabtu, 14 April 2012

1 Johannes 1 : 1 - 7




JESUS KRISTUS DO TUHANI NAPATUPA HALUAON DI HITA
PATUJOLO
Turpuk on ima alus tu angka ruas ni huria na dibagasan keraguan taringot tu hadirion ni Jesus naung mate jala mangolu muse. Dungkon  peristiwa haheheon ni Jesus lam tambah do tahe angka jolma na porsea, alai laos marbungaran do tong angka parpoda na lipe  na sai mambahen isu-isu na so sintong taringot tu Debata marhite AnakNa i Jesus Kristus. Adong ma i digoari kaum Gnostik patubuhon pangajarion na  gabeak, na maralo tu ajaran ha-kristenon i. Didok nasida do : ndang toho Debata di bagasan Jesus; ndang toho Kristus mate tarlumobi ingkon tarsilang, jala marhite silang i gabe malua angka jolma sian dosana.  Lumobi siani nasida mandok haluaon nunga dipatupa Debata jadi ndang porlu be mate Kristus i; hombar tusi hita pe nunga bebas mangulahon lomo ni rohanta termasuk manomba sisombaon (bd 5:13-21). Marhite on ma si Johannes songon saksi namangolu (sitindangi) ni Jesus manurathon suraton laho mangalo angka pandapot manang poda na so tingkos i, sekaligus pahothon pangantusian ni huria i taringot tu dalan haluaon dibagasan Kristus.
HATORANGAN NI TURPUK
 Songon sitindangi si Johannes dipatolhas do na niidana, nadihilala jala na dihangoluhon ido dipaboa, ndada na patubu-tubu isu na baru manang gossip jala ndang na mangkarangkarang manang barita binaritahon. Didok apostel ido  “Nahupanotnoti hami jala jinama ni tangannami”( ay.1) songon sahalak  dakdanak na bersaksi napaboahon aha do sasintongna manang songon dia peristiwai, ndang diboto manambai manang mangorui manang manambunihon. Songon ido dihatidanghon si Johannes  dipatorang beha do hadirion ni Jesus na sasintongna ima na pinatangkas dison : Ia Jesus Tuhanta i ima Hata ni Debata naung adong sian mula ni mulana, na tutu situtu do Ibana mate di silang i jala hehe sian na mate. 
Nunga patar be hangoluan i marhite haheheon ni Jesus, jala hamamateNa  ima songon pelean pardameanta dohot Debata naung leleng sirang alani dosanta. Ido barita las ni roha tu hita dohot tu sandok portibi on. Nang pe gok angka parungkilon manang sitaonon na mangihuthon Ibana (Jesus) alai ndang marimbar i di dalan hangoluan naung dibahen Debata tu hita. Alani ndada pola ganggu rohanta disi jala unang mambahen sumurut hita sian parsitutuonta mangihuthon Ibana.  Angka na nialaman apostel i ima gabe panindangion tu angka  na porsea laho patiurhon dalan ni ngolunta. Hatiuron ido na manondangi langkanta asa tapasiding haholomon dohot dalan na so ture i. Dipangidohon do tu hita asa marparsaoran dohot sama hita songon Kristus dohot Ama i, asa sude manghilalaon las ni roha na binahen ni Debata di ngolunta on.
Hatiuron ido mambahen ngolunta berubah sian na holom munsat tu na denggan.  Parange hatiuron ido sada ulaon na manghorhon kualitas ni ngolu halak Kristen. Ndada tingkos dope hita dibagasan hatiuron i molo sai mian di angka na holom i. Pandohan di ay 6 on “pargabus do hita” ninna molo nunga saor hita tu Jesus alai huhut sai mangulaon angka na holom. Sarupa do songon didok parpoda na lipe ima paham Dekotisme na mandok : “nunga malua hita, alani nunga bebas hita mangulahon aha pe  dohot namangulahon dosa pe tanpa ada batasan”. Ndada songoni pangajarion ni Kristus, molo nunga manjalo hatiuron na binoan ni Jesus tontu ingkon dibagasan haimbaruon do ngolunta. Ai ndang mungkin mardomu hagolapon dohot hatiuron i. Ingkon tangkas do sada na menonjol sian sada nari. Isarani rupani : Molo hugomdang cat na birong sian na bontar ingkon gabe birong ma cat i, alai molo humgodang do na bontar sian na birong pasti do gabe bontar cat i. Sarupa do songon hea  didok Jesus : “Ndang adong na mandungkaphon abit naimbaru tu abit naung mumut, ai ribakkonon ni na nidungkaphon ido dirina sian pandungkapanna i, jadi lam tu ruakna ma na maribak i” (Matius 9:17).  
Toropan do nuaeng halak Kristen sai maridi di tao haholomon. Ai na jahat pe nunga didok na denggan, alai na denggan didok ma na jahat. Lam malo halak sai manutupi angka dosana, ummalo sian huting na manabunihon kotoranna.  Nuaeng on nunga godangan halak ndang diboto be dia do sasintonganna pegangan ni ngolu (patokan hidup), ujungna bingung sandiri siala gok nama na samar-samar nuaeng.  Angka na dibagasan Kristus ingkon manjalo hamamatena manang peristiwa Via do Lorosa songon dalan laho manjalo haluaon. Mudar ni Kristus na durus ido inumonta asa tarsesa suda dosanta. Luhut do hita marsala, mardosa, alani si adam (dosa warisan) dohot ala ni dosanta, alai marhite-hite panghohopon ni Kristus gabe tarbahen hita malua sian dosa dohot hamatean.
SIPAHUSORHUSORON
1.         Diombason na parpudion mansai ragam do tubu pangajarion namambahen hakristenonta lam sumurut, jala godangan ro sian angka halak Kristen i sandiri namandok dirina mangajarhon hasintongan  alai tung dao do sian hasintongan i sandiri sian diri nasida. Godang do nuaengon di hurianta dapot hita sada pangula alai na sekaligus berperan gabe datu/pangubati namamangke ulpuhan ni hadatuon manjou di sumangat/sahala ni daompu manang sebalikna sahalak namarsahit ala so malum sian dokter. Di ulaon do ulaon si songoni songon na sintong berengon , martangiang jala manjou goar ni Tuhan i  huhut dipangke do Bibel dungi dibuatma ubat laos ditabas-tabasima (mangido gogo tu sombaon. Adong muse mandok ndang siallangon na margota ninna alai molo mar sahit olo do transfusi darah. Manang molo mudar nunga gabe gota jala songon tahu boi do diallang.  Dang boi marulos (manjalo/mangalehon ulos) manang mangulahon adat batak alai sai mamangke hasipelebeguon ni halak Barat. hea do sahalak tarpasupasu di gereja (diluar ni Protestan) dung sidung pamasu-masuoni dipasaampathon ma manik-manik tu pengantini huhut didok, “Selamat berbahagia – Selamat berbahagia”. hape ndang diantusi manik-manik i tradisi Eropa do i namanggombarhon angka tondi ni namate marroan mangalehon haulion dohot las ni roha. Asa marhite jamitaon disosohon tu hita, asa tiurma hamu marhaporseaon, mangolu ma hita di bagasan Kristus i, tapadao ma hageduhon Umpama namandok “Nanget unang tartuktuk, manat unang tarrobung”.
2.         Asa lam tangkas taboto pangajarion na polin hombar tu hasisintong Hata ni Debata naeng do ingkon lam holong rohanta tu Hata ni Tuhan i.  Songon dia ma hita mananda jala manangkasi angka na polin dohot na gabeak molo hita sandiri ndang adong tahantusi. Ujungna sai olo ma hita manjalo barita manang angka isu-isu na di luaran jala taanggap ma i gabe sintong. Nda i na masa nuaeng on di ngolu hakristenon tarlumobi di ruas HKBP.  Mardalan do na marminggu , martangiang i alai laos mardalan do nang hosom, elat, late dohot angka parmusuon. Jala humborat do parbadaaon di tonga-tonga ruas ni huria sian parbadaon angka jolma na so sa haporseaon i.
3.         Dijou do hita asa gabe sitidangi angka na sintong, na tingkos jala na gok holong nang dame. Lapatanna : Boi do na tingkos manang na sintong i denggan alai patubuhon parbadaan na borat, alani ingkon dohot do sitindangi dibagasan holong dohot dame. Toho do di sada sisi denggan hata na mandok :”baliga binaligahon, barita binaritahon”, ai ndada holan “situluk mata ni horbo” hita  na mangolu on, alai ingkon marsiajar do hita pasahaton pesan hasintongan i dibagasan holong asa tarjalo halak.  
4.         Tangkas do hea didok Jesus : Hamu do panondang dohot sira ni portibi on (matius 5 :13-16). Alai songon dia do hita gabe sira molo ndang be hansim sira i, manang songon dia hita gabe panondang molo dihungkuphon ampang palito i. Alani do ingkon patar do i jala dao dumenggan molo jumolo hita olo pature dirinta asa tangkas hita gabe panondang dohot sira i. Amen

1 Korint 15 : 1 - 3


                                                                                                        
MATE DO KRISTUS HUMONGHOP DOSA NI PORTIBION
PATUJOLO
Surat ni Apostel Paulus na tinongosna tu huria Korintus on naeng patotahan parbinotoan dohot pangantusion taringot tu haheheon ni Kristus naung mate i manghophop ngolu ni angka na porsea di Ibana. Sangkap dohot tujuan ni Apostel Paulus on laho patotahon panindangion na tutu taringot naung hehe Kristus sian hamatean jala ido hasintongan naung pinabotohon angka barita nauli na saleleng on. Mangihut tusi, ringkot jala porlu do na botoon nasida marhite surat ni Apostel Paulus on naung sahat tu nasida asa togu haporseaon jala panandaion nasida jala unang gabe ganggu haporseaon nasida alani angka porpoda haliliuon na mangondolhon ndang adong be hangoluan di balik ni hamatean.  Apostel Paulus di tohonan naung dijalona taronjar rohana laho maniroi roha dohot pingkiran angka ruas na adong di Huria Korintus di haporseaon naung adong jolo jongjong ditongatonga huria i, jala haluaon naung ta jalo sian Debata dibagasan Jesus Kristus marhitehite namate jala natarsilang Ibana di hau pinorsilang di Golgata.
HATORANGAN NI TURPUK
Di ayat 1 dipatorang do songon dia hagogoon ni barita nauli i naung di jalo nasida, di bagasan EVANGGELIUM (Barita Haluaon) i adong panghirimon haluaon ima naung dipatota marhitehite panghophopon ni Kristus ima naung ni jalo muna, jala laos ido panghirimon na mangolu di angka na manghaporseai Ibana (Roma 1:17). Masa do parpoda haliluon di Huria Korintus on namambahen ganggu haporseaon nasida taringot tu Hamatean dohot hahehe on ni Kristus alani i ringkot jala porlu do botoon ni angka na porsea dohot ingot di angka naung dihatindangkon nasida dibagasan ngoluna taringot tu haporseaonna. Asa unang gabe lilu jala mago haporseaonna alani poda-poda haliluon na adong. Apostel paulus paingothon huria Korintus jala mangondolhon hasintongan barita nauli taringot hamamate ni Kristus ala dosa ni hajolmaon (Kebenaran yang hakiki). Mate pe Kristus jala hehe pe ibana laho tu hangoluan ni jolma i asa unang marisuang jala magopo haporseaon nasida. Apostel Paulus paingothon nasida di hamamate ni Kristus dohot haheheon asa martinanda nasida jala marbinoto, Kristus mate jala hehe laho manghophop jolma asa malua sian hamatean jala dapotan ngolu jala panean nasida di hangoluan naso ra suda. Apostel Paulus paingothon nasida marhite-hite surat na tu huria Korintus jala mangalehon pangajarion na sintong taringot tu haporseaon nasida tu Kristus. Asa mangantusi boasa pola mate, hehe jala pola ingkon ro Kristus di tonga-tonga ngolu ni angka na manghaporseai Ibana (Filipi 2:7). Sangkap ni Apostel Paulus ringkot do pabotohonna tu nasida songon naung dipabotohon tu ibana marhite-hite barita nauli i. Apostel paulus manghatindangkon taringot pangajarionna di hamatean dohot haheheon ni Kristus pabotohon asa lam hot, mangolu haporseaonna nasida tu Kristus.
Boasa ingkon ondolhonon ni Apostel Paulus Kristus mate ala ni dosa ni jolma (Ayat 3) asa lam diantusi nasida ise do Kristus dohot ise do jolma i sasintongna. Sude naung binahen ni Kristus laho humonghop jolma i, on ma sebagian sian sangkap haluaon naung pinatupa ni Debata tu Jolma (Rencana Penebusan Allah kepada manusia). Ndang mate Kristus songon na tarsurat i molo ndang alani pambahenan manang dosa parniulaon ni jolma jala laos dibagasanna ido di patangkas ia Hamamate ni Kristus i dang na pingsan (Mati Suri) alai namate do ibana songon biru-biru na dipelehon angka Malim tu Debata na ingkon durus mudarna manobus dosa, jala nunga dipatupa Kristus i, Ibana do biru biru ni Debata napinelehon manobus jolma sian dosa sahali rodi saleleng ni lelengna (Heber 7:27). Ai di mulanai denggan do ngolu dilehon jala di patupa Debata tu jolma na parjolo, alai roha-roha ni jolma na parjolo i mambahen sega ngolu na denggan i. Di bahen i do gabe adong hamatean ni jolma ala nunga mardosa jolma i, ai marhitehite hamatean ni Kristus do gabe talu hamatean i. On ma namangungkap simalolong ni partondionta asa lam nalnal pangantusi na polin di hita halak Kristen taringot tu partinaonan ni Kristus i humophop hita jala asa unang ganggu haporseaonta di panobusi on Kristus i jala marhitehite hamamate ni Kristus ondo na gabe jaminan Haluaon di angka naporsea nang songoni hamatean ni Kristus on patoguhon haporseaonta laho mandalani ngolu siapari i, di sude angka gulmit ni parngoluon on mansai godang do hita mangadopi angka parungkilon dohot sitaonon adong mai alani parir ni angka parngoluon, pargellengon, angka keluarga na bermasalah dohot angka hapaeton na asing mambahen hita jotjot naeng mandele mandalani angka parngoluon on. Alai marhitehite hamamate ni Kristus naung manghophop hita jala laos hamamate dohot partinaonNai gabe patoguhon roha nang pingkiranta jala gabe ojahan dihaporseaonta pasabam rohanta, ai sude angka parungkilon na tahilala i dang mangalobiani Partinaonan ni Kristus i. Hamamate ni Kristus do gabe pardamean ni Jolma dohot Debata, jala laos hamamate ni Kristus on mangungkap rohanta asa mardame dohot donganta jolma tarlumobi mardame muse hita dohot Debata secara pribadi padaohon nassa elat, late dohot hosom alani sude angka dosantai nunga dipajal di hau pinarsilang i jala nunga durus mudar ni Jesus paiashon sude ngolunta on. Antong ro ma hita tu toru ni silang ni Kristus i marsomba jala mangaluahon sude dosa dohot sitaonon nang parungkilonta ai narada do Ibana manangihon sude angka namasa dingolunta on ai nunga di pasae sude nasa dosam dohot hamagoanmu di hau pinarsilang i.

SIPAHUSORHUSORON
1.       Dipartingkian nuaeng on mansai godang do angka poda haliluon na mangagohon haporseaonta na mandok : Ndang tutu mate dohot Hehe Jesus, alai dipake do jolma na asing ninna. On ma mambahen gabe tubu keraguan di tonga-tonga hakristenon di jaman sinuaeng on. Hape molo tabereng pengorbanan angka apostel, angka parbarita nauli pola ingkon hagoan hosa, ndang mungkin olo mate nasida molo ndang tubu haporseaon na mangolu taringot Hamamate ni Jesus dohot HaheheonNa. Alani i unang hatop-hatop munggil haporseaonta siala na na laho ro angka parpoda haliluon manegai haporseaonta. alani mulak ma hita tu hata ni Debata ai ido ojahan dipartondionta. Barita nauli i ima barita panghophopon ni Kristus Jesus tu jolma manisia i jala haheheonNa i gabe meterai doi di hangoluan naso ra suda di angka na manghaporseai ibana. Natutu do mate Kristus i humonghop dosanta songon naung dihatindanghon ni barita nauli i dohot Apostel Paulus alani i unang be ganggu haporseaonta.
2.       Hamamate ni Jesus dohot HaheheonNa sadalan do i. Molo holan mate sambing do Jesus i jala ndang adong haheheonNa na talu do Jesus disi; sibolis dohot hamatean ido na monang. Molo songoni ndang adong haluaonta na mangasahon asi ni roha. Alai autsugari holan haheheonNa do adong ndang jolo mate, tong do ndang marguna. Ai molo songon i ndang adong na mangontihon hita mangae bura ni patik, ndang adong hosanna na manobus hita, jala ndang adong na mambahen pardameanta tu Debata.
3.       Di partingkian sinuaeng on boi do songon halak na so porsea hita di hamamate dohot haheheon ni Jesus siala ndang adong perubahan ni ngolunta, manang sai jotjot dope hita dibagasan dosa dohot haholomon i. Ai dos nama goarna molo dibagasan dosa hita ndang terjadi dope peristiwa hamamate dohot haheheon ni Jesus di ngolunta. Jala on do parpoda haliluon na mansai borat ? boasa siala boi do jolma si songon on adong di huria, di tonga-tonga ni ngolunta, nenget-nenget mambahen ndang olo be hita porsea di peristiwa hamamate ni Jesus. Alani makna na dumenggan sasintongna di parningotan hamamate ni Jesus ndada holan di parningotan i alai ingkon sahat do di perubahan ni ngolunta si ganup ari. Amen

Mazmur 84 : 1 - 7

Mazmur 84 : 1 - 7 84:1 Untuk pemimpin biduan. Menurut lagu: Gitit. Mazmur bani Korah.  84-2 Betapa disenangi tempat kediaman-Mu ,  ya ...