PARTORDING ACARA TAON BARUDi
HURIA KRISTEN BATAK PROTESTAN
B R E B E S
 |
TEMA:
“Solukhon hamu ma jolma na imbaru, na tinompa suman tu Debata, di bagasan hatigoran dohot hapolinon na marhasintongan”!
( Efesus 4 : 24)
Minggu, 01 Januari 2012
ACARA PARMINGGUON BONA TAON
01 JANUARI 2012
===============================================================
I. PANGARADEON:
- Parhalado martangiang di Konsistori – borhat tu ruang ibadah
- Prosesi
II. Acara Mandok Hata
1. Sian Parhalado
2. Sian NHKBP
3. Sian Seksi Parompuan
4. Sian seksi Ama
III. KEBAKTIAN
1. Joujou marsomba tu Debata
U Horas ma di hamu saluhutna- Selamat Taon Baru!
H Selamat Taon Baru
U Hamu huria ni Tuhanta, Ombas on tama marlas ni roha hita manghamauliatehon denggan basa ni Tuhanta na mangaloas hita sahat tu Bona ni taon 2012. Tama endehononta GoarNa na marmulia i. Jahowa do Raja, nunga marpahean tongon Jahowa. Nunga dihohoshon hagogoon.
H Jadi hot ma portibion, ndang tagamon humuntal.
U Hot do bangsoM sian na robi, sian saleleng ni lelengna do Ho! Sintong situtu do angka panindangionmu.
H Habadiaon do na tama dibagasMu, ale Jahowa, rodi salelengna.
U Ro be ma hita marlas ni roha marsomba mamuji Partanobatoanta!.
H Itaolophon ma tujolo ni Bohina marhite pujipujian.
U Taolophon ma Ibana marhite ende; Taendehon ma :
S (Mangendehon BE No. 64 : 1 “Naung moru do muse sataon
Naung moru do muse sataon, huhut lam suda bohalhi
Beha do ahu nasailaon, ture do pangalahongki
Lam ganda haporseaonku, nang holong ni rohangku pe
U Taon boi do marganti, angka partingkian pe bo do marsalpuhon songon didok Parjamita “martingki be do luhutna na tinompa” alai sai hot do ASI dohot HOLONG ni roha ni Debata di hita. Alani sai hot ma hita dibagasan Ibana jala na so mubauba. Tarlumobi di Bona ni Taon naimbaru on asa dibagasan panghirimon na mangolu tongtong ngolunta tu Ibana jala dibagasan Haporseaon na polin, asa marpos ni roha hita di pardalanan ngolunta on manang aha pe na ingkon masa.
U Martangiang na hohom ma hita dibagasan rohanta pahibulhon roha dohot pikiranta laho marparsaoran na badia rap dohot Debata di tongatonga ni huriaNa
(martangiang na hohom, manghuling musik BE.No.815 : 1 “Uli do tingki na hohom”
U Tapangiar ma soaranta mamuji Debata ala asi dohot holong ni rohaNa umbahen tolhas hita dibagasan taon naimbaru on. Marende ma hita.
2. MARENDE BE.NO.70 : 1 – 3
Naung salpu taon na buruk i, Ho ma hupuji Tuhanki
Ai diramoti Ho tongtong tondingku dohot dagingkon 2X
O Jesus sai asi rohaM, paian denggan ni basaM
Muse di taon na’mbaru on di nasa huriaM tongtong 2X
Sai tong paian hataMi na mangapuli roha i
Alai pangago sasude, padao ma sian hami be 2X
3. VOTUM – INTROITUS – TANGIANG
U Marhitehite goar ni Debata Ama dohot Anakna Tuhan Jesus Kristus dohot goar ni Tondi Porbadia na tumompa langit dohot tano on.
H Amen
U Sai mangaranapi do matangku dompak angka dolok, sian dia do ulaning ro pangurupi tu ahu;
H Sian Jahowa sitompa langit dohot tano on sambing ro pangurupion ianggo tu ho;
U Ndang tagamon loasonna tarsulandit patmu, ndang tagamon nok mata ni sijaga ho. Ida ma, ndang olo nok mata jala ndang olo modom ianggo sijaga Israel. Sai jagaon ni Jahowa do ho sian nasa parmaraan; Sai jagaonna do tondim. Sai jagaon ni Jahowa do ho laho ruar dohot bongot olat ni on ro di saleleng nilelengna. Haleluya.
H (Endehon) : Haleluya – haleluya – haleluya.
U Martangiang ma hita! Ale Tuhan Debata na so marmula na so marpansohoton; Ho do Bonana dohot Ujungna. Namarsalpuan do ianggo taon nami alai na hot rodi salelengnilelengna do asi ni rohaM. Mauliate hudok hami ala dipasanga Ho dope hami sahat tu taon naimbaru on. Godang do asi ni rohaM naung hujalo hami di taon na salpu, jala godang do hubolus hami parungkilon, pangunjunan ro di angka haporsuhon. Hujalo hami ragam ni pasupasu di ngolu siapari, dipardongan saripeon, diparianakhonon, diulaon dohot dinasa sipingkiran ni rohanami. Sai pahot ma haporseaonnami tu Ho, asa dibagasan sinondangMi hami mambongoti 2012 on. Asi ma rohaM ondihon jala pasupasu hami manjalo taon naimbaru sibasabasahononMu di hami ima taon 2012 on marhitehite Tuhan Jesus Kristus, Tuhannami. Amen.
4. Marende No. 65 : 1 + 2 “Patimbul be ma sangap”
Majumpang taon imbaru on di au di bahen Jesus
Dibaen rohaNa di au on basaNa dipatulus
Ibana do manogu au, saluhut jea dipadao
Mambaen las ni rohangku
Dibahen i hupuji Ho, O Jesus Debatangku
Ai ndang hea mangulon Ho mambaen partuaonku
Rohangku panuratan ni godang ni denggan basaMi
Ai Ho do pangurupi
5. PATIK NI DEBATA : ROM 12 : 2
U Patik ni Debata di bona ni Taon 2012 on ima na nienet sian Rom 12 : 2 didok songon on disi :”Jala unang gabe sarombang hamu dohot portibi on; alai gabe imbaru ma hamu, dung muba pingkiranmuna; Asa tau hamu manimbangi lomo ni roha ni Debata ima na uli, na hinalashonna dohot na sun denggan”
Ima sahat na. Rap mangido gogo ma hita sian Tuhan Debata laho mangulaon PatikNa !
S Ale Tuhan Debata, sai pargogoi ma hami laho mangulaon angka PatikMi. Amen
6. Marende No. 265 : 1 + 3 “Naung jumpang do muse sataon“ (jongjong)
Tu Ho hulehon ma tondingku, sai baen ma i ingananMi
Sai suru ma TondiM tu ahu, manogunogu rohangki
Na jolo holong ni rohaM do, manaiti Ho tu tano on
Laos i mandasdas Ho nuaning, pangolu au na dangol on
Urati ma, huhut tutungi Sude na jat di rohangki;
Marhite rante manang tali Tarihot au di dosa i,
Ndang dia imbar nii, o Tuhan, Boi do malua au disi.
Hasian ni roham ma ahu, Pardosa na malua i,
7. MANOPOTI DOSA & BAGABAGA HASESAAN NI DOSA
U Di na taparhatopot haburjuon ni Debata mandongani hita saleleng taon 2010, disi do patar angka pangalaosion tu Ibana, hurang pos ni rohanta tu Ibana, gok hagaleon angka natoras maradophon ianakhon; parange ni ianakhon mangarsahi natorasna, hagaleonta maradophon dongan, bangso, masyarakat dohot negeranta. Hagaleonta papatarhon haporseaonta songon siihuthon Kristus di tonga tonga ni portibion. Hagaleonta patureture hasadaonta. Andorang so marujung taon on, sude hahuranganta, hagaleonta dohot dosanta i, tatopoti ma diadopan ni Tuhanta parlambas roha i.
U Ale Tuhan Debata parasiroha na sumurung! Na ro do hami tu joloM manopoti dosanami na godang i. Nunga hubolus hami sada taon; Huhilala hami do godang ni dosa dohot pangalaosionnami manipat na sataon on. Asi ma rohaM, sesa ma luhut dosanami i.
H Hupabotohon ma tu Ho sude dosangku jala ndang hutabunihon hajahatongku tu Ho. Asi ma rohaM, sai pangolu ma ahu!.
U Sai asi ma roham, ale Debata, sai jangkon ma hami jala sesa ma dosanami, ala ni Anak haholongan ni rohaM, Tuhan Jesus Kristus, Tuhannami. Amen.
H (mangendehon BE No.432:1-2 “Sian hurungan ni dosangki” BL.292
Sian hurungan ni dosangki, ro au tu Ho. Ro au tu Ho.
Tu haluaon di mudarMi, Jesus au ro tu Ho.
Nasa rohangku malum hipas, gabe mamora, nang pe pogos.
Sian jeangku ro au tu Ho, Jesus au ro tu Ho.
U Tajalo ma apulapul hasesaan ni dosa sian Debata taringot tu angka dosanta. Parasi roha jala pardenggan basa do Jahowa, lambat tarrimas jala parasi roha godang. Ndang tongtong Ibana manorui, jala ndang gotos rohaNa saleleng lelengna. Hasangapon ma di Debata na di ginjang. Amen (Hundul)
8. KOOR PUNGUAN INA
9. Marende No. 421 : 1 “Marsomba au di joloMon”
Marsomba au di joloMon ponjot targogot rohangkon
Dibaen godang ni dosangkon, sai jangkon dohot au
Sai jangkon ma au on, na ramun diringkon
Tung pos do rohangki di Ho, dijangkon Ho au on
10. MANJAHA EPISTEL : HEBER 5 : 11 - 14
U Turpuk Epistel di Minggu Taon baru on ima na nienet sian Heber 5 : 11 – 14 tajaha ma marsorinsoring : Godang do nian sidohononnami taringot tusi, jala angka na maol pajojoron, ala nunga penge pinggolmuna
H Ai tumimbangkon lelengna i, nunga patut guru hamu nian hape angka sisiasia ni hata ni Debata dope siajarhononhon tu hamu, gabe sus nama ringkot di hamu, ndada sipanganon hian.
U Ai ganup partohap di susu ndang marbinoto di hata hatigoran i, ai posoposo do i
H Alai sipanganon hian do di angka na rimpas, naung pasomalsomal rohana, gabe malo mamolati na denggan sian na roa.
U Ima sahatna. Martua do na tumangihon Hata ni Debata jala na umpeopsa.
H Amen !
11. KOOR wiyk I Limbangan
12. Marende No. 447 : 1 “Ho mual hangoluan i“
Ho mual hangoluan i, na tubu sian Ama i, Tuhanku Jesus Kristus,
Patar dibaen Ho balga ni holong ni roha na gok i, na sai mauliutus,
Tung na malungun tondingki, Di asi dohot holongmi, Sai ro pabosur ahu.
13. REFLEKSI TAON BARU
U Hamu dongan sahuria. Nunga taripar hita di taon naimbaru on. Didok sijolojolo tubu : “Nilangka tu jolo, tinailihon tu pudi”. Ala naeng mangalangka ma hita tu jolo, tama do jo tatailihon tu pudi, i ma pardalananta manipat na sataon bolon on. Molo tatailihon pe tu pudi, asa dapotan bisuk do hita sian angka na tabolus i, ai i do guru di hita mangalangka tu jolo di taon 2012 sibongotanta on. Molo taparrohahon angka na masa dina humaliang hita, boi do dohononta na mardalan dibagasan haholomon dope hita di partingkian na salpu. Lam tu jorbutna do pangalaho ni hajolmaon di partingkian na salpu so dihabiari be Debata. Holan ngolu na di portibion nama dipasarisari jolma i, anggo hangoluon sogot i so disarihon. Manabu ma jolma i tu ngolu na so marpanghirimon dohot ngolu na so marhaporseaon tu Debata. Sungkunsungkun do rohanta, aha ma muse angka na masa di taon 2012 on?
H (Mangendehon): BE No.769:1 “Tu Debata do pangkirimon”
Tu Debata do panghirimonki, di tano laut nang awang-awang i.
Ibana do haposanki tongtong do diramoti langkangki.
Reff. Torop pe mara manahopi au, Debatangki do sumarihon au,
pos rohangki, sonang do au. Ibana do na mandongani au.
U Angkup ni, lam mabiar do hita di tingki na parpudi on, ala marhehean semangat agama na sektarian na patubu parsalisian di tongatonga ni masyarakat. Sai dipaksahon na deba do poda ni agamana gabe dasor ni kebijakan ni pamarenta dohot dasor ni parsaoran di masyarakat. Ala ni, ndang be holan parsaoran maradophon Tuhan tujuan ni agama, nunga dipangke tu politik, ekonomi, dohot mangalului huaso portibi. Ala ni, lam maol ma jumpang parsaoran na denggan di portibion. Susa jala mangae ma partubu na metmet, ala dipangke na deba agama i pasintongkon tindakan kekerasan, manutung dohot mangorai jongjong gareja., mangambati partubu na metmet mangulahon ruhut parugamoonna. Boha ma hita na porsea di Jesus Kristus mangadopi i?
H (Mangendehon): BE No.769:2 “Tu Debata do pangkirimon”
Amporiki nang bungabunga i, ro di sude na tinompaNa i.
Na metmet nang na balga i, Ibana do na marmuduhon i.
Reff. Torop pe mara manahopi au, Debatangki do sumarihon au,
pos rohangki, sonang do au Ibana do na mandongani au.
U Sintong do i dongan, “Torop pe mara manahopi au, Debatangki do sumarihon au, pos rohangki, sonang do au Ibana do na mandongani au.” Alani i tabege ma hata ni Debata na tarsurat di Roma 1:16-17, na mandok:
H Ai ndang na huhailahon barita na uli i, ai hagogoon ni Debata do i, paluahon nasa na porsea. Ai dipapatar do disi hatigoran ni Debata, na sian haporseaon tu haporseaon;
U Hombar tu na tarsurat hian na mangolu do partigor i hinorhon ni haporseaonna. Amen
14. KOOR WIYK II BREBES
15. Marende No. 701 : 1 + 2 “Tu Ho do au marpadan”
Tu Ho do au marpadan O Jesus Tuhanki,
Asa burju haposan au diadopanMi
Sai Ho ma mandongani au di ulaonki
Ajari pargogoi ma au di dalanki
Baen ma pangkilalaan di au O Tuhanki
Donok do Ho O Tuhan mandopang musungki
Ragam do pangunjunan dihasiangan on
Ho partanobatoan di paraloankon
16. MANGHATINDANGHON HAPORSEAON
U Di bona ni Taon imbaru on, rap tahatindanghon ma Haporseaonta i songon angka donganta sahaporseaon di sandok portibi on.
S “ Ahu Porsea………..”
17. TINGTING
18. KOOR PUNGUAN AMA
19. Marende No. 232 :“Jesus Urupi“ (P.Pelean IA & IB)
Sian sude parulian na arga, Sada huboto, hutiop tongtong.
Jesus Tuhanku, Ho arta na arga, Na mangatasi sudena antong.
Tangkup Tuhanmu, tung tiop hatana, Sai pangasahon ma bagabagana.
Naeng ho pistar? Sai dapothon Tuhanmu, Nasa na hurang sai boan tusi.
Tu pamodaina paunduk rohamu, Asa tiur sasude bogasmi.
Tangkup Tuhanmu, tung tiop hatana, Sai pangasahon ma bagabagana.
— musik —
Naeng ho tigor? Pangasahon Tuhanmu, na tuminggalhon sangapna sude.
Na gabe jolma pasaehon dosamu, Golom ma, aithon pangkophopna i.
Tangkup Tuhanmu, tung tiop hatana, Sai pangasahon ma bagabagana.
Naeng ho mangolu salelenglelengna? Di Tuhan Jesus do jumpang ho i,
Nunga torang ditaluhon sibolis, Nang hamatean sigomgom sude.
Tangkup Tuhanmu, tung tiop hatana, Sai pangasahon ma bagabagana.
20. JAMITA : Efesus 4 : 24
Na pinatolhas Ephorus HKBP Pdt.Dr.Bonar Napitupulu
21. Marende No. 217 :“Jahowa do donganku“ (Papungu Pelean IIA+IIB dohot Tu jolo)
Jahowa do donganku, Tung ise alongki?
Tangiang ni rohangku Padaohon musu i.
Hasian ni Debata Au, Kristus ulungki,
Tung aha hatahata ni panginsahi i?
Ai damang do Jahowa, Hupuji i tongtong.
Sai i digolom roha, Marningot na holong
Do roha ni Natimbo; Tuk do gogona i
Mambuat nasa holso, Pasonang rohangki.
– - – - musik – - – -
Mudar ni Tuhan Jesus Panalom rohangki;
Ai i do na patulus Dalan tu Ama i; Artana do na maol
Na nilehonna i; Unang pinarmaol! Ngolu ni daging i!
Jesus hasangaponku, Sondang ni tondingki;
Aut unang i huboto, nda mago au boti?
Dibaen habadiaon Ni Natumimbul i,
Rimasna ndang tartaon, Na songon api i.
22. PARSURUON TU NGOLU SIGANUP ARI
U Huria na hinaholongan ni Tuhan Jesus. Nunga marsaringar di tongatonganta Hata ni Debata na pabotohon tu hita naung dipatulus Debata bagabagaNa tu hita sian taon na salpu sahat tu bona ni taon on. Alani naeng ma hita gabe jolma na imbaru, na tinompa suman tu Debata dibagasan hatigoran dohot hapolinon na marhasintongan>
H Mangendehon BE.No.672 : 1 “Tung godang...” (ndang dohot refrain)
Tung godang situtu ulaonmu antong dipasahat Tuhanta tu ho
Ndang adong be tingkim marnalemba tahe ngolumi bahen tiruan tongtong
U Songon anak ni Debata hita tung godang do siulaonta di portibion, nang pe sai ro angka parungkilon dohot pangunjunan alai sai tongtong do pandonganion ni Debata di ngolunta. Alani tongtong ma hita mian dibagasan Ibana, mangolu ma hita hombar tu hataNa, asa monang hita sahat rodi ujungna maralohon ragam ni parungkilon dohot pangunjunan di portibi on.
H Mangendehon BE.No.672 : 2 “Tung godang...”(ndang dohot Refrain)
Ai lambok do soara ni Tuhanta i, ro ma ho las ma nang rohami
Sai taingot tongtong Hata ni Tuhan i mangarahon jolma tu Tuhan i
U Di bona ni Taon naimbaru on tarjou do hita mamparbuehon angka na denggan di panggulmiton ni ngolunta di tongatonga ni portibi on. Borhat ma hita tabaritahon pambahenan ni Debata na songkal i, asa gabe sira dohot panondang hita marhitehite na mangolu hita dibagasan holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon.
H Mangendehon BE.No.672 : 3 “Tung godang situtu” (dohot Reffrein)
Alanii boan ma sondang na tiur i
Boan ma Hata ni Tuhan i
Sai urupi na pogos na mardangol i,
Asa ro tu Jesus Tuhanta i
Reff. Sai patupa ma i alani Tuhan i
So mangkirim balosna tu ho
Debata do marnida na niulami
Manang na adong parbueni i
23. TANGIANG PANIMPULI
U Tangiang Pelean (Sian agenda HKBP)
H (mangendehon) “Nasa na ni lehonMi….
U Tangiang Pangondianon (sian Agenda HKBP) + Tangiang Ale Amanami
H (mangendehon) “Ai Ho do nampuna harajaon….
U Pasupasu
PENDETA dohot sude PARHALADO
HKBP BREBES RES. BREBES
MENGUCAPKAN
SELAMAT TAHUN BARU 01 JANUARI 2012
TUHAN YESUS MEMBERKATI KITA SEMUA
