Ev. Lukas 1 : 39 – 45
Tema
“Marlas ni roha paimahon haroro ni Kristus”
Ido parasingan na masa di bagasan turpukta on na pinatuduhon dua halak parompuan ima si Elisabeth dohot si Maria. Taboto do ia si Maria dohot Elisabeth dua halak parompuan na manjalo baga-baga na dipasahat Debata sian na so mungkin hian alai gabe mungkin ima managam haroan. Alai marasing situtu panghilaan na niadopan dua parompuan i. Boasa ? Molo si Elisabet malua sian ila bolon, alai anggo si Maria gabe hailaon bolon do i.
Elisabeth ima ripe sahalak malim na margoar si Zakaria. Nunga tung leleng nasida na marumahtangga i alai ndang adong dope dakdanak sahat tu naung matua. Didok dibagasan turpuk na asing, ia si Elisabeth ima boruboru na hol (mandul). Anggo si Maria asing muse, ibana sahalak anak boru na so marsaripe dope alai nunga adong donganna baoa na margoar si Josep sian pomparan ni Raja Daud. Duansa nasida ditopot Debata marhite suru-suruan Gabriel jala didok ma marhite huaso ni Tondi Porbadia dapotan bagabaga nasida na dua ima dipasahat posoposo di partingkian na marasing.
Di mulanai songon na maol do i sian tu bagasan roha nasida angka na masa i, alai siala pangantoion ni Debata do i gabe tubu kepasrahan (haunduhon) di ngolu nasida angka na masa i marhite haporseaon nasida. Tapatudos songon na didok si Maria :”Sai saut ma tu ahu songon na nidokMi” (Luk.1:38). Sian pengalaman haporseaon ni na dua parompuan i gabe nalnal ma tarida “Ndang adong na so tarpatupa Debata” (Luk.1:39).
Borhat do si Maria mandapothon si Elisabeth tu bagasna. Ndang apala tangkas :”Aha do alana na mangonjar roha si Maria laho tu huta si Elisabeth. Tingkos do hal na somal do berkunjung (ber-silahturahmi) tu jabu tondong manang keluarga, alai porlu do botohonta, ia inganan si Elisabeth na sitopothon Maria molo mardalan pat lelengna 4 ari, hape dibagasan na denggan muse pamatangna. Tontu ndang be hal na biasa na binahen si Maria dibagasan turpukta on. Alai molo ditafsir secara allegoris (eisegese ninna ilmu tafsir perbandingan), toho do las roha si Maria manjalo pasupasu na dipasahat Debata alai sian roha hajolmaon adong do biar jala tahuton ngoluna mangadopi na masa di ngoluna. Hombar tu adat hajahudion molo denggan pamatang anak boru alai ndang marsaripe dope sada hailaon na bolon do i jala uhum tusi ingkon mate do. Di situasi si songoni ma si Maria laho mandapothon Elisabeth asa mangido semangat dohot pos ni roha laho patulushon sangkap ni Debata marhite si Maria. Alasan na asing jala pasti ima parsuruon ni Tondi Porbadia asa pajumpang dua parompuan i dohot posoposo na dibortian i dope. Taboto do ndada jolma na biasa posoposo na naeng sorang i. Sada ma i dibahen goar na si Johannes ima sahalak panurirang na paradehon dalan haroro Mesias tu portibion, jala sada nai ima Messias i.
Dung pajumpang nasida, lam tangkas ma na tutu situtu holan Debata do na patupa na masa i di nasida. Rap meng-amen-hon (mangolopon) nasida na dua di pambahenan ni Debata na sahat tu nasida. Laos dohot do parjumpangan posoposo na dibagasan bortian i, didok manggunjal posoposo disi Elisabet. Di bortian dope nunga ditanda si Johannes ise do posoposo na di bortian si Maria. On ma patuduhon las ni roha na so habilangan na pinatudu si Johannes tu Messias na naeng ro i. Pengalaman pajumpang dohot Tuhan i patubuhon las ni roha na bagas siala ni honjar ulaon ni Tondi ni Tuhan i, songoni na hea masa na nialaman Raja Daud dung dapotna poti parpadanan i, salang-salang do ibana manortor ala las ni roha bolon i ( 2 Sam.8:16). Botul-botul do digohion Tondi Porbadia parjumpangan nasida na dua i gabe marsoara na gogo ma si Elisabet pola didok ibana :”Dapotan pasupasu do ho di tongatonga ni angka ina, dapotan pasupasu do na pinarorotmi.
Aha do siputihononta marhite turpuk on :
1. Ragam do angka na masa naung tabolus di ngolu on sipata godang sian angka na masa i mambahen mabiar jala tahuton di ngolunta, ujungna boi do tubu pandelean dohot pingkiran na apatis. Hape molo di rimang-rimangi so sadia dope i martimbangkon na nialaman si Maria. Anggo di partingkian si nuaeng on godang do halak Kristen ditaluhon (didondoni) angka persoalan ngoluna. Ujungna mangalului cara na so dihalomohon Debata asa malua sian persoalan kehidupan i, jala adong do na so sanggup be gabe maningkot manang gabe marsahit sahat tu na gila. Ingkon boi do hita marsormin tu si Maria on, nang pe borat situtu na nialaman ngoluna alai parjolo do tubu haunduhon (kepasrahan) di adopan ni Debata, jala laho do ibana mangido saran (advis) sian dalan na sintong.
2. Godang do halak Kristen dohot jolma na asing di portibion tujuan hidup nunga margeser ima ngolu na saling menjatuhkan, menjelek-jelekkan orang lain. Sai dihalomohon jolma do halak na asing i madabu bahkan bila perlu hancur (mengkel disi habunihon, tangis disi hapataran). Hape si Elisabeth dohot Si Maria dipatuduhon do roha na saling mendukung, menguatkan (paposhon roha ni dongan) asa mampu nasida mangadopi angka na masa i.
3. Parjumpangan dohot Jesus patubuhon las ni roha na so hadodoan. Tarlumobi dina naeng bongotonta pesta Natal di minggu naeng ro, ingkon do patubuhon las ni roha di ngolunta. Las ni roha ndada alani tapahombar tu angka na naeng sibahenonta di pesta natal i, isarani baju baru, kue, mangan na tabo dohot angka hadiah, alai las ni rohanta ala olo Jesus ro manopot hita di pesta Natal on. Tauji ma jolo mambahen perbandingan, gari ro tondong tarlumobi pejabat manopot jabunta tung ima las ni rohanta, hape na mandapothon hita nuaeng ima sahalak Raja. Ibana Raja na marhuaso di Banua ginjang dohot di portibion. Hape godang do halak Kristen na so marlas ni roha di pesta natal i siala sai jotjot holan mamereng ekonomi dohot angka urusan portibi. Lupa hita ima so adong na boi pahombaron manang aha pe na adong di portibion molo pajumpang dohot Debata marhitehite AnakNa i Tuhan Jesus Kristus. Alani i unang ma ganggu rohanta dina laho pajumpang dohot Jesus di tingki on dohot di tingki na parpudi i muse. Ai holan na pajumpang dohot Jesus do jala gabe hasiaton ni rohanta do Ibana umbahen boi hita marolopolop di portibi on dohot di tingki haroroNa na paduahalihon i. Amen
Tidak ada komentar:
Posting Komentar