PODA 29: 15 - 18

PODA 29: 15 - 18” 

Tung mansai ringkot do angka poda dohot pangajarion di ngolu on tarlumobi tu angka sundut naumposo manang tu angka dakdanak. Halak na so mangharingkothon poda manang pangajarion, madabu do nasida tu angka haotoon, pangalaho na so denggan, dohot kehancuran. Hata ni halak Batak pe tangkas do mandok :”Ijuk diparapara hotang diparlabian, na bisuk napuna hata na oto tu panggadisan”. Poda manang habisuhon ima songon rambu manang petunjuk dalan di pardalanan ni ngolu ni jolma di hasiangan on. Ai molo so adong be petunjuk dalan susah ma jolma mardalan, jala olo gabe lilu.

Adong do na ingkon diwarishon angka natoras tu angka ianakhon dibagasan ngoluna ima Parbinotoan, Karakter na denggan, dohot spiritualitas. Parbinotoan ima na jinalo ni angka dakdanak marhite pendidikan formal dohot non-formal manang informal, alai molo parbinotoan karakter jumpangan angka dakdanak do i marhite keluarga, suang songoni parbinotoan spiritualitas jumpang nasida marhite parsaoran dohot Debata manang dohot Firman ni Debata.

Ndang be arta manang sinamot na ingkon si warisan angka natoras tu angka ianakhon. Nang pe si godang arta angka natoras, na parjolo simemehon dohot si warison ima pangajarion dohot poda tu angka ianakhon asa mangolu nasida gabe jolma na denggan, diboto marroha, diboto firman, dungkon ipe boi ma sipasahaton warisan arta manang angka na asing. Godang do persoalan keluarga siala warisan arta, gabe tubu parbadahon dohot parmusuon di angka ianakhon. Jala on do mambahen haurahon di angka natoras. Ai songon dia parngoluon dakdanak ndang mungkin sibahen boncir jolma na asing, alai natoras do. Apalagi tu angka ina, siala ina do na sai dijabu. Di angka ina do pembentukkan karakter ni dakdanak. Anggo angka amanta somal na didok do i mansari ngolu-ngolu. Tarlumobi di jaman saonari on, nunga lam jamot angka natoras manang lam marsitutu. Molo na jolo, boi do holan parenta, anggo di jaman si nuaeng ndang cukup be holan parenta alai ingkon dohot do mambahen contoh manang sitiruon.

Angka ianakhon na sai manjalo poda manang pangajarion sian natoras mambahen hasonangan dohot las ni roha tu angka natorasna. Alai angka ianakhon na so hea diajari natorasna holan mambahen hasusaan do i tu angka natorasna. Alani ido dia ma dumenggan, tabahen sonang saonari alai haduan susah, sian saonari susah alai aduan gabe sonang. Pepatah Indonesia pe mandok : Bersakit-sakit dahulu senang kemudian. Ndang boi sasude pangajarion manang taringot tu angka poda dijalo angka ianakhon sian halak, sian guru, manang sian pandita, dao dumenggan molo dijalo nasida i sian natorasna sandiri.

Di jaman nuaeng pe nunga sai martambah-tambah angka parjahat. Boasa boi terjadi si songon i? ima naung moru halak na marsitutu mamodai angka jolma na asing. Sikap egois, na holan mamikiri diri sandiri, tidak peduli nunga gabe budaya naimbaru di masyarakat si nuaeng on. Maol nama halak manghilalaon mamereng anak halak na asing gabe songon ianakhonna. Lapatanna molo dihilala sahalak ianakhon halak na asing gabe songon ianakhonna, songon dia holongna tu gellengna gabe songoni ma holongna tu ianakhonna halak na asing. Hape si nuaeng, pola so diparrohahon be songon dia angka halak na asing i. Ido umbahen gabe tubu di ngoluon angka tembok pemisah, tubu kelompok-kelompok. Jala kelompok on pe nunga lam eksklusif. Adong do kelompok alani hobbi, kelompok alani arisan, kelompok alani marga, kelompok alani style dohot angka na asing. Ndang pola nian masalah angka kelompok on, alai gabe masalah siala dianggap kelompokna lebih hebat alai kelompok na asing ndang denggan.

Taingot ma songon didok di ay.18 halak na sai mangaradoti patik ni Debata ingkon martua ibana. Molo naeng lam denggan ngolu on ingkon taradoti do manuanhon poda, pangajarion tarlumobi hata ni Debata. Tung mansai godang do makna manang lapatanni ni poda dohot pasahaton hata ni Debata (pat.Maz.119:105; 2 Tim.3:16). Tapahimbul ma rohanta dohot gogonta lajo diparjolonai alai mamutik ma hita muse na denggan di ujungna, jala molo pe ndang hita na mamutik i alai putihon dakdanak i do di ujungna muse. Amen