Jesaya 2 : 1 - 5

Jesaya 2 : 1 - 5

Bahasa Batak

Bahasa Indonesia

2:1 On do hata na niida ni si Jesaya, anak ni si Amos taringot tu Juda dohot Jerusalem. 2:2 Masa do sogot, di ujung ni angka ari: Hot disi dipaojak dolok ni bagas ni Jahowa di punsu ni angka dolok, jala huminsat sian angka robean, jadi marrongoman ma tusi sude angka parbegu. 2:3 Jala torop angka bangso mandapothon tusi angka na mandok: Beta hita tanangkohi ma dolok ni Jahowa, tu bagas ni Debata ni si Jakkob, asa diajarhon tu hita angka dalanna, jala mardalani hita di angka lapangna. Ai marharoroan sian Sion do sogot patik i, jala sian Jerusalem hata ni Jahowa. 2:4 Jadi manguhum ma ibana di tongatonga ni angka parbegu, jala toruanna torop angka bangso. Jadi patopahonon nasida ma podang nasida bahen gigi, jala hujur nasida bahen angka sasabi; ndang be sintahon ni bangso dompak bangso podang i jala ndang be guruhonon nasida parmusuon. 2:5 Beta hamu, ale pinompar ni si Jakkob! Mardalani ma hita di hatiuron ni Jahowa.

2:1 Firman yang dinyatakan kepada Yesaya bin Amos tentang Yehuda dan Yerusalem. 2:2 Akan terjadi pada hari-hari yang terakhir: gunung tempat rumah TUHAN akan berdiri tegak di hulu gunung-gunung dan menjulang tinggi di atas bukit-bukit; segala bangsa akan berduyun-duyun ke sana, 2:3 dan banyak suku bangsa akan pergi serta berkata: "Mari, kita naik ke gunung TUHAN, ke rumah Allah Yakub, supaya Ia mengajar kita tentang jalan-jalan-Nya, dan supaya kita berjalan menempuhnya; sebab dari Sion akan keluar pengajaran dan firman TUHAN dari Yerusalem." 2:4 Ia akan menjadi hakim antara bangsa-bangsa dan akan menjadi wasit bagi banyak suku bangsa; maka mereka akan menempa pedang-pedangnya menjadi mata bajak dan tombak-tombaknya menjadi pisau pemangkas; bangsa tidak akan lagi mengangkat pedang terhadap bangsa, dan mereka tidak akan lagi belajar perang. 2:5 Hai kaum keturunan Yakub, mari kita berjalan di dalam terang TUHAN!

ARI PARPUDI

Songon dia do panghilalaan ni halak na mandapot juara, di tingki detik-detik dina laho manjalo piala manang na piagam? Songon dia ma muse panghilalaan ni halak di detik-detik terakhir laho mandalani eksekusi hukuman mati? Na pasti ingkon las do roha ni halak na naeng manjalo penghargaan ala ni sadasada kesuksesanna. Alai suharsuharna do ianggo di halak na naeng manjalo balos ni pambahenanna na jahat i. Songon i ma nuaeng barita ni turpuk jamita on, sada lumbalumba asa mangarade saluhut halak mangadopi ari paruhuman ni Debata Jahowa. Tontu gok biar ma roha ni halak pardosa, alai las ma roha ni halak na porsea tu Debata jala na mangihuthon dalan ni Tuhan i.

On ma Minggu parpudi andorang Ujung Taon Parhuriaon. Di Kalender Gerejawi manang Tahun Liturgi, on ma minggu parpudi di pangaradeon ni na porsea manomunomu ujung ni angka ari dohot partingkian. Naeng ondolhonon di jamita sadari on paboa marujung do angka ari dohot partingkian di portibi on. Ndang adong na manongtong di portibi on, holan Debata Jahowa do na manongtong. Alai adong do parhiteanta songon jolma na fana on tu hadirion ni Jahowa na manongtong i, i ma haporseaon. Haporseaonta i do na mamboan hita pajumpang jala mardame tu Debata Jahowa, ndang perak manang sere. Haporseaonta i do nang na mangonjar rohanta marhamubaon ni roha, i do na hinalomohon ni roha ni Debata sian hita jolma pardosa on. Haporseaonta i do na paluahon hita sian rimas ni Jahowa tu sandok tano on, huhut na paluahon hita sian haroro ni ari parpudi i. Marujung pe angka ari dohot partingkian i alai ianggo haporseaonta i diboan i do hita mamolusi i, menembus ruang dan waktu. Ala ni i, pangaradeonta manomunomu ari pangarimasan ni Jahowa i ma, tatiop ma gomos haporseaonta i, songon na didok di Pang. 3:11, “Magira ma Ahu ro. Tiop ma na di ho, unang adong na mambuat tumpalmi.” Haporseaonta i do muse na mangajarhon tu hita mangulahon lomo ni roha ni Debata, huhut pasidinghon sogo ni rohaNa i.

Marhite panurirang Jesaya on disoarahon do taringot tu ari parujungan, disi ma jumpang uhuman sekaligus bagabaga na sian Debata. Uhuman na ro sian Debata ima sialah na marjoga, martangkang pangalaho nasida maradophon Debata. Dipaloas Debata do uhum na bolon tu bangso i gabe dibolongkon tu tano Babel. Alai molo sai marsihohot do nasida di angka na dihalomohon Debata gabe jumpang ma di nasida ngolu las ni roha dohot bagabaga na sian Debata. Patupaon ni Debata do sada tingki naimbaru ima marhite napajongjonghon bagas joroNa di Jerusalem. Naboi idaon ni sude bangso di inganan na timbo marlapatan ndanda holan bangso Israel be na boi marnidai alai sandok houm, marga, huta nang bangso tahe.

Aha do Bagas joro i, Bagas joro ima sada tanda manang gombaron na mian do Jahowa Debata nasida di tongatonga ni halak Israel dohot Juda, jala di bagas joro i do marsaringar hata na dihatahon ni Jahowa jala na naeng diulahon bangso i. Bagas joro ima gombaran ni hamuliaon ni Jahowa, jala di bagas joro on mambahen jolma i martoruk ni roha marnida hamuliaon ni Jahowa jala on ma na boi mambahen jolma i mananda pangalaoisonna tu Jahowa diuduti manopoti pangalaosionna. Bagas Joro ima inganan parpunguan ni halak na porsea tu Jahowa. marhite parpunguan on dipatupa do parsombaon marhite ende dohot pujipujian.  

Masibetabetaan manjalo pangajarion sian Debata “ Beta hita manangkohi dolok ni Jahowa” manggombarhon hasadaon ni bangsoi tongon di ari haluaon i, alani binsan sadihari dope mansai ringkot manjalo pangajarion sian Debata dohot mangulahon lomo nirohaNa andorang so ro ari ni Tuhani. Songon Huria hita ingkon ma masibetabetaan laho mamuji Tuhantai, mangarahon angka dongan “ Boan sadanari” asa unang Uhum sogot di ari ni Tuhan i.  “Beta hita,” na marlapatan ma i, ndang adong sian nasida na holan mangihutihut, ( Songon nidok ni hata Batak: Eme namasak digagat ursa, iai namasa ima taula) alai ingkon dibagasan parsitutuon do mangarahon, alai na mangarahon pe ingkon parsidohot do asa rap masuk tu bagas joro i. Unang ma holan mangarahon hape diri sandiri gabe luangon (ndang dapot manang aha) songon angka agen bus na di terminal i.

Dinasahali di sungkun sada ina naposo ma sahalak ina natuatua, naung marumur 80 taon ,  didok disungkunsungkunnai, ai marlaba do pe ho inong na tu garejai? Boasa dohonon mu songoni ninna inanta natuatua, ai so dibege inong be jamitai, ai soboi be dijahaho buku ende dohot bibeli apalagi ma jamitai soboi be ra dibege ho ninna; lambok do inanta natuatuai mangalusi, mansai marlaba dope inang ahu na tugarejai, sarupa ma nuaeng ahu tu sada halak na manunsi paheanna, las boha pe dibahen mamoro ( mambilas abitnai) alai jumpa manjomurhonsa sai adong do tading aek nai di paheani , songoni ma nang ahu nang pe so tangkas be huida jala sohubege angka ende tarlumobima Jamitai alai sai adongdoi na tading dibagasan rohangku ninna inantai mangalusi, alani do binsan boi dope hudalani huharinggashon manopot bagas joroi. Mansai marguna do hape na ro manopot bagas joroi, ndada songon ni deba halak, sarupa do na marminggu dohot na so marminggu asalma porsea di Tuhani.

Beta hamu, ale pinompar ni si Jakob! Mardalani ma hita di hatiuron ni Jahowa.” Joujou ni si Jesaya i do on tu halak Juda, nang tu hita asa taripar ngolunta sian paruhuman tu ngolu bagabaga. So tung aduan halak dapotan alai hita so dapotan manang aha.  Hombar tusi ma dijouhon si Jesaya dison, asa mardalani nang nasida di hatiuron ni Jahowa, lapatanna mangolu hombar tu patik ni Debata. Ndang dia imbarna di halak Juda dohot na leban, na mardalan di hatiuron ni Jahowa mangolu, alai na tinggal di haholomon rap mago do i. Amen

Bahan Diskusi:

1. Beha do pangaradeonta tu ari parpudi on? Angka dia ma sibahenonta asa dapotan las ni roha hita di ujungna?

2. Songon dia do bahenonta asa tongtong dipaimbaru rohanta dohot ngolunta, asa unang holan mardosdos angka ari-arinta, salpu na leleng alai sarupa muse tu partingkian naimbaru?