Lukas 18: 28 - 30

Lukas 18: 28 - 30

Bahasa Batak

Bahasa Indonesia

18:28 Dung i ninna si Petrus ma: Hutinggalhon hami do na di hami, mangihuthon Ho. 18:29 Gabe didok Ibana ma tu nasida: Na tutu do hatangkon na tu hamu: Nasa na tumadingkon jabuna, manang na niolina, manang hahaanggina, manang natorasna, manang anakkonna pe ala ni harajaon ni Debata, 18:30 ingkon silompit do jaloonna i di hasiangan on, angkup ni i hangoluan salelenglelengna di hasiangan sogot.

18:28 Petrus berkata: "Kami ini telah meninggalkan segala kepunyaan kami dan mengikut Engkau." 18:29 Kata Yesus kepada mereka: "Aku berkata kepadamu, sesungguhnya setiap orang yang karena Kerajaan Allah meninggalkan rumahnya, isterinya atau saudaranya, orang tuanya atau anak-anaknya, 18:30 akan menerima kembali lipat ganda pada masa ini juga, dan pada zaman yang akan datang ia akan menerima hidup yang kekal."

Hasatiaon Mangihuthon Jesus dapothan di Pasupasu dohot Arta Banua Ginjang

Bangko ni jolma do di portibi on molo diula sada ulaon niaraphon do upa sian ulaon i ate. Hira so adong do halak molo nunga mangula ndang ringkot di nasida upa sijaloonna. Sada hal na wajar do upa i, ai hata ni Debata pe mandok :”na so ra mangula, unang ma ibana mangan” (2 Tes.3:30). Berarti angka na mangula do na boi mangan, anggo so mangula ndang lehanon mangan. Molo di hata Batak mandok : Molo gambo pe nijama, sai adong do mapiltik tu baba.

Nian taringot tu upa on marmacam do di portibion. Adong do upa i ima hepeng songon na somal di portibi on, alai adong do upa songon material na asing, boi do tano, jabu, penghargaan (apresiasi) dohot lan dope na asing. Upa i ima patuduhon na niula do sada ulaon gabe adong do ma panghorhonna tu ngolu na mangulaon i. Songon ido di angka ulaon na mar-Tuhan on, angka parbarita nauli, angka pelayan di tongatonga huria i. Ndang adong ra halak dioloi manghobasi ulaon ni Tuhan i so adong na nihirim ibana sian i. Nian ndada  holan hepeng na nihirim disi, alai na mansai ringkot ima pasupasu na sian Tuhan i tarlumobi hangoluan na so ra suda i.    

Songon ido na masa di bagasan turpukta on. Dungkon piga leleng angka sisean i na sai mangihuthon Jesus, ditinggalhon on do keluargana, ditinggalhon be do angka ulaonna.. Disungkun si-Petrus ma Jesus taringot dia ma upa sijaloon nasida. Marbonsir do sungkunsungkun si Petrus on siala masa panghataion sahalak sintua (pemimpin) tu Jesus taringot “Dia do sipatupaonku, asa hutean hangoluan na salelenglelengna”(ay.18) ninna. Sintua na manungkun Jesus ipe manghirim do upa sijaloonna molo nunga diulaon ibana ulaon ni Tuhan i.

Dungi didok Jesus ma tu ibana “Angka patik i diboto ho do, unang ho mangalangkup! Unang ho mamunu! Unang ho manangko…dna”. Pintor dialusi sintua (pemimpin) ido “Sasudena i huradoti do sian sieteketehonhu”Alai didok Jesus ma muse “Sada nama na hurang di ho : gadis ma nasa na di ho, parlehon ma i tu angka na pogos, gabe mararta ma ho di banua ginjang. Dungi ro ma ho mangihuthon Ahu”? Habot do rohana, lapatanna songon na so tarjalona do na dipangido Jesus i. Boasa songon i ? Siala ndang rade rohana mangadis sude artana i laho mangihuthon Jesus.

Hape 12 halak sisean i nunga ditadinghon sude angka arta na dohot keluargana laho mangihuthon Jesus. Jadi wajar do muncul sungkunsungkun sian nasida taringot “aha ma upa sijaloon nasida na sai mangihuthon Jesus”? Didok Jesus do tangkas: Situtu do hatangkon tu hamu : nasa na manadingkon jabuna, manang na niolina, manang hahaanggina, manang natorasna, manang anakhonna pe ala ni Harajaon ni Debata, ingkon silompit do jaloonna i di hasiangan on, angkup ni i hangoluan salelenglelengna di hasiangan sogot”(ay.29-30). Balga jala luar biasa do hape upa sijaloon na mangihuthon Jesus pola didok di Bibelta i“ingkon silompit do jaloonna angkup ni i hangoluan salelenglelengna di hasiangan sogot”. Tabona i ate, ndang holan upa na di hasiangan on hape sijaloonta, alai dohot do hangoluan salelenglelengna sogot.

Alani unang ma sai ganggu rohanta disi, jala unang ma gabe manimbil di pardalanan ni ngolu on. Di ngolu na serba instan nuaeng on, haporseaon ni jolma pe olo gabe instan songon istilah”diallang lasiak pintor pedas, diallang sira pintor hatsim, diallang gula pintor tonggi”. Sipata do naeng manghirim na balga, alai so adong pengorbanan dohot perjuangan. Maju mundur do jotjot haporseaon. Masa do mambahen parentongan untung/rugi mangihuthon Jesus i. Molo gumodang untungna diihuthon, alai molo gumodang do rugina gabe ditinggalhon. Songoni do taringot tu upa, naeng do pintor dijalo, .

Na pasti songon didok Jesus di turpuk on, halak na marsitutu dohot Total Service pasahaton ngoluna tu Jesus ndada marisuang i. Alani tapeop ma i saleleng ni ngolunta songon didok buku pangungkapon “Sai burju ma ho rasirasa mate; dung i lehononku ma tu ho tumpal hangoluan i! (pangungkapon 2:10b). Unang ma songon na masa di cerita on : Adong ma sahalak amanta parpande bagas. Tung uli do Karejona di sada kontraktor na nidohotonna, nunga tung leleng ibana na karejo disi. Di sada tingki, didok ibana ma tu pimpinanna laho mansohot sian ulaonna i. Alai sai dielekelek pimpinan perusahaan ido asa unang ma mansohot amanta i, alai ndang olo be amanta i. Ala nunga songoni marjogal amanta i ingkon mansohot sian parkarejoonna, gabe dipangido pimpinan perusahaan i asa dibahen ma sada nari jabu jala ibana sandiri ma manontuhon material tu jabu i. Di mulanai borat situtu do rohana, alai ala ima songon persyaratan mansohot sian parkarejoan i gabe diula ma. Dipajongjong ibana ma jabu i sian kualitas na so denggan, asal ma dibahen campuran semenna, songoni hau na pe ndang sian hau nomor 1. Dungkon sidung jabu i dipasahat ma tu pimpinan perusahaanna, alai ro ma pimpinan perusahaanna mandok : “Tu ho ma jabu i, songon penghargaan sian perusahaan on”. Pintor tangis ma amanta i ala tu ibana do hape jabu na pinaulinai.

Jotjot do hita songon amanta i, ndang olo marsitutu sahat tu ujungna. Ndang holan sundut naumposo na sai manadinghon Jesus, alai di angka natuatua manang Lansia pe, olo nama di pardalanan ni ngoluna gabe tubu pandelean, gale. Jala ndang hibul be rohana mangihuthon Jesus, alai nunga satongasatonga rohana i. Molo istilah Buku pangungkaphon Golom riaria (suamsuam kuku) sipata ngali alai sipata mohop. Ndada utopia (angan-angan parcendol) janji na didok Tuhan i. Saluhutna do manjadi songon na dipasahat Tuhan i di hita, dison dohot aduan. Apostel Paulus mandok :”Onpe, hamu angka donganku na hinaholongan, marsihohot jala so mubauba ma hamu, jala lam sumurung ma tongtong di bagasan ulaon ni Tuhan i, ai diboto hamu do: Ndang magopo halojaonmuna di bagasan Tuhan i.( 1 Kor.15:58) Amen