Markus 1 : 9 – 15

Markus 1 : 9 – 15

Tema :

Hadirion ni Jesus

 

Laho mangulahon sada ulaon, tontu sahali ingkon adong do perencanaan na denggan. isarana: mambangun jabu. Parjolo do gambarni jabu nanaeng sibangunon i, mangihut ma perhitungan bahan na ringkot  tusi, baru ma proses pembangunan di mulai. Ndang boi gabe parjolo hita mangetong bahan padahal ndang taboto dope songon dia bentuk jabu sibangunonta. Lapatanna adong proses siihuthonon asa denggan angka ulaonta. Marhite na taulahon proses i, dapotan ma hita dasar na togu laho mangulahon ulaonta. Sebalikna, molo ndang taulahon proses i dohot denggan, olo do gabe manegai ulaonta. Ndang tabahen gambar, alai pintor langsung bahan  tatuhor, gabe olo do hurang manang lobi bahan na tatuhor i.

Pardalanan panghobasion ni Jesus saleleng di portibi on pe nunga dibagasan perencanaan na denggan sian mulana i. Mulai na tubu Jesus, tardidi, diunjuni, dungi mamillit angka siseanNa, baru ma diulahon Ibana parsuruon ni Ama i di portibi on. Mangihuthon proses i, parjolo sahali Jesus pasahathon diriNa asa digohi jala dirajai Tondi i, asa margogo mangalo angka pangunjunan na ro tu Ibana, jala mampu mandalanhon panghobasion i.

Jamita on ima merupakan sada rangkaian na tarbagi di bagasan 3 judul, i ma: Tardidi Tuhan Jesus (9-11); Tarunjun Ibana (12-13); panghabasionna na parjolo di Galilea (14-15). Sian na 3 i, adong do sada na hinangkamna ima taringot tu Identitas manang hadirion ni Jesus. Tolu judul on, molo tabandinghon tu carita na sarupa na disurathon Matius, Lukas dohot Johanes tung mansai jempek do. Ndang pola dipaboahon proses ni pandidion na dilehon Johanes Pandidi tu Jesus (patud. Mat. 3:13-17; Luk. 3:21-22; Joh. 1:31-34). Ndang dicaritahon secara lebih jelas, boha do cara ni si bolis i mangunjuni Jesus (patud. Mat. 4:1-11; Luk. 4:1-13). Songoni do nang panghobasion na parjolo i.
(1)  Marhite pandidion na dijalo Jesus sian Johanes Pandidi, 3 hal na naeng dohonon ni si Markus.

Parjolo, Jesus mangalehon dirina dididi asa manggohi parsuru ni Ama i. Na paduahon, sebagai sada tanda na papatarhon hadirionNa tu hita jolma taringot tu haDebataNa. Na patoluhon, sebagai tanda ia Jesus nunga rade be laho memulai panghobasionNa di tonga-tonga ni portibi on. Adong do tanda na mandongani pandidion ni jesus. Darapati, melambangkan kedamaian, ia Mesias naung tardidi i mamboan dame di hita. Suara ni Ama i na manjou Jesus, gabe sada tanda na manghatindanghon Jesus anak ni Debata. Pandidion di hita gabe sada tanda dohot meterai na patuduhon hita sebagai halak na porsea di Tuhan Jesus Kristus. Rap dohot angka ianokkonta, nunga di meterai hita gabe milik ni Kristus (1 Kor. 7:14). Marhite pandidion, nunga gabe Anak ni Debata hita jala gabe warga Harajaon ni Debata, dung parjolo hita dipaias sian angka dosa. Alai naumringkot antusanta, bahwa di pandidion i do hita saluhutna manjalo Tondi ni Debata mian dibagasan hita. Tondi ni Debata i do na manogu, mandongani, manguluhon pardalanan ni ngolunta di hasiangan on. Tondi i ma na mangarajai roha, pikkiran dohot pambahenanta. Asa parsidohot hita gabe sipujion ni Debata, sebagai anak haholonganNa. Pandidion ndada songon sada hasomalan (tradisi yang diwariskan) na ingkon sipatupaon ni hurianta. Molo gabe sada hasomalan do i tarajumi sipatupaon ni huria, ndang marpanghorhon i tu ngolunta ganup. Dirajumi na deba do, ia pandidion ima pandidion laho mangalap goar. Sai hira na sian bagas joro ni Debata do dijalo nasida goar ni ianakhon nasida hape tangkas do nasida do na mambahen goar ni dakdanak i laos ido dipasahat tu parhalado huria i. Alani hasomalan na mangalap goar ido umbahen na godang angka natora tarlumobi ma i di angka ama na ro tu parsaoran ni angka na porsea holan di angka ulaon na marhadodohon, isarani : tardidi ianakhonna, sidi, mangoli/muli, dungkon nii ndang hea be nasida tarida di angka ulaon ni huria, sai hira na mabalu nama godangan angka ina ni halak Kristen.

Pandidion digoari do hepapax (sahali rodi saleleng ni lelengna). Ditulak hurianta do na patupahon pandidion na badia dua hali (baptis ulang), ai tahaporsea ido marhite pandidion i nunga gabe sangkambona hita dohot Kristus i. Nunga mate hita tu bagasan hamamateNa, jala nunga hehe hita sian huaso ni dosa dibagasan haheheonNa marhitehite pandidion i. Nunga tartanom jolma na buruk i, jala nunga tajalo identitas na imbaru i, ima jolma na imbaru naung pinintoran ni Debata.

(2) Dung tardidi Ibana, di togihon Tondi i do Jesus tu halongonan. Halongonan digombarhon si Markus sebagai inganan ni sibolis, rap dohot angka binatang liar. Di halongonan, diunjuni sibolis do Jesus. Marpuasa Ibana 40 ari 40 borngin, ndang mangan ndang minum. Di surat Injil na asing, dicaritahon sampe 3 hali Jesus diunjuni. Alai nang pe dibagasan hagaleon ni dagingna, di naso mangan dohot minum i, margogo do Jesus laho manaluhon pangunjunan i, ai nunga digohi Tondi i Ibana, jala Tondi ima na mangarajai Ibana. Andorang so masuk Ibana tu ulaon panghobasion i, Jesus parjolo sahali diarahon asa manaluhon huaso ni si bolis patuduhon huaso ni Debata mangatasi angka huaso ni si bolis.  Adong do pandohan di hita Batak mandok : Risirisi hata ni jolma, lamot-lamot hata ni begu, lapatanna ingkon jaga jala manat do hita di angka hata ni begu na lambok alai mamboan tu hasesega.  Ganup tingki do ro sibolis laho manguji hita jolma. Nunga dipatuduhon Jesus tutu paboa na so olo Ibana unduk jala na so talu ibana maradophon sibolis ala marhuaso jala marhagogoon situtu do Jesus.

Halak naung manjalo Tondi ni Debata mian dibagasan dirina, tarida do i sian haoloonna mangulahon hata ni Debata, tarlumobi ma na olo mangalo pangunjunan na ro sian sibolis. Tahi ni sibolis i ma padaohon hita sian Debata. Dipatupa ma ragam usaha na mamboan hita masuk tu pangunjunan. Alai molo halak naung manjalo Tondi ni Debata, na so tolap si bolis i laho mangago ibana. Ndang diihuthon tahi ni sibolis, manang songon dia parsorion na masa di ngoluna. Songon Jesus na so mangan dohot na so minum, dihalongonan i, alai margogo do Ibana ala naung mian di bagasan Ibana Tondi i.

(3) Ala nunga tardidi Jesus, jala magogo manaluhon huaso ni sibolis nanaeng mangago Ibana, nunga jumpang be tingki ni Jesus. Ditambah muse sada peristiwa na terjadi di tingki, ia si Johannes Pandidi nunga ditangkup si Herodes jala dihurunghon. Sebagai “perintis”, nunga sidung ulaonna jala Jesus ma na marulaon. Dos tu halak na lomba lari estafet. Sian sada pelari tu pelari na asing, adong do pertukaran tongkat estafet. Sian Johannes Pandidi tu Jesus Kritus. Sian na mamungka dalan sahat tu na ro Mesias i. Naeng ma barita hamubaon ni roha i ndang so di kalangan na matua, alai ditorushon tu angka naumposo asa tongtong marsaringar hata ni Debata di portibi on. Tondi ni Debata i ndang gabe holan mian dibagasan gereja, alai tabagihon tu sude halak naporsea.

Parjolo sahali Jesus memulai ulaonna jala udutna mamillit angka siseanNa, dimulai di luat Galilea. Dison ma Ibana mamulai Jamitana tu pangisi ni luat i, asa paubahon roha ai nunga songgop harajaon ni Debata di nasida.  Halak naung manjalo Tondi ni Debata, ndang holan tarida di pangalahona na olo manundalhon dosa, tarlumobi ma na olo mamaritahon tu halak barita haluaon, asa marhamubaon. Tondi ni Debata i dilehon tu hita asa bagihononta tu donganta humaliang. Hamubaon ni roha, gabe tema ni angka Injil na dipasahat tu hita. Marhamubaon manang bertobat ima unok/inti ngolu na porsea. Marhamubaon ima na manadinghon pangalaho na leleng gabe jolma naimbaru. Di hata asli na didok metanoia ima berubah 180 derajat, lapatanna ndada holan bergeser alai berbalik sian jolma na leleng tu jolma naimbaru. Molo hata jawa na didok ma “KAPOK” lapatanna ndang niulaon be angka na leleng i siala mambahen sega.

Pesan na sederhana alai tung maol do hita mangulahon. Ra, maol taulahon ala na so porsea i do hita di Barita Nauli i. Apalagi di jaman saonari on, di partingkian na mamboan godang perobahan. Jotjot do perobahan i mangarahon hita gabe dao sian Debata. Pesan asa marhamubaon, gabe sada barita na porlu tapasahat tu humaliangta, tarlumobi di naung songgop harajaon ni Debata ditongatonganta. Naeng marhamubaon ma hita sian haporseaonta tu barita nauli. Amen