Tangiang
Zamanta nuaeng digoari do jaman informasi teknologi. Molo masihol iba tu
sasahalak ndang pola be maol melepas rindu, cukup nama pake telepon manang hp,
jala boi do nuaeng on gabe mamereng boi huhut manghatai. Alai kecanggihan portibi
nuaeng gabe ngolu on pe lam mahal ma. Holan berkomunikasi pe halak nuaeng on
nunga ingkon sabulan i habis satonga juta jala lobi. Adong ma manuhori angka
hp, ipad, bayar pulsa, dohot internet. Hape adong do alat komunikasi nuaeng on
na murah meriah, ndang hea tulalit, ndang hea dialusi operator ima si veronica, alai songon malas do halak
mangulaonsa, ima na didok Tangiang.
Tangiang ima alat komunikasinta tu Debata. Tangiang didok do songon hosa
hangoluan angka na porsea. Alani molo mansohot hita martangiang dos do i naung
mansohot hita marparsaoran dohot Debata, jala mate ma haporseaonta.Di tingki na
jolo tarlumobi di Padan na robi, boi do sasahalak i pajumpang dohot Debata marsiadopan
boi songon si Musa, angka panurirang, alai di jaman nuaeng on dibahen do tu
hita Tangiang laho manghatai dohot Debata. Alani molo naeng pajumpang hita
dohot Debata ima dibagasan tangiangta be. Adong do tangiang pribadi, adong do
tangiang bersama-sama, tangiang pangodianon dohot angka na asing. Jala boi do
hita di segala tempat martangiang ndang hea dibatasi tempat/inganan dohot
tingki. (songon donganta ugamo na asing,
ingkon di sada inganan jala adong tingkina)
Songoni do si Daud dison dipasahat
do dirina martangiang di angka pergumulan ngoluna na mansai borat i. Dipasahat
ibana do hoi-hoina tu Debata. Nunga mangulaon dosa ibana, alani ro do ibana
dibagasan haserepon mangido tu Debata asa unang uhumon ni Debata ibana. Di
tingki na dipasahat i pintor sonang do panghilaanna ala diboto ibana dialusi
Debata do tangiangna. Nang pe dina mangulaon dosa i ibana gabe mate anakna na
parjolo sian si Betsyeba.
Tangiang ndada ingkon na tapangido i dialusi Debata. Ai boi do Debata
mangalusi marhite cara na asing. Ido alana di tingki martangiang hita : unang
ma ingkon lomonta na saut alai ingkon lomo ni roha ni Debata do.(Matius 26
:39). Adong do tolu alus ni Debata di angka tangiangta. Na parjolo ima didok : Olo. Molo nunga dialusi Debata olo
berarti sahombar do natapangido i dohot Debata. Alai adong do didok alus ni
tangiang marhite na paduahon : NDANG.
Molo didok ndang, ndada marlapatan na so holong roha ni Debata tu hita. Alai
boi do tapangido i ndang pas di Debata, jala molo dilehon i olo gabe lam susah
hita manang gabe tubu ginjang ni rohanta. Ai godang do hita maol membedahon dia
ma Kepentingan dohot kebutuhan. (Want dohot Need), anggo kepentingan do manang
angka na ringkot godang do hita on. Sipata olo nama sude gabe ringkot, alai
belum tentu gabe kebutuhan i.
Jala na asing molo dialusi Debata ndang ingkon porsea do hita adong alus na
dumenggan sian na tapangido i. Hea do sada keluarga sai martangiang asa monang
gellengna tu PNS, alai torus do talu. Dung melamar anaknai tu swasta monang do.
Alai songon maol tarjolo keluarga i. Siala dihaporseai molo PNS terjamin ma
masa depan. Hape lam leleng la nangkok ma pangkat gelleng na on. Di tingki
marsahit omakna i pintor diboan do tu luar negeri. Disi ma disadari inanta i,
aut PNS hian anakna belum tentu boi ibana marubat tu luar negeri. Napatoluhon,
adong do alus ni Debata ima na didokna Paima/Paite.
Disi diuji di hasabaranto, habengeton ni rohanta. Unang pintor mandele apalagi
putus asa.
Songon na hudok nangkin sude do tangiang dialusi Debata, alai ingkon hombar
do tu Ibana. Alani ingkon do torus hita hot di tangiangnta unang
marsangombas,apalagi mangido holan di tingki ringkot na. (patudos sahalak inan
na mangido, hape alani lojana na sai mangido i gabe mandele laos mansohot
tangiangna; gabe dibuat muse na naeng silehon ni Debata tu Ibana). Tangiang ima
songon pos ni roha di angka sihirimon. Tangiang ima haporseaon. Alani tangiang
pe ingkon pos ni roha do di angka sihirimon jala bukti na so pola tarida di
ngolu on.
Alani i manang songon dia
pe parsorion ni ngolunta, baik las ni roha dohot arsak ni roha masuk ma ho tu
bilut ni jabum, jala manghatai ma ho dohot Debata dibagasan tangiangmu. Unang
ma mabiar siala ndang malo hita martangiang tu Debata, justru Debata marnida
rohanta na olo manghatai dohot Ibana ndada alani hebat tangiangta manang
sempurna. Ndada holan isi nai naeng diida Debata alai rohanta na ungkap ido
laho marsomba tu Ibana. Ido umbahen pe didok di Jakobus 5 :16 “margogo situtu
do tangiang angka partigor molo dihaburjuon”, ndang didok disi tangiang na
tigor, alai tangiang angka partigor. Lapatanna ingkon tigor do rohanta jala
halak na sai martangiang ngoluna lam tu dengganna do pangalahona.
Ai ndang tingkos i molo
sai tadok halak na sai jotjot hita martangiang alai rohanta, pingkiranta,
manang ngolunta dibagasan haholomon dope. Ai tontu molo naeng pajumpang dohot
Debata hita pasti do ingkon tapaserep rohanta, tapaunduk, laos tapaias
ngolunta. Songon dia ma sahalak naeng manghatai dohot Presiden umpamana. Ndang
boi lomo-lomo dohot sembarangan tusi. Ima tapatudos molo manghatai hita ima na
martangiang i tu adopan ni Debata. Na mansai ringkot di Debata di angka tangiangta
ingkon do dibagasan roha na serep, ias, jala haporseaon na togu. Unang sai masa
dung simpul martangiang hape sai tubu dope keraguan di rohanta.
Matius 7:7
tangkas do didok Pangido hamu ma, sai na lehononna do tu hamu; lului hamu ma,
sai na jumpangan do hamu; tuktuhi hamu ma, sai na ungkaponna do di hamu! Amen
Tidak ada komentar:
Posting Komentar