Bangkona
do di ngolu on molo lam balga huria, punguan, keluarga boi do masa angka
parsalisihan manang parbadaan. Gariada sipata boi do mambahen parpocahan? Boasa
boi songoni? Ai pasti do marasing-asing angka pikiran, pandohan, nang pangidoan
ni jolma di bagasan punguan i; jala naumborat ima molo sai merasa gabe sisuan
bulu (na merasa humebat). Lapatanna gabe merasa ibana do na mambuka punguan,
“molo ndang alani iba ndang manjadi punguan i” ninna sisuan bulu i. On ma
sikap-sikap ni jolma na sai tubu di roha pardagingon. Roha pardagingon ima sai
tubu angka ginjang ni roha, angka teal, elat dohot late?
Ido
na pinatuduhon dibagasan turpuk on. Dung lam balga huria ni Korint gabe tubu ma
parsalisian di tonga-tonga ni huria i. Gabe tarbagi do ruas i na mandok adong
sian sisean ni Apollos, jala adong muse na mandok sisean ni si-Paulus, jala
diturpuk na asing mandok sisean ni Kefas dohot sisean ni Jesus. Laos dipatuduhon nasida be ma angka kehebatan
nasida. Hape ro do si Paulus mandok : dos do i sudena. “Ahu do manuan, Apollos
do pabornokhon; alai Debata do patubuhon”. Dilehon si-Paulus do pencerahan tu
huria i ai sada do ruas ni huria i dibagasan Kristus. Digombarhon do ia huria i
songon ruas ni pamatang ima na adong simajojak, tangan, simajujung dohot angka
na asing alai sada do dibagasan ima daging.
Ndang
adong jolma na sarupa di portibion, gariada na kembar siam sekalipun adong do
parasinganna. Alani di ngolu on, adong be do halobihanna dohot hahuranganna. Na
unik dibahen Debata ngolunta on, adong do halobihonta ndang adong di jolma na
asing, alai adong do halobihon ni halak ndang adong di hita. Tung ndang adong
gunana sai patubuhon angka hajagahon dohot hahebatan sasahalak jolma diportibi
on. Molo jolma do na menilai dirinta songon dia sasintongna, ai hak ni sasahalak
do i. Alai molo hita na patuduhon dirinta ingkon tapasiding ma, asa unang tubu
dibagasan haginjanghon ni roha.
Sai
berusaha do si-Paulus laho padengganhon angka roha nasida. Tajom do hata ni
si-Paulus tu angka na sai olo pabolah-bolah huria i. “Sandok songon roha pardaging do i jala posoposo dibagasan Kristus”,
“susu do hupainumhon tu hamu, ndada sipanganon hian, ai ndang tarjolo hamu uju
i” Molo didok si Paulus parroha daging dohot na holan painumhon susu” ima
gombaran halak kristen na so berkembang, ndang bertumbuh; alai holan songon
posoposo dope. Hape nunga leleng nasida na gabe kristen i, alai sai songon na
so kristen dope berengon. Di buku Heber didok do :”Ai tumimbangkon lelengna i, nunga patut guru hamu nian, hape angka
sisiasia ni hata ni Debata dope siajarhononhon tu hamu; gabe susu nama ringkot
di hau, ndada sipanganon hian” (Heber 5:12). Boi do masa si songoni “dipake
baju polisi manang tentara hape ndada polisi i manang tentara”. Ima na digoari
si nuaeng on ASPAL = Asli tapi palsu. Jala porsea ma hita godang do nuaeng on
halak kristen si songoni. Berengon do badia, cara pardalanan pe songon pandita
hian hape anggo rohana marasing situtu do. Ido alana Jesus pe hea do mandok tu
angka siseanna : jaga ma hamu (manat ma hamu) ai boi do mamake rupa birubiru
alai rohana songon babiat panoro.
Nang
pe sai adong pangalaho jolma si songoni, ndada gabe musuhon manang pasidinghon.
Alai ingkon boi do diarahon, dipatingkos asa ditanda dalan mulak tu
hadengganon. Adong do dengganna jolma si songon i asa adong parsiajaran, cermin
hidup, jala patorashon haporseaon. Ai molo mampu hita mamboan halak tu dalan na
denggan tontu naung tangkas ma hita parhaporseaon na matoras. Ndang gabe mulak
tu roha ni dakdanak. Halak na sai marnida jolma na asing songon musuh manang
alona, tontu ndang sahat dope ibana dibagasan haporseaon na matoras.
Di
ngolu on ndang adong na hot alai sai marhusor do. Jala di sada-sada tingki sai
adong do momentum na be. Isarani adong do na mambuka huria, adong do na
pagodang-godanghon, adong do na membangun. Jala sude marguna do i. Adong be do
andil (perananna). Ai so boi membangun molo ndang adong na mambuka. Songoni do
di ngolunta on, di tingki natorasta pogos, alai dung sahat tu hita ianakhonna
gabe lam mamora, jala di angka ianakhonta lam tamba mamora, jala olo muse
madabu. Alani ndang adong gunana sai patubuhon hajagaon, hahebaton di ngolu on.
Alai ingkon lam rajumonta do na sian Debata do i, jala na dipasahat Debata do
tu hita. Anggo ndang dipasahat Debata i ndang boi bahenonta manang aha.
Hamu angka dongan
Taingot ma manang songon dia pe
jolma i tong do di sada tingki ingkon tabutuhon nasida. Sapogos-pogos ni jolma,
manang salea-lea ni jolma pasti do di sada tingki taporluhon nasida. Isarani
tukang kobun, sai tapangido do nasida padengganhon perkarangan ni jabunta;
songoni na mamboan angka sampah di jabunta, anggo ndang adong nasida pasti do
bau nama jabunta. Ido umbahen didok sahalak filsuf na margoar Aristoteles “Zoon
politicon” manusia mahluk sosial. Gariada di film na tatonton isarani film
Tarzan, porlu do si-Tarzan bersosialisasi tu angka binatang na di hutan i. Gari
Debata dihaporluhon do hita laho manguduti ulaonNa di hasiangan on.
Tanda
naung dihamonanghon hita marhite peristiwa paskah (haheheon ni kristus) ingkon
gabe jolma naimbaru do hita. Ingkon tasalpuhon do pangalaho na buruk i. Ndada
sai mian hita di ngolu na leleng alai ingkon munsat do tu haimbaruon ni ngolu.
Angka na mian dibagasan na buruk ima na so di ibana dope paskah (haheheon ni
Jesus i). Amen
Tidak ada komentar:
Posting Komentar