Matius 7 : 7 - 11

Pangido ma jala alusan-Na do ho

Patujolo

Turpukta on masuk do tu horong Matius 5 – 7, na didok Jamita di dolok (Khotbah di Bukit). Jamita di Dolok ima angka poda manang pangajarion na dipasahat Tuhan Jesus taringot tu Harajaon ni Debata.  Boi dohonon, Jamita Dolok ima unok (inti) di sude poda dohot pangajarion ni Tuhan Jesus. Sada sian poda manang pangajarion Jesus na mansai penting dibagasan Jamita di Dolok ima turpuk on, na manaringoti Tangiang.  Nian nunga adong andorang so turpuk on ditaringoti Jesus songon dia martangiang na denggan ima di Tangiang Ale Amanami (Matius 6: 9 -13). Tontu adong do maksudna diulakhon muse taringot tangiang i dibagasn turpuk on, ima asa diulaon do jala dihangoluhon. Tangiang ima hosa hangoluon angka na porsea (doa adalah nafas iman).

Hatorangan ni Turpuk

1. Tangiang ima parenta

Hata “pangido, lului, tuktuhi” (ay.7) porlu do tangkas pamanathonta. Ai ndada holan maksudna asa tabo sidohonon. Sahalak na margoar Richard Glover mandok songon majas (umpama) do i. Digombarhon ibana songon dakdanak tu natorasna, molo jonok dohot tarida dipangido, alai dung ndang tarida dilului, jala molo di jabu dituktuhi. Nian ndang taboto tingkos manang ndang perbandingan i alai boi do tarjalosa. Na pasti hata na tolu on ima bentuk kata kerja imperatif, marlapatan ingkon do diulaon torus (tekun),  ima ulaon na niulaon na manongtong, ndada sagombas-gombas manang sahali dua hali. Ima songon ojahan laho martangiang. Jala naeng patuduhon marhite hata i taringot tu parsitutuanta di Tuhan i. Lapatanna disi, ingkon do hita manongtong mangido tu Debata manang aha pe na masa di ngolunta, nang arsak, las ni roha dohot angka na asing i. Mangido ingkon do dibagasan haserepon ni roha. Songon dia ma sahalak na mangido tu halak na asing. Ndang mungkin lehonon halak na naeng mangalehon i molo dibagasan ginjang ni roha halak na mangido. Jala na paduahon, porlu do botoon angka dia ma sipangidoan. Ai ingkon bedaononta do dia angka kepentingan dohot kebutuhan (want dohot need). Lapatanna boi do godang kepentingan (na ringkot di ngolu) alai ndang gabe apala kebutuhan di ngolu on. Isarani, adong adong do sada remaja mangido motor, nian penting do i di ibana asa boi tu sikolana marmotor, alai ndang gabe kebutuhanna dope i. Ai boi dope ibana marangkot ai so pola dao dope sikola na. Molo tapamanat di tangiang Ale Amanami (Matius 6 :9-13) tangkas do tabereng disi taringot kebutuhan ndada keinginan. Didok “lehon ma tu hami sipanganon nami sadari on”.

2. Tangiang ima marisihon mangido, mangalului dohot manuktuhi

a. Mangido

Tangiang ima mangido. Nang pe taboto Debata ima Omni Scientia (Maha Tahu) alai ringkot do ingkon pabotohon dia ma sipangidoan ni rohanta tu Ibana.  Boi do tubu sungkun-sungkun dison ima boasa ingkon mangido hita, nda diboto Debata saluhutna na adong di ngolunta on? Tingkos do diboto Debata saluhutna na adong di ngolunta dohot na adong dibagasan pikiranta, alai mangido ima patuduhon na pos rohanta tu Debata. Pdt. Raprap mandok di sada buku, beda do “Percaya dengan Mempercayakan”. Molo tadok hita porsea tu Debata, sibolis ipe boi do mandok songoni; alai sibolis ndang Mempercayakan na di Ibana tu Debata, ido parasingonna. Artina molo mangido hita berarti ndang holan porsea hita tu Debata, alai naeng hita percayakan dirinta on tu Debata, asa connect hubunganna. Sarupa do molo martelepon hita tu halak hape ndang connect kabelna manang signalna tontu ndang boi hita tersambung tu halak na naeng sihubungonta. Jala molo mangido pe hita ima asa adong do pertimbangan sian Debata, dia ma na ingkon sipasahatonna tu hita. Tontu ndada ingkon lomonta na ingkon saut alai ingkon lomo ni roha Debata do.

b. Lului

Tangiang ndada holan na mangido alai ingkon dohot do mangalului. Mangalului ima patuduhon na ingkon aktif do hita mangula dohot marsitutu di ngolu on. Ido umbahen didok Marthin Luther Ora et Labora (berdoa dan bekerja) dohot na didok laborare et orare (bekerjalah dan berdoa). Sadalan do mangido dohot mangula manang mangalului. Toho do boi Debata patupahon saluhutna na adong di ngolunta on, alai asa unang gabe tubu dibagasan pingkiranta tumagon do holan mangido ndang pola dohot mangula.

Di tradisi ni Padan Nairobi pe tangkas do didok hata mangalului. Jala sai didok do asa tongtong hita mangalului Debata tarlumobi disi dope rohana (Jesaya 55,6; Amos 5 :4; Matius 6:33). Halak na sai marsitutu mangalului ingkon dapotan do las ni roha. Mangalului ingkon dohot dibagasan roha na sintong. Molo tabereng di Jakobus 5 :16 “na margogo situtu do tangiang angka partigor, molo dihaburjuhon”. Ndang didok disi tangiang na tigor, alai tangiang angka partigor. Lapatanna ndang boi sude sempurna angka tangiang nang pe ringkot tangiang na sempurna i. Songon jolma hita sipata ndang mampu martangiang na sempurna, alai na ingkon di ngolunta ima gabe jolma na tigor. Asa dialusi Debata tangiangta ingkon do gabe jolma na tigor hita. Sasintongna ndang adong tangiang na salah, na salah ima motif ni rohanta na martangiang i. Martangiang do hita alai sai tubu dope roha-roha na so denggan. (pat.Yak.4:1-2)

c. Tuktuhi

Tuktuhi marlapatan tangiang ingkon dibagasan na tekun marsitutu do hita. Jala ingkon sahat do hita manuktuhi pintu i. Ai sipata halak na dibagasan jabu i ndang mambege, jala lagi tarpodom, manang gabe jolma na acuh tak acuh (tak peduli), alani i porlu do taktuhi. Toho do molo sae manuktuhi gabe diburai hita, gabe diusir sian jabu i. Alai taingot ma na masa di sada ina na mangido hak na tu sahalak panguhum, sai dijugulhon mangido tu panguhum na geduk i (na jahat). Ujungna gabe dialusi do nang pe dibagasan jut rohana. Didok ibana: “alai hupintori nama na mabalu on, ala dinengnengi ahu, atik beha ro ibana maon muse manggariangi ahu.(Lukas 18:5)

Manuktuhi ndada na dibagasan tingki i ingkon Alai ingkon marhite na parjolo ingkon dibuka do pintu on asa masuk hita tubagasan. Ai molo masuk songoni hita ndang tatuktuk pintu i didok do hita panangko. Manuktuhi ndada sadari i i nama uloanta, alai molo ndang boi sadarion, tu marsogot, alai ndang boi sogot, tu aduan. Ingkon tekun do mangula ulaon i asa ipe jumpangan angka sipangidoan i.

Mangalului dohot Manuktuhi pe marlapatan ndang boi holan by pass ngolu on. Lapatanna doa ndada songon sulap (sim salabim) pintor jadi. Alai ingkon do tapeakhon denggan, parjolo pangido dungi lului, jala tuktuhi muse.

3. Tangiang ima Pos ni roha di angka sihirimon

Tangiang ima ingkon dibagasan pos ni roha di angka sihirimon. Ndada saluhutna tangiang ingkon dialusi. Ido umbahen adong do halak mandok tolu alus ni Debata di angka tangiangta i ima : Olo, Ndang, Paite/paima. Alani ingkon mampu do hita marnida na tolu alus i dibagasan ngolunta on. Molo na Olo do alus ni Debata berarti na patut ma hita manjalo hombar pangidoanta i, alai molo didok Ibana “Ndang” tontu ndang dope i alus sipangidoanta sian Ibana, alai adong do alus na asing jala na dumenggan sian na tapangido i. Dungi Debata pe olo do mandokhon “paite/paima” asa sabar hita dibagasan pangidoanta i.

Saluhutna tangiang dialusi Debata do alai hombar sian Ibana do ndada ingkon lomo ni rohanta.  Ido umbahen didok Jesus dibagasan turpuk on,” Ai ise sian hamu jolma, na mangalehon batu tu anakna, molo indahan dipangido? (ay.9), manang na olo mangalehon ulok, molo dengke dipangido?(ay.10) ido umbahen diujungi Jesus do hataNa, gari hamu angka parjahat umboto mangalehon basabasa na denggan tu anakkonmuna, lam Amamuna na di banua ginjang i ma so lehononna arta na denggan di na mangido tu Ibana? (ay.11). Gombaran di ayat 9 i patuduhon songon ima jahatna jolma i, hape jolma na jahat i pe tung denggan do dilehon tu anakna. Ai di Israel indahan ima roti, jala batu na adong disan boi mirip tu roti, songoni nang dengke na ganjang boi tumiru rupa ni ulok. Hape didok Jesus taringot tu pangalaho si songoni mampu dope mambahen na denggan, lam Aman na di Banua Ginjang ima. Alani unang adong sian hita on mabiar mangido, mangalului, dohot manuktuhi. Ingkon lehonon ni Debata do i di tingkina. Ai ndada hea marsangkap na roa Debata, tung sangkap na denggan do bahenonna tu hita tarlumobi angka na sai marsitutu diadopan ni Debata (pat.Jeremia 29:11).

Sipahushusoran

1.        Tangiang ima hosa ngolu angka na porsea. Molo didok hosa berarti na tung mansai ringkot do i. Ai molo nunga so jolma marhosa ndang adon be hangoluan disi. Alani molo nunga so hita martangiang berarti na so ma parsaoranta dohot Debata jala doshon naung mate ma haporseaonta disi. Alani ingkon do torus hita martangiang, ndang adong didok piga hali, di tingki andingan, alai sandok terus menerus songon na marhosa i.

2.        Godang do halak kristen mabiar martangiang siala ndang malo, ndang dialusi dohot angka alasan na asing. Alani tangiang ndang ndang persoalan malo manang na so malo alai rohanta do naeng mangido tu Debata. Taingot ma cerita anekdot dakdanak na martangiang i. Ima na naeng diharat binatang dakdanak i, alai martangiang ibana  mandok : metmet ahu on bahen ias rohangkon, sasada do Jesus donganhu tongtong.. dungi laho do binatang.  Jala tangiang ndada ndang dialusi Debata. Dialusi do angka tangiangta alai ingkon saguru ni Debata do. Unang marguru tu rohangku, rohaM do (Mat.26:39)

Daftar acuan

(Stott Jhon, Khotbah di Bukit; J.J.de Heer, Tafsiran Alkitab Injil Matius; Andar Ismail, Selamat Pagi Tuhan; Raprap, Kalau Tuhan tahu ngapain kita minta)