Yohanes 15 : 1 – 8

Tinggalah di dalam Kristus

Manang piga hali sai digoari Jesus do diriNa marhite angka personifikasi na adong di portibion. Adong ma i marhite angka suan-suanan, didok ma songon na adong di turpuk on “Ahu do hau anggur na tutu” (Joh.15:1), adong ma muse marhite angka ulaon, didok ma “Ahu do parmahan na denggan...” dohot marhite benda na asing, didok ma “ahu do roti hangoluan manang aek hangoluan”. Lapatanna disi ima laho pabotohon ia Jesus boi do manghamham saluhut na adong na masa di portibion, dohot asa jonok do Jesus di ngolu ni angka siseanNa nang hita saluhutna.

Ahu anggur ndang na asing i di parngoluon halak Israel. Marhite bona ni anggur on boi do patudushon Jesus piga-piga na mansai ringkot di ngolu on.

1.         Marparbue

Ahu anggur ndada cukup holan tubu songoni, alai dihirim do sian ahu  anggur marparbue. Molo ndang marparbue tontu ndang marguna be ahu anggur i. Anggur na marparbue dihirim do sian i parbue na denggan jala tonggi. Nian adong do parbue ni anggur na asom alai humlomo do roha jolma mangalului parbue ni anggur na tonggi.

Halak kristen ndada holan mangolu songoni sambing ima ngolu na manoton, ngolu na rutin ndang adong siaraphon sian hita. Apalagi molo manusai do manang gabe mambahen sampah tontu ingkon sibolongkon do ahu i. Halak Kristen dipadiri Debata di portibi on asa marparbue do, jala parbuena ingkon do tonggi. Molo marparbue ahu anggur i denggan, pasti do mambahen las roha ni nampuna porlak anggur i. Marhite i denggan ma dirawat ahu anggur i, jala ditambor-tambori asa lam godang muse parbuena.

2.         Ngolu na dinamis ndang statis

Molo tabereng ahu anggur asing do sian angka ahu na asing. Molo ahu anggur, sada do bonana alai rarat ma angka rantingna manang tudia, jala laos di ranting ido parbuena. Sian i boi do berengonta ia halak kristen ndada holan mian manang tinggal di ingananta manang di jabunta, alai ingkon borhat do manang tudia jala laos disi tapatuduhon parbuenta. Halak kristen ingkon boi do dihilala jolma manang tudia hita mangalangka. Ai molo halak kristen holan tu dirina manang holan tu bagasan kelompokna tung marisuang do i. Lapatanna, ndang ditanda ise hita, jala ndang be boi hita mamboan jolma na asing i asa mananda Kristus na tahaporseai

3.         Tinggal dibagasan bonana

Ai ndang boi marparbue ranting i molo malua sian bonana (batangna). Sian batangna i do disalurhon sipanganon, inumanna manang angka na asing dope. Ido alana didok Jesus : “ndang tarula hamu agia aha molo so mardonganhon ahu”. Lapatanna : ngolu hakristenonta ingkon do tinggal di bagasan Kristus. Ai Kristus do pasahaton tu hita hagogoon, habaranion, dohot enerji sorgawi asa tarbahen hita mangulaon angka na denggan. Tung maol do niaraphon angka na denggan molo ndang mian hita dibagasan Kristus. Toho do niang, angka na so parugamo i boi do mambahen angka na denggan, alai godang ma dihorhon roha na marsipambuatan, “molo hubahen na denggan tontu jaloonku ma na denggan, alai molo dibahen na roa jaloonku ma na roa” on ma didok hukum sebab-akibat. Halak kristen ndada nionjar siala nii. Angka ulaon na denggan embriona (asal muasalna) sian naung tinggal do hita dibagasan Kristus i. Ai Tondi ni Debata do na sai mangajari hita dia ma angka siulaon dohot dia ma sipasidinghon.

4.         Ndada ahu be na mangolu alai Kristus do na mangolu di ahu

Ranting ndada boi tarsirang sian batangna, alai ranting ndang ibana na mangolu disi alai batangna do. Kuncina di batangna i do (ima bonanai), anggo so adong i ndang tarbahen ranting i manang aha. Alani ingkon dohonon ranting i do, ndang ahu be na mangolu di diringku alai bona ido. Lapatanna disi, ai mangolu pe hita nuaeng sasintongna ndang diringku manang dirinta be na mangolu disi, alai nampuna ngolunta do. Ise ma nampuna ngolunta on tontu Debata do. Ai nunga sasintongna mate hita alani dosanta i, alai ro ma Tuhan i mangalehon tobus marhite Jesus Kristus. Ido umbahen gabe tajalo upah hangoluan naimbaru marhite asi ni roha na sian Kristus. Alani i, ndang adong be na sai tapangasahon ngolunta di portibi on, ndang adong na tahaginjanghon. Molo adong dope na sai mangulaon dosa, jala sai marginjang ni roha di ngoluon tontu na so ditanda ibana do ise diriNa jala lupa di pambahenan ni Debata di ngoluna. Ngeri do molo nunga adong sai lupa di hita ima na didok insomania jala naumborat ima sahit Alzheimer, pasti godang hasusaan di ngoluna, apalagi molo lupa dipambahenan ni Debata di ngoluna.

Marhite turpuk on nunga tabereng adong do dua tipe jolma di portibion ima tipe na sai holan hata alai minus parulaon, dohot tipe saotik manghatai alai tarida sian pambahenan. Tontu na diaraphon sian hita unang NATO (Not action talk only) alai ingkon AFTA ma (Action First Talk After).  Kita harus meniru penyu (kura-kura) masuk ke darat lalu bertelur banyak dan dia tidak perlu ribut apa yang sudah diberikannya. Beda dengan ayam yang bertelur dan telurnya satu tetapi satu RW sudah ribut dengan suaranya kotekkotekkotek. Surat Jakobus pe tangkas do mandok : ai haporseaon tanpa parulaon dos na mate do i, manang sia-sia. Tontu ndang olo hita gabe jolma na mate (mangolu do nian alai mate di angka parulaon) manang gabe jolma sia-sia. Alai ingkon do hita torus marparbue jala parbuentai boi dinikmati jolma di portibi on. Amen