Pangunjunan
mangihuthon Jesus
Hea do disungkun tu angka ruas ni huria HKBP, beha do
Amang/inang tabo do na gabe halak Kristen? Marragam do alus nasida taringot
tusi. Adong do mandok : Tabo do Amang? Adong do muse mandok ndang tabo? Laos
adong do na so mangalusi manang aha?. Dungi disungkun ma muse, Boasa didok hamu
tabo? Siala godang pasupasu na hujalo ninna. Na mandok ndang tabo, dialusi ma
boasa ndang tabo? Ima siala godang pangunjunan na gabe halak kristen. Dia do
sintongna alus i???
Dungkon masa hasasaor ni Tondi Porbadia di Jerusalem ima di
ari Pentakosta gabe tardidi ma 3000 halak , laos mulai sian i martambah ma
angka halak kristen. Alai di las ni roha na martambah bilangan angka halak
kristen, alai adong do na terganggu rohana manang gabe ndang las rohana, ima
angka halak Jahudi, halak Rom, dohot tarlumobi si-bolis i. Mulai ma ditangkupi angka halak kristen,
dihurung jala laos godang do na mate.
Alai nang pe godang na ditangkup jala dipamate, ndada
mambahen lam moru bilangan ni angka halak kristen i. Laos sebalikna do na
terjadi ima na gabe martamba-tamba bilangan ni angka halak kristen na
mangihuthon Kristus. Aha do mambahen i? Tontu ndada ulaon ni jolma i alai tung
ulaon ni Debata do. “Mudar ni mate martir ido gabe boni ni huria”. Na asing ima boasa sai marsitutu angka halak
kristen i nang pe sai ditangkup tung do holan ala diboto angka halak kristen i
ise ingkon siihuthon nasida ima Jesus Kristus
Hamu angka dongan
Alani sai martamba bilangan ni angka halak kristen di tingki
i gabe dipajongjong ma angka na manguluon nasida. Dipabangkit ma songon diakon
ima na manghobasi ulaon parasirohaon mangurupi angka na pogos, na lea, angka na
mabalu, na so marama dohot marina. Ido alana dipajongjong ma 7 halak na niuluon
Stefanus manghobasi nasida. Alai nang pe ulaon parasirohaan do diula nasida,
mangurupi angka na pogos dohot na lea, alai ndang malua nasida sian ancaman,
sian angka sangkap na jahat sian panggomgomi. Gabe ditangkup do nasida jala
dipajongjong di jolo Paruhum (Mahkamah Agama) na so tingkos, ai nunga disogok
asa pajongjonghon paruhuman na so adil.
Na menarik sian turpuk on, nang pe dibagasan ancaman (di
ujung tanduk) ngolu ni Stefanus alai ndada sumurut rohana laho pajongjonghon
Kristus i. Gariada lam bersemangat (berkobar-kobar/berapi-api) semangatna
pajongjonghon HaporseaonNa. Aut sugari hita mangadopi sisongon on tontu godang
nama hita na mandele, na marbalik dohot angka na asing ate. Boasa boi songon i
siala ndang dope adong haporseaonta songon si Stefanus i. Gariada patuduhon
holan halak kristen pe hita nuaeng nunga godang na maila, manang paila-ilahon. Ujungna didangur ma Stefanus marhite batu laos
mate ma ibana di tingki i. Di ujung ngoluna ndada hea haluar sian pamanganna
mandok “Baloshon Tuhan i nasida” alai didok ibana do : Tuhan , janganlah
tanggungkan dosa ini kepada mereka”.
Mulak ma hita muse tu sungkun-sungkun na di ginjang nangkin,
tabo do na gabe halak kristen manang ndang? Molo marnida pangunjunan,
parungkilon dohot sitaonon pajongjonghon haporseaon di ngolu on, boi ma
dohononta ndang tabo gabe halak kristen. Alai molo tabereng upa dohot Debata na
magabing-abing ngolunta, jala ditanganNa do ngolunta, tontu tung tabo hian do
na gabe halak kristen i. Molo
pangunjunan, sitaonon, ndang pe gabe halak kristen hita ingkon mamolus do
mangadopi na masa i. Halak sipelebegu pe
tongtong do mangadopi si songoni, holan i molo nunga kristen hita marasing do
sitaonon dohot pangunjunan na tahadopi, ima pangunjunan alani Haporseaonta tu
Tuhan i. Jala tabereng ma ndang adong naummuli jaloonta sian jolma di hasiangan
on sian na naeng jaloonta sian Debata dohot sian nuaeng on. Alani naeng ma tongtong hita marsihohot
dibagasan Tuhan i, manang songon dia pe ngolunta. Olo do ra, godang parungkilon
dohot sitaononta nuaeng on, alai ingot ma ndang sadia i martimbanghon
sijaloonta nuaeng dohot sogot sian Debata.
Jala molo pe ingkon hansit rohanta dibahen halak unang ma tubu di
rohanta roha na naeng mambalos, hosom dohot angka na asing. Alai tapasahat ma
tu Debata, ai Debata ma manimbangi angka dia ma sibahenonNA. Amen
Tidak ada komentar:
Posting Komentar