Panandaon diri
Dibuhai do turpuk on
marhite joujou sahalak farise na margoar Simon tu Jesus asa mambongoti jabuna. Ndang
pola dipabotohon aha do alana umbahen diontang si Simon Jesus tu jabuna? Jala
boasa Jesus olo mambongoti jabu ni halak farise i? Na pasti molo niontang sasahalak ro tu jabu,
tontu na nionjar sian roha na denggan do i. Sar ma barita Jesus dina mambongoti
jabu ni si Simon di luat i, laos sahat ma barita i tu sahalak boruboru naung
ditanda torop jolma disi sahalak pardosa. Di tingki di bagasan jabu i nasida pintor
humalaput parompuan on mandapothon Jesus. Diboan do sada galas alabaster ima
miak na hushus laos disapuhon ma tu pat ni Jesus huhut tumatangis, dungi
diapusi ma marhite obukna. Marhite i marhusari ma roha si Simon halak farise.
Didok ma dibagasan rohana “na so ditanda Jesus do boruboru i”? Songon na so
tarjalo si Simon do na dibahen parompuan i tu Jesus . Tangkas do diboto nasida
ai ndada boi sarombang halak pardosa dohot na so pardosa. Hape diboto Jesus ma
aha na marhusari di roha halak farise i.
Laos dipabotohon Jesus ma marhite sada gombaran manang umpama.
Dipatorang
Jesus taringot dua halak na marutang. Sada ma i marutang 500 rupiah, nasada
nari marutang lima pulu. Gabe disesa ma duansa na marutang i, siala ndang boi
digarar nasida be. Laos disungkun Jesus ma :”Ai ise nasida tagamon na humolong
roha di ibana” (ay.42). Gabe dialusi si
Simon ma :”Parsibasabasaan na gumodang ido”?, ninna. Molo adong na boi mambahen na denggan jala
gumodang nda gabe hasian ibana disi? Jala laos didok Jesus ma na tingkos ma i.
Gabe didok Jesus ma songon ido na dibahen nampuna hutang i. Ido gombaran na
pinatuduhon ni Jesus tu si-Simon sahalak farise dohot parompuan pardosa i.
Doshon pardosa do nasida na dua,jala boi dohonon “pardosa na otik ra si-Simon,
jala pardosa na godang ma parompuan i”,
alai tung marasing situtu do na binahen ni nasida tu Jesus.
Molo
mangihuthon tradisi hajahudion, halak na ro martamue ingkon do pasangapon
nasida marhite : parjolo, diampehon tanganna tu abara ni tamue i jala diumma.
Paduahon, ditanggali sipatu ni tamue i jala dipeakhon tu lambung ni pintu,
dungi ro ma naposona paiashon pat ni tamue i marhite aek dohot kain lap.
Patoluhon, dilapui tamue i dohot miak na hushus. Ndang alani Jesus na ro
martamue tu inganan si-Simon ingkon bahenon sisongon i, alai tung sude jolma
do. Ido apala adat na dihasolmalhon nasida, hape sada pe ndang diulaon si-Simon
songon tradisi naung somal. Alai parompuan pardosa i dibahen do na patut tu
Jesus marhite miak jala diapusi marhite obukna. Hape dijou si-Simon do Jesus
“Guru”. Molo nunga dijouhon guru tontu ingkon patut ma nian bahenon tu guru i.
Ndang
adong pola ditaringoti dison taringot arga ni miak na niusehon boruboru i tu
pat ni Jesus, songon na masa dina diulaon si Maria di huta Betania tu Jesus. Alai
miak na arga do i na dipasahat parompuan i tu Jesus. Sian i boi do berengon
parsitutuon ni boruboru i laho mambahen na denggan tu Jesus marhite miak na
arga i, jala dibahen do i tu simajujung ndada tu simajojak. Ima patuduhon
haserepon ni roha parompuan i, ndang gabe ditengahon na dipasahat ibana tu
Jesus. Hape si- Simon ndang boi dope bahenonna songon i tu Jesus, alai sai
dilului do hahurangan ni boruboru i. Hira na so marlapatan do na niula boruboru
i tu Jesus siala status na adong di ibana. Di tonga-tonga ngolu halak Jahudi,
status on tung mansai ringkot situtu. Ai molo nunga dicap pardosa, jolma na
marsahit, na mabalu dianggap do i “sampah masyarakat”. Alani i ndang boi nasida
sauduran dohot angka jolma na asing i.
Diboto
parompuan ido songon status na adong di ibana. Sahalak pardosa do ibana ndang
tama ibana marsaor dohot jolma i. Alai haporseaon na mangolu sian parbagasan
rohana do na mangonjar asa dibahen ibana songon na masa di turpuk on. Berarti
diboto ibana do tangkas songon dia Jesus? Ndang sarupa songon toropan jolma
disi na sai mangondolhon status manang kasta ni jolma. Diboto ibana do Jesus na
gok asi ni roha jala na olo manjangkhon saluhut jolma i manang songon dia pe
status dohot pangalahona. Ai naeng
taruli ibana di hasesaan ni dosa umbahen dibaranihon laho pajumpang dohot Jesus
na ditanda ibana, jala na boi mangalehon hasesaan ni dosa. Pasti do diboto
ibana, aha na binahenna dibagasan turpuk on mambahen sogo (pangiburuon) di
angka jolma na torop i. Alai ndang i mambahen sumurut rohana laho mandapothon
Jesus. Roha biar, minder ndada pataluhon rohana sian na ringkot mangido
hasesaan ni dosa dohot asi ni roha sian Jesus.
Torop
do hita jolma di partingkian si nuaeng on, alani biar ni rohanta dihata-hata
jolma, biar ni rohanta mangadopi angka na masa gabe lupa hita adong do Debata
na sai tongtong manjanghon hita jala paherbanghon tanganNa laho manjalo hita.
Unang ma, soara-soara na ro sian sibolis manang jolma di portibi on na sai
maralo tu Debata gabe mambahen sundat rohanta (ngolunta) laho patupahon angka
na denggan jala na patut tu Debata. Apalagi nunga godang tawaran/ela-ela
portibi mambahen sundat rohanta laho pajumpang dohot Jesus. Marhite angka ulaon,
hobby, hagiot-hagiot ni daging mambahen rohanta tarhambat laho pajolohon dohot
na ummarga tu adopan ni Debata. Hape sai jotjot do tadok manang tabege hata ni
Debata na mandok :”Sai jumolo ma lului hamu Harajaon ni Debata dohot
hatigoranNa, dungi tambahononNa do sude angka ondeng tu hamuna” (Matius 6:33).
Torop
ra dope hita songon pangalaho si Simon on, ima na mangakuhon dirina sintong
jala mantengahon angka naung dibahen hape so sadia dope. Martimbanghon angka na
adong di ngoluna dohot na dijalo sian Debata ndang patut nian ibana mangalehon
dao songon na binahen ina na mabalu na pasahathon dua sen tu bagas joro i dohot
ina na di Sarfat i (1 Raja-raja 17 : 1 – 24). Dirajumi si-Simon do dirina
sidaroti patik, ndang mardosa, alani ndang ringkot ibana di hasesaan ni dosa.
Ndang dibahen na patut tu Jesus, alai dihilala ibana nunga tung tingkos na
niula ibana tu Jesus, hape so adong manang aha dope.
Gabe
didok Jesus ma tu jolma natorop i :”nunga sesa dosana na godang i”? Boasa Jesus
barani mandok songoni? Siala Debata ibana jala ingkon sian Ibana do boi
mandokhon i. Molo didok Jesus “nunga
sesa angka dosami” ndada parjolo nionjar pambahenan ni boruboru i, alai sian
haporseaonna mangolu tu Jesus. Marhite haporseaon ido gabe patubuhon rohana
manghahologi Jesus. Tatulak do marhite
pambahenan jolma manjalo hasesaan ni dosa (patudos Ef 2:8-9 Gal 2:16,21 Gal 3:1-14
Gal 5:1-6 Ro 3:24,27-28 Kis 15:1-21 Fil 3:9 Rom
9:30-10:3) Ai boi do jolma patupahon angka na denggan ndang alani porsea
tu Debata. On ma na didok panandaon diri. Na ditanda boruboru i do ise ibana?
Jala naeng mangido hasesaan ni dosa sian Jesus. Ido alana dibahen ibana na
patut tu Jesus jala huhut dibagasan na tariluilu nionjar panandaon na tangkas
di dirina marhite haporseaon tu Jesus.
Sungkun-sungkun
nuaeng di hita songon dia do motivasi di hita be na mangihuthon Jesus di
partingkian sinuaeng on? Mura nama jolma manjou Jesus, Tuhan manang Sipalua
alai intap didia do naung bahenonta tu Ibana? Songon adong pandohan na mandok : “You call Me the way but you do not
follow Me, You call Me the light but you do not see Me,
You call Me the teacher but you do not listen to Me, You
call Me the Lord but you do not serve Me, You
call Me the truth but you do not believe in Me, Do
not be surprised if one day I don’t know you”.
Terjemahannya: “Engkau menyebut Aku jalan, tetapi engkau tidak mengikut Aku, Engkau menyebut Aku terang,
tetapi engkau tidak melihat Aku, Engkau menyebut Aku guru, tetapi engkau tidak mendengarkan Aku, Engkau menyebut Aku Tuhan, tetapi
engkau tidak melayani Aku, Engkau menyebut Aku kebenaran, tetapi engkau tidak percaya kepadaKu, Jangan kaget, jika
suatu hari Aku tidak mengenal kamu”.
Naeng
ma tiruanta na binahen ni parompuan pardosa on. Nang pe sahalak pardosa ibana
ditanda do dirina jala ro do ibana mandapothon Jesus laho mangido hasesaan ni
dosa. Dibagasan ilu do ibana, dipaserep do rohana. Molo pe nunga godang tabahen
di ngolu on angka na denggan ndada dope
boi i paluahon hita sian dosanta. Ndang adong na humdenggan bahenonta tu
Debata, tung saluhutna do i ndang adong argana marhite pasupasu dohot asi ni
roha na tajolo sian Ibana. Tung marhite asi ni roha na sian Debata do jaloonta
i jala dibagasan haporseaon na mangolu tu Debata. Haporseaon ido mangonjar
ngolunta asa lam tu tama na hita mangolu diadopan ni Debata. Amen
Tidak ada komentar:
Posting Komentar