Ev. Psalmen 118 : 22 – 29 Ep. Ul. Ap. 4 : 5 – 12 Tema “GABE BATU PARSUHI”

Turpuk on masuk do tu horong Psalm Ende olopolop manang ende puji-pujian (doxology) siala hagogoon dohot pambahenan ni Debata tu bangso Na. Parpsalmen dison mandok mauliate tu Debata, siala manongtong do pangurupion na jinadihon Debata di pardalanan ngoluna. Nang pe sai dihaliangi ngoluna dibagasan godang angka pergumulan, biar jala tahuton, ndang mansohot ibana mangido pangurupion sian Debata. Jala tarida do, sai tinggil do sipareon ni Debata manangihon alu-alu ni bangsoNa, jala sai tarbuka do rohaNa laho manjangkhon naposoNa, ganjang do tanganNa laho mangurupi nasida. Hatorangan ni turpuk 1. Batu naung binolongkon ni angka pande bagas, molo di Padan Narobi ima manggombarhon bangso ni Debata manang sasahalak na so adong be artina, ndang marguna. Hape dijolo ni Debata batu na so marguna i ditompa gabe batu parsuhi ima batu na mansai ringkot, na utama jala na marguna. Molo didok batu parsuhi ima batu na dipake laho penentu di hajongjongan ni bangunan. Tontu dison, ndada alani gogo manang pambahenan ni jolma i gabe ringkot ibana alai na Debata do mangholomohon songon i. Pandohan on martudutudu do tu Tuhan Jesus di Padan Naimbaru. Naung ditulak halak Jahudi hian do Jesus sian tonga-tonga ngolu nasida, dibolongkon songon batu i hape dibahen Debata do IBANA gabe penentu di sejarah pardalanan ngolu ni jolma. Ai marhite Jesus, gabe tarbuka dalan tu hangoluan na manongtong di ganup jolma na olo porsea di Ibana (Joh.3:16). Alani ima di 1 Korint.3:11 didok :”Ai ndang tarpaulin ojahan na asing, dungkon ni naung ojak i, ima Jesus Kristus”. 2. Olopolop di Pambahenan ni Debata. “Ari on do jinadihon ni Jahowa marolopolop jala marlas ni roha ma hita disi”. Ari (Yom) ima sada ombas manang partingkian na nyata, na patuduhon hagogok ni ulaon ni Debata. Adong do dua gombaran ni ari i, na parjolo ima gombaran ian manogot sahat tu borngin dungkoni manogot muse. Alai napaduahon ima gombaran partingkian na manongtong na jinadihon Debata na so diboto jolma, holan Debata do na umbotosa. Ido alana umbahen ingkon marolopolop huriaNa i, dohot angka na porsea di Ibana manghalashon Ari i. Ai mangula do Debata sian angka tingki tu tingki jala holan Ibana do na umboto saluhutna angka na masa i. Alai di jolma tung marasing situtu do panjaloanna tu angka ari na jinadihon Debata. Sai haluar do di roha dohot pingkiran ni jolma, bulan na denggan dohot bulan na so denggan, ari na denggan dohot ari na so denggan ima laho patupahon sada-sada ulaon. Disi ma jolma gabe ndang mangantusi, sude do ari jinadihon Debata, tinggal hita mamake sude ari i huhut sai porsea tu hagogoon ni Debata. 3. Pasupasu tu angka na ro tu bagas joro i. Manang ise na rotu bagas Joro i dibagasan Goar ni Debata Jahowa dijangkon do marhitehite Pasupasu sian bagas Joro ni Debata, Songoni do nang di naeng haluar sian bagas Joro i, tong do dipaborhat dibagasan Hata Pasupasu. Bagas Joro ima inganan na mansai ringkot di ngolu angka na Porsea i, ai dihaporseai do Bagas Joro i Debata laho mamasumasu jolma i. Sipahusorhusoron 1. Siapakah saya ini? Ise do ahu? Molo hea tatonton film-film superhero , songon film Batman, Spiderman, Superman dna, marhite film ini sai ditogihon do angka halak na manonton i asa adong kekuatan songon bintang film i. Di dunia nyata pe songoni do, ima sai adong halak na mangalului hagogoon sian huaso hagolapon songon ilmu kekebalan, mamake jimat dna. Hape ndada boi hagogoon portibi on pasimpulhon sude pergumulan ni ngolunta. Dao tumagon hita mananda dirinta laos unduk diadopan ni Debata. Marhite pandohan i diakuhon ma, ia anggo dirinta tu na metmet situtu do diadopan ni Debata, ai marasing situtu do Debata na so tardodo roha dohot utokutok ni jolma. Alai di hametmetonta i, ndada na so marguna hita di jolo na, justru tu mansai arga do hita di adopan ni Debata. Dison do na ingkon taolophon panjouon dohot pamilliton ni Debata di ngolunta. Ai ise do hita sasintongna? Anggo mamereng sian naung tabahen, dohot na naeng taulahon muse songon na so adong do boi tabadinghon tu pambahenan ni Debata naung tajalo. Alani, patut ma nian hita laho patutoru rohanta, patut do dohononta “Naposo na so hasea do ahu”, ndang tarbahenta laho paginjanghon rohanta, patuduhon angka kehebatan ni ngolunta. Sudena i, marharoroan sian Debata do.. 2. Patut jala ingkon do hita mandok mauliate jala marolopolop di pambahenan ni Debata di ngolunta on. Tung so adong do na lipe sian pamotoon dohot parnidaan ni Debata. Diboto Debata do angka na masa di ngolunta mulai sian ujung ni simajojakta sahat tu ujung ni obukta, jala dipaihut-ihut do i sian angka tingki tu tingki. 3. Tongon do di minggu on didok Pesta OLOPOLOP HKBP na marumur 150 taon di ari 7 Oktober 1861. Anggo mamereng pardalanan huriaNa saleleng 150 taon on, tontu ingkon dohonon do ndada pambahenan ni jolma i, tung alani pambahenan ni Debata do i. Taingot ma jolo sejarah pardalanan ni huriaNa on, nunga piga-piga hali naeng marumpak, mulai sian dung halak Batak maniop HKBP siala diusir mulak sude angka missionaris hape so adong dope parbinotoan halak Batak laho manguluon HKBP baik sian parbinotoan nang materi, dungkon i piga hali terjadi Skisma (parpocahan) dibagasan HKBP sandiri, jongjong GKPI taon 1976, jala godang do politik Negara di tingki Orde Baru ndang marlomo ni roha asa lam balga HKBP ujungna “didanggur” muse ima na masa na jolo istilah “monjo dohot Hot di hot di/SSA”. Gari keluarga na metmet anggo digoyang sian bagas dohot sian duru sai pintor marumpak, hape huriaNa na balga on jala godang angka kepentingan dibagasan, adong ma i sian tonga-tonga ni angka parhalado i sandiri ima na jolo istilah Parhalado Pusat dohot angka Pangula suang songoni sian ruas, ndang dope sian duru ni HKBP HOT do huria ni Tuhan i sahat saonari, tontu dison do ingkon taakuhon jala tahamuliateon Pambahenan ni Debata na manongtong i. Asa pardalanan huriaNa on, tabahen gabe songon KESAKSIAN IMAN YANG HIDUP di pardalanan ngolunta songon ruas, parhalado, keluarga dohot na mangolu di tonga-tonga masyarakat di Negara on. Dohononta ma “Tung na songkal do Pambahenan ni Debata di ngolunta on” Amen.