Lukas 18 : 28 - 30

Tema

“dapotan do halak na burju mangula-ulaonna”
Patujolo
Dijolo ni turpuk on dipatuduhon do songon dia maol na sahalak na mora manjalo Harajaon ni Debata. Disungkun sahalak na mora i do Jesus :”O Guru, na denggan roha! Dia do sipatupaonhu, asa hutean hangoluan na salelenglelengna” (ay.18). di Matius 19:22 dipatuduhon, na mora i ima sahalak naposo. Dihilala naposo na mora ido nunga diulaon saluhutna na hombar tu Patik ni si Musa dohot saluhutna na hombar tu Hata ni Debata. Sian i, tubu dibagasan pikiranna nunga patut jaloonna na balga sian Debata. Alai didok Jesus do tangkas sada nai na so diulaonna dope ima “Sada nama na hurang di ho : gadis ma nasa na di ho, parlehon ma i tu angka na pogos, gabe mararta ma ho di banua ginjang. Dungi ro ma ho mangihuthon Ahu”? Dung didok Jesus si songon i habot do rohana, lapatanna songon na so tarjalona do na dipangido Jesus i. Boasa songon i ? Siala ndang rade rohana mangadis sude hartana i laho manjalo arta na dumenggan jala na arga sian naung adong di ibana. Ternyata rumingkot dope di ibana artana na godang i sian arta na di banua ginjang na naeng sipasahaton Debata tu ngolu ni jolma i. Alani ma gabe didok Jesus muse “ Gumabur do boluson ni gaja pinggol ni jarum, unang halak na mora bongot tu bagasan Harajaon ni Debata”. On ma manghehei sungkunsungkun di roha ni natorop na umbegesa dohot angka siseanNa i: Molo boti, ise ma tarbahen malua (ay.26).

Penjelasan
• Ay. 28, Petrus manungkun :”Hutinggalhon hami do na di hami mangihuthon Ho”. Taboto do dipillit Jesus angka siseanNa i sian angka parulaonna dohot keluargana; adong ma i panjala dengke, adong sijalo beo dohot angka na asing. Di roha dohot pingkiran si Petrus dung membege panghataion Jesus dohot sahalak na mora i, beha ma ibana muse dohot angka sisean na asing, dia ma sijaloon nasida songon upah na be. Hape so adong be artana laho sigadison asa pasahaton tu angka na pogos, songon na didok Jesus Jesus mandok tu na mora i asa lam singkop ngoluna ima ingkon gadisonna do artana laho pasahaton tu angka na pogos. Berarti dos ma nasida dohot namora i ndang be boi bongot tu bagasan Hangoluan na saleleng ni lelengna. Sasintongna ndang na salah manang hurang sungkun-sungkun si Petrus on, jala wajar do i. Taboto do tangkas memang adong do parasingan si Petrus maradophon angka sisean na asing na blak-blakan. Di roha dohot pingkiran si Petrus naeng do botoonna angka dia ma naeng sijaloanna naung manadingkon keluarga dohot angka ulaonna, holan na mangihuthon Jesus.
• Ay. 29-30, tangkas do didok Jesus : Situtu do hatangkon tu hamu : nasa na manadingkon jabuna, manang na niolina, manang hahaangina, manang natorasna, manang anakhonna pe ala ni harajaon ni Debata, ingkon silompit do jaloonna i di hasiangan on, angkup ni i hangoluan salelenglelengna di hasiangan sogot”. Diantusi Jesus do na marhusari dibagasan roha ni angka siseanNa i. Nunga tubu keraguan di pikiran nasida masa depan na mangihuthon Jesus i. Dibahen Jesus do jaminan (garansi) tu nasida songon didok Na di ginjang nangkin. Jaminan na nilehon Jesus ndada holan ngolu di portibi on alai dohot do ngolu sogot ima hangoluan na salelenglelengna i.

Renungan
• Bangko jolma na mangolu di portibi on molo mangula hita tontu araponta do upah sian halojaonta i. Songon didok hata ni halak Batak : Molo gambo pe nijama, sai adong do mapiltik tu baba. Lapatanna, molo niula sada siulaon, nihirim do adong upa manang paruntungan sian i. Ndang adong na salah sian i, na gabe salah ima molo sai tabahen untung/rugi mangihuthon Tuhan i. Dipatudos mangihuthon Jesus songon na manuhor barang, molo dituhor sada barang aha do untungna jala aha do rugina. Ngolu na mangihuthon Debata, sasintongna ndang adong harugianna alai songon jolma hita di portibi on sai tambahen do hali-hali hajolmaon laho marnida saluhutna i. Ido alana, godang dope halak Kristen di portibion alang rohana mangihuthon Tuhan i siala ndang pintor jaloon, daion, manang dinikmati upa halojaon mangihuthon ibana. Na marasing situtu molo karejo di ngolu portibi on, sadari diulaon nunga adong upana manang sadia pe taho i. sarupa songon jotjot didok parjamita :”diallang lasiak pintor pedas, diallang sira pintor hatsim, diallang gula pintor tonggi”. Ndang ingkon songoni na mangihuthon Tuhan i. Na pasti songon didok Jesus di turpuk on, sude na mangula tarlumobi ngoluna dipasahat tu Tuhan i tontu marlompit do jaloonna sian Tuhan i, ndang holan upa na adong di portibion alai dohot do upa dung tatadinghon portibion. Alai unang ma upa i parjolo ditaringoti dungkon i pe na mangulaon. Ai jotjot do hita pintor manimbangi angka dia ma sijaloonta umbahen adong pertimbangan olo manang ndang olo laho mangulaonsa. Sasintongna Kewajiban lebih dulu barupun hak (mangula dungkon i jaloonta ma upahta hombar tu ulaonta be).
• Manadingkhon angka keluarga, sisolhot dohot na mangadis saluhut arta ndang didok Jesus secara harafiah i, alai naeng didok Jesus asa humsolhot jala humringkot hita di ulaon Tuhan i sian angka ulaon portibi on. Ai godang do jolma nang pe halak Kristen nuaeng on molo na marhuria i holan pasi-pasi sambing, sisa-sisa di gogo, pikiran, talenta nang artana pe. Tapatudos ma jolo peleanta nang pelean ruas i, nda na ummetmet sipasahatonna songon na sisa-sisa di dompetna do tu Tuhan i martimbangkon laho manuhor baju tu Mall pintor naumbalga ido siboanon. Adong do Hata ni Debata mandok :”Ai ia disi artamuna, disi do nang rohamuna”. Ido umbahen, godang do angka na adong di hita suang songoni keluarga, ulaonta dohot artata gabe mangambati hita laho pajumpang dohot Debata. Hape adong do hata ni Debata mandok :”sai jumolo ma lului hamu harajaon ni Debata dohot hatigoranNa, dungi tambahonnonNa do sude angka ondeng tu hamuna” (Matius 6:33).
• Upah mengikut Tuhan dengan sungguh-sungguh, akan kita dapatkan pada masa kita masih di dunia ini dan masa yang akan datang ketika kita sudah meninggalkan dunia ini. Pengorbanan kita melalui persembahan hidup kita untuk pekerjaan Tuhan tidak akan sia-sia, sebagaimana dikatakan Paulus dalam I Kor. 15 : 58 “Karena itu, saudara-saudaraku yang kekasih, berdirilah teguh, jangan goyah, dan giatlah selalu dalam pekerjaan Tuhan! Sebab kamu tahu, bahwa dalam persekutuan dengan Tuhan jerih payahmu tidak sia-sia”. AMIN