Ev. Psalmen 15 : 1 – 5

Patujolo Mansai jempek do nian turpuk on holan 5 ayat, alai tung uli, bagas jala mamora do poda na hinamhamna. Turpuk on marisihon Etika (tata susila) dohot moral manang nilai-nilai kebenaran. On do nuaeng na mago di ngolu hakristenon di partingkian si-nuaeng on umbahen lam ragat angka hajahaton, kemunafikan, dna. Sai gok dope di ngolunta on angka koruptor, panangko, pamunu. Nian boi do didok jolma sude terjadi i siala tuntutan ni ngoluon ima angka parsaolan ekonomi (butuha), alai molo jujur hita memereng alasan na sekian do i. Ai humgodang nama tabereng di ngolunta on siala nunga mago nilai-nilai etika, moral dohot kejujuran di ngolu on. Molo hot do pardalanan ni jolma i di etika dohot moral na denggan pasti do jumpanganta angka na denggan di ngolu on. Hatorangan ni turpuk Sungkun-sungkun na parjolo na pinatolhas Raja David tu Debata ima :”Ale Jahowa, ise do na jadi sorang di bagasan undung-undungmu? Ise do na mian di dolok ni habadiaonMi? Undungundung ima sada gombaran inganan ni Debata. Molo di konteks ni turpuk on martudu-tudu ma i Bagas Joro ni Debata. Molo didok “sorang” manang menumpang ima songon tamue manang halak na ro mangido pangurupion sian Debata. Lapatanna disi : Ise do na talup gabe tamue ni Debata? Manang ise do na talup ro mangido dohot manjalo pangurupion ni Debata? Sian i boi berengonta ndang na asal-asalan hape na sorang di undungundung ni Debata. Alani porlu do disigati angka songon dia do na boi sorang di undungundung ni Debata i. Sasintongna, ganup ro dohot mulak hita sian gareja, ingkon torus do sungkunonta tu dirinta : Ise do na jadi sorang di undungundung ni Jahowa? Asa marhite i torus tajagahon dirinta, jala tapature asa talup hita di JoroNa i. Ayat 2 – 4 ima songon tanda na talup sorang di undungundung ni Debata? Ay.2 didok “Halak na sun burju marpangalaho dohot siulahon hatigoran jala sidon na sintong dibagasan rohana”. Ingkon burju (berlaku tidak bercela) di hata heber didok “emeth” manang layak dipercaya, satia, murni, benar-benar. Sarupa do on tu na nidok ni Debata tusi Abaraham di 1 Musa 17 : 1 “Sai marparange di jolongku ma ho, jala daulat roham”. On ma sada kualitas moral na ingkon sipatuduhon ni halak Kristen. Ima kualitas moral na sun burju, na so marlindang di ngolu parsaripeon, parianakhonon dohot di parkarejoan. Ai molo so hita tung ise ma? Ai hita halak Kristen na tarjou do tusi, asa unang be saurdot angka haholomon dohot hatiuron di bagasan huria na i. Jala didok nangkin muse Siulahon Hatigoran (melakukan keadilan). Unang ma songon jolma nuaeng anggo tu halak pintor situllop mata ni horbo alai anggo tu dirinta songon na boi do mar-per. Manang molo tu diri niba naeng do bahenon ni jolma seadil-adilna hape molo tu halak ndang ringkot keadilan i, ndada songoni maksudna disi. Alai ingkon tu sude do adong keadilan, dos jala sama rata. Jala didok muse di ayat 2 on Sidok na sintong sian bagasan rohana (mengatakan kebenaran dengan segenap hatinya), ima ndang adong gabus, ndang adong sipalensem, tidak bersilat lidah. Di tonga partingkian ngolu ni masyarakat nuaeng on hira na tabo do di roha ni jolma i molo manghatai ndang adong bumbu-bumbu gossip, fitnah dohot na manghatai jolma. Jala nunga mangararati on sahat tu huria dohot angka parsaoran ni keluarga. Memang, jotjot do maol manghatahon na sintong nuaeng on alai boi parohon hamaolon. Alai songon angka anak ni Debata hita, ingkon do taulahon i. Di hata ni Jesus pe mandok : Olo anggo olo, ndang ia ndang” (Mat.5:37). Adong dope hadomuanna tu na di ginjang nangkin di ay.3 didok : halak na so olo mangkata tundal, na so olo mambahen hajahaton tu donganna, jala na so olo mambahen haurahon tu sisolhotna”. Angka halak Kristen ingkon do roha na pangoluhon ndada roha pamateon. Tung di hasiholi do angka na denggan tu donganna (di jabu, di huta, di ulaon dohot di huria), jala dijagahon unang sanga adong sian dirina na mambahen gabe hansit roha manang gabe marlea manang mandabuhon reputasi donganna. Ingkon sijamothonta do na manghatahon hata tundal/fitnah, songon didok angka pandohan :”fitnah lebih kejam dari pembunuhan”. Molo tapatudos di Jak.3:1-12 taringot tu dila didok disi : Mansai godang do jolma naung mate binahen ni podang….alai andul gumodang dope na mate ala ni “pangabas”. Ido alana sai didok angka parende : Memang lidah tak bertulang tak terbatas kata-kata? Tinggi gunung kan kudaki, lain di bibir lain di hati”. Ay.4, mansoadahon na lea, jala dipasangap do angka na mangkabiari Jahowa. Ayat on hum tangkas patuduhon taringot mardongan ndang asal mardongan. Mardongan ndada na mamereng holan di hubungan parmudaron, ndada ala ni harta dohot angka na asing; alai beha do parsaoranna tu Debata. Halak na burju mar-Tuhan , na manghabiari Jahowa ido didongani, angka halak sisongoni do na mardalan di hasintongan. Sai somal do didok : pengaruh lingkungan manang hona pengaruh ni jolma. Molo sai lehonon do roha marparsaoran tu angka halak na so denggan boi do lam leleng ndang denggan be iba, sebalikna do molo lehonon do roha marparsaoran dohot angka halak na denggan pasti do denggan muse iba. Ay.5. halak na so olo paanakkon hepengna jala na so olo manjalo sisip mangalo na lidang roha i (yang tidak memimjamkan uangnya dengan makan riba dan tidak menerima suap melawan orang yang tak bersalah). Ndang apala bunga hepeng tinaringotanna dison, alai sikap na sai olo mambuat pangomoan sian angka na susah, na pogos manang na hurangan di ngolu. Lapatanna disi molo so boi ni urupan angka na susah i nanggo pinomat ndang tabahi asa lam susah ngolu nasida. Ai godang do jolma nuaeng on mamake pandohan : asal bersisik, ikan ma i, (lapatanna sian ise pe taho, asa ma mangalehon pangomoan, bondut ma). Udutna didok asa unang mambuat pangomoan manang pamora diri sian sisip (suap). Di 2 Musa 23:8 : suap janganlah kau terima, sebab suap membuat buta mata orang-orang yang melihat dan memutarbalikkan perkara yang benar. Halak na manghasiholi hatigoran, hasintongan ingkon mangigihon do angka sisip. Memang godang do jolma na so tahan godaan manjalo angka sisip on, songon na tabo do i di angka jolma parjahat; so pola loja hape boi hatop mamora. Sipahusorhusoron ni jamita : 1. Ngolu na beribadah ingkon sadalan do di perilaku ni ngolu siganup ari. ibadah manang abodah sian hata arab marlapatan do i tu sikap manang tingkah laku. Munafik do jolma molo berengon anggo sian ibadah na ndang adong na hurang be alai sian perilaku siganup ari tung dao situtu do. Ido alana godang hata na tabege mandok : iala goarna pandita hape….., percuma do i sintua so niantusan na niulana, asal parari kamis do i…ndang pola hansit rohanta disi, ai memang ingkon intropeksi diri do hita marhite jamita on. 2. Memang ndang adong jolma na boi sikop jala sempurna di jolo ni Debata dohot di jolo ni angka jolma. Alai tanda halak Kristen na mangolu jala na dinamis ndang holan mardalan di tempat tontu ingkon lam meningkat tu dengganna hita di parrohaon, pambahenan dohot angka sude di gulmit ni ngolunta on. 3. Porsea ma hita halak na sai jugul mangulaon na denggan ndang adong pola sihabiaronta di ngolu on, jala halak si songon on do na nihalomohon ni Debata. Songon na di ginjang nangkin so adong na so tarpatupa molo Debata donganta, jala tarpatupa angka jolma na porsea ido. Amen