Ev. Lukas 1 : 67 - 80

Jamita Partangiangan Ev. Lukas 1 : 67 - 80 Hamu angka dongan ! Di ngolunta on godang do ala manang sebab umbahen tapuji Debata di ngolunta on. Boi do i marhite angka hahipason naung tajalo di ngolunta on, pasupasu dohot angka na asing. Ragam ma tahe na boi sidohonon. Alai na rumingkot songon tanda jolma na marhaporseaon di Tuhan i tung tama do hita mandok mauliate ganup gulmit di ngolunta on. Songon ido dipatuduhon dibagasan turpuk on. Sahalak panurirang na margoar Sakarias naung matua dohot jolmana na margoar si-Elisabeth. Nunga tung leleng sai dipangido nasida tu Tuhan i asa dibasa-basahon Debata tu nasida ianakhon. Hape nunga sahat tu namatua nasida ndang dope dilehon ianakhon jala si-Elisabeth pe ndang mungkin marianakhon siala boru-boru na hol (na mandul). Anggo di roha ni nasida na dua (Sakarias dohot Elisabeth) ndang be adong panghirimon si songon i. Songon hea do adong program di tivi taringot “mimpi kali ye”, ima sada program pajumpang dohot artis idola. Molo mamereng sian hadirion sahalak na naeng pajumpang tu artis idolana hira na so mungkin do ro artis i pajumpang tu nasida ima gabe didok mimpi kali ye. Jala di ngolunta on godang do na didok ‘mimpi kali ye’, tabahen ma jolo tudosan : songon dia ma hita gabe terkenal masuk tivi ganup ari pasti ‘mimpi kali ye’, songon dia ma hita boi gabe pejabat di Negara on, mimpi kali ye. Godang do songon na so mungkin di ngolu on sian hajolmaonta. Hape adong do hata na malo mandok : tidak ada salahnya mempunyai pengharapan yang besar di dalam hidup ini. Lapatanna ndang na hurang i molo sai tabahen panghirimon na mangolu di rohanta, sian molo sai tadok : ndang mungkin manang ndang tarula i. ido alana di turpuk on siala ndang dihaporseai si Sakarias hata ni Debata gabe diuhumi Debata ma ibana ima uhum na so boi manghatai sahat tu na boi dibereng ibana pambahenan ni Debata di ngolu na i. Anggo di ngolu ni jolma na sai marsigantung tu pikiran dohot gogona sandiri jotjot do songon na didok di ginjang nangkin ima : tidak mungkin, ndang tarula i manang mimpi kali ye. Hape sebalikna do sangkap ni Debata. Anggo di jolma boi do gabe ndang mungkin, alai molo di Debata tangkas didok :”Ai ndang adong na so tarpatupa Debata” (Luk.1:37). Hamu angka dongan ! Turpuk on ima songon barita hasosorang Johannes Pandidi na dipersiapon Debata laho manomunomu haroro ni Panurirang na balga, raja na marhuaso di sandok portibi on dohot di surgo ima Haroro ni Jesus Kristus. Ido alana gabe mamuji-muji Si Sakarias dung ungkap pamanganna dipambahenan Debata na masa di ngoluna. Adong do piga-piga tanda manang cirri-ciri sahalak na mamuji amuji Debata di ngolunna ima : 1. Gabe manurirangi pambahenan ni Debata Di jolo turpuk ta on gabe didok manurirangi do si Sakarias tu jolma na torop i. Manurirangi Ibana di pambahenan ni Debata naung di jaloNa sian Debata asa lam porsea jolma i ima na tuk do Debata patupahon saluhutna na adong di ngolu ni jolma i. Hita pe ingkon boi do manurirangi angka pambahenan ni Debata naung tajalo di ngolu on. Asa lam mananda jolma di ngoluna jala lam porsea di pambahenan ni Debata sian angka tingki tu tingki. Tung godang do pambahenan ni Debata di ngolunta on, nian ndang holan marhite materi alai dohot do na so tinagam ni roha dipasahat Debata di ngolunta on. Barita Nauli na mangolu ndada holan na didok jolma naung di jalo nasida sian Debata, alai dohot do na taalami di ngolunta on. Tung godang do na dipatupa Debata di ngolunta on ndada ingkon na sai tahirim baru pe tadok na mangula Debata di ngolunta. Tauji ma jolo mamereng sian angka na salpu sahat tu nuaeng. Pasti do dohononta :”Godang ma tongon na binahen ni Debata di ngoluku on”. 2. Gabe lam tubu roha na mambiar tu Debata Tanda na mamuji Debata na paduahon ima lam tubu ni rohanta na mabiar tu Debata. Biar lapatanna dison ima tanda na sangap jala holong rohanta tu Debata. Ndang be hita marlomo-lomo di ngolunta on alai nunga Debata. Ai naung munsat do hita sian haholomon tu hatiuron, sian hatoban hian gabe anak ni Debata. Roha na mabiar tu Debata ima ingkon lam holong rohanta tu Debata sian angka na adong di portibion (patudos Matius 6:33 : sai jumolo didok disi ima mangalului Harajaon dohot hatigoran na sian Debata). 3. Gabe jolma na na matoras di sudena Tanda na mamuji Debata hita na patoluhon ima ngolu na lam matoras di sudena. Matoras di panghataion dohot di pambahenan. Ala na matoras ndada holan mamereng tu umur alai mamereng di kualitas ni ngolunta. Syarat asa gabe matoras hita tontu ingkon mulak do hita tu hata ni Debata di Kolose 2 : 6 -7 i, ima asa mian hita di IBANA, jala marurat dohot lam magodang dibagasan Tuhan i. Molo didok mian ima asa hot hita di bagasan Kristus, ndang boi mardua-dua roha. Hata ni Debata pe mandok ingkon satia do hita saleleng ni lelengna dibagasan Tuhan i. Hamu angka dongan Tung godang do paraloan sian portibion dohot angka jolma na asing tarlumobi sian bagasan ngolunta sandiri laho mamuji Debata dohot manghatindanghon angka PambahenanNa. Alai dohonon ma memang ingkon ido tantanganta na mangihuthon IBANA di hasianganon. Kompensasi manang pengorbanan na tabahen mangihuthon IBANA di ngolu on ndada marisuang i tung dihasiholi Debata do i sian hita. Alani ingkon do hita manongtong mamuji IBANA di ngolunta on. Ndang tarbahenta mardua roha tu Debata siala olo annon songon didok halak Batak “dua sai dua hape holan sada pe so adong”. Dao tumagon sai manongtong hita paimaimahon di sangkap ni Debata di ngolunta huhut mangula ulaonta hita hombar tu lomo ni roha ni Debata. Ai marpanatap do Debata, molo didok Debata manjadi tu hita ingkon manjadi do. Ndang adong hagogoon manang aha pe na boi mangambati sangkap ni Debata. Alani tapuji ma Ibana di sude gulmit di ngolunta jala rodi saleleng ni lelengna. Amen