PASAHATON TEANTEANAN
Somal do angka natoras mambahen testamentum manang surat wasiat tu angka ianakhonna andorang so marujung ngoluna, jala peopon ni angka ianakhonna ma testamentum i na gabe siulahon nasida. Boi do testamentum i marisihon angka poda (hata nasehat), boi do marrumanghon tona, jala boi do marisihon parsagi ni sinamot manang teanteanan ni natorasna. Alai taringot parsagi ni sinamo manang teanteanan sian natoras tu angka ianakhonna jotjot do ndang sarupa tu boru dohot tu baoa. Hira di sude budaya manang suku na mamake garis keturunan baoa (Patrilineal=Patriakhat), sai dikhusushon do tu angka baoa. Dison ma jotjot terjadi persoalan di keluarga i ima tubu ketidakadilan di angka ianakhon. Dungi beha muse molo so adong ianakhonna baoa manang ndang adong ianakhonna sama sekali?
Adong do mambahen gabe holan tu baoa do teantenan ni natorasna ima :
1). na didok sigoki jabu ni halak do ianggo boru (anak perempuan adalah untuk mengisi rumah orang)
2). Mangan tuhor ni boru (anak perempuan dianggap barang dagangan yang diperjualbelikan.
3). Molo tu anak baoa ima na didok manguduti pomparan (garis keturunan) sian natorasna.
4). Angka boru pe sasintongna gabe mangihuthon garis keturunan (clan) sian marga na asing na gabe amantana. Jala dibagian marga sian suami nai ma ibana manjalo teanteanan sian simatuana.
Alai di partingkian si nuaeng nunga lam godang angka kaum perempuan tarlumobi di gerakan feminisme manang gender menuntut asa dos (sarupa) hak dohot kewajiban baoa dohot borua. Alani dipiga-piga suku (budaya) suang songoni di halak Batak sandiri pe nunga lam terbuka di angka perubahan ima na gabe sarupa sijaloon ni angka ianakhon di tonga-tonga keluarga. Jala Negara sandiri pe nunga membahen Peraturan manang Undang-Undang No.415K/Sip/1970 asa parsidos (sarupa) na jinalo baoa dohot borua molo adong harta (teanteanan) ni natoras tu angka gellengna, songon na hea masa di Keluarga TD Pardede gabe dibahen pamarenta haputusan hombar tu Undang-Undang di Negara Indonesia. Songoni nang hea masa di negara on, kasus perebutan harta sahalak borua (inisial Sel br.Str) tu bapak tiri, hape dungkon marhamulian muse natorasna boru tu bapak tirina ndang adong anakna, jala monding ma natorasna boru on, gabe dipasahat do sude harta na pinapungu natorasna hian, asing ma molo adong harta na pinapungu bapak tirina on dohot omakna. Molo di halak Batak didok mai Golad ima harta na pinapungu natoras kandungna hian.
Punguan Ina na hinaholongan
Nas manang perikop PA di hita di sadarion manaringoti do taringot tu teanteanan. Adong ma angka boru si Zelopad ima si Mahla, si Noah, si Hogla, si Milka dohot si Tirza ro mandopothon si Musa dohot Malim Eleasar mangidohon boasa gabe dipamago goar (klan) among nasida jala boasa gabe harta (teanteanan) natorasna gabe tu hahaanggi ni natorasna? Tontu naung mardalan do ruhut-ruhut parugamoan manang adat di nasida molo mate natoras na so marianakhon baoa, harta tading-tading ni na mate i gabe dipasahat tu hahaanggina. Alai marbisuk do si Musa, ai ndang parjolo ibana mamake aturan parugamoon na somal diulaon manang aturan ni adat di nasida. Marpanungkun do si Musa tu Debata, gabe dialusi Debata ma si Musa mandok : Sintong do pangidoan angka boru ni si Zelopad ima ingkon sipasahaton do teanteanan ni natorasna. Jala dipatorang Debata do muse tusi Musa ruhut-ruhut parbagian harta manang teanteanan partading ni angka natoras molo marujung ngolu nasida ima : molo marujung ngolu natoras na so marianakhon baoa, ingkon do pasahaton sude harta ni natorasna tu angka anak boruna, jala molo tung sura so adong sada pe ianakhonna ipe baru dipasahat tu hahaanggina, jala molo so adong hahaanggina baru pe dipasahat tu keluarga sian hahaanggina, dungkon ipe dipasahat molo so adong keluarga hahaanggina ima tu donganna sabutuha manang samarga na sumolhot tu ibana.
Sian on turpuk on nunga leleng hape dibahen Debata tung mansai denggan angka parbagian harta warisan (teanteanan) ni natoras tu angka ianakhonna. Hape molo tabereng di keluarga halak Batak sai masa dope parbagian na gabe patubuhon angka parbadaan manang parsalisian di tonga-tonga ni ianakhon dohot keluarga. Ndang binoto aha do mambahen i. Manang na so dijaha nasida do Firman i (Hata ni Tuhan i) gabe holan adat i nama na rumingkot, manang sai jotjot dope parsiguluton di harta on na ummarga sian holong ni roha dohot hadameon di tonga-tonga keluarga? Alani ingkon jamot do natoras mansagi (membagi harta warisan) tu angka ianakhonna. Sipata jojtot do parsualon terjadi di pembagian harta warisan ndada alani godangna harta, na otik pe jotjot do tubu parsalisian manang parmusuon. Dao dumenggan molo boi dipatupa pardoson (sarupa) tu angka ianakhon, nang pe sai adong natoras marasing-asing holong ni rohana tu angka ianakhonna. Molo pe adong harta warisan (teanteanan) sibagion tu angka ianakhon, parjolo do disuanton harta warisan na ummarga ima Hata ni Debata (pat.5 Musa 6:7; Matius 6:33). Asa jumpang di angka ianakhon manang keluarga holong ni roha, dame dohot dos ni roha. Amen
Tidak ada komentar:
Posting Komentar