Yohanes 3: 1 - 17

YOHANES 3 : 1 - 17

DEBATA DO PANGURUPI NA SATIA

Huria ni Tuhanta...

Turpuk on marharoroan do sian parjumpangan ni Tuhanta Jesus dompak si Nikodemus, sahalak sian angka Parise, sintua ni Jahudi, na ro borngin-borngin manopot Jesus laho manungkun na ringkot tu parugamoon. Unik do na binahen si Nikodemus on : Naparjolo, ibana sandiri borhat di borngin-borngin? Ndang pola dipaboa aha do alana umbahen pola di borngin-borngin i si Nikodemus pajumpang dohot Jesus. Alai adong angka penafsir mandok asa tenang do nasida manghata-hata i. Di angka penafsir na asing mandok asa unang diboto angka halak Parise dohot angka si tuan natorop haroro ni si Nikodemus pajumpang dohot Jesus. Napaduahon, si Nikodemus sahalak sian 70 halak pangituai di halak Parise (Anggota Majelis Sanhendrin) na marhuaso di tingki i. Tarbarita do di uju i horong Parise on na sai mangalului dalan mambahen paraloan manang parmusuon tu Jesus. Hape si Nikodemus sandiri, naeng umbagas mangantusi taringot tu parugamaoon na sintong sian Jesus. Diparhatopot si Nikodemus do, ise Jesus marhite angka naung niidana dohot naung binegena sandiri.  

Manang na songon dia pe cara si Nikodemus laho pajumpang dohot Jesus, sada na ringkot na boi berengonta ima na marsitutu do si Nikodemus laho marsiajar taringot tu Jesus. Laos dihatindanghon si Nikodemus do sada statement (pernyataan) na sintong taringot tu Jesus ima nadidok na, ia Jesus na sinuru Debata do tu portibi on. Ibana ma naung ojak di portibi on patuduhon Harajaon ni Debata. Gabe dialusi Jesus do panghatindanghion si Nikodemus, ia molo naeng marnida Harajaon ni Debata, ingkon tubu jolma sian ginjang. Di hata Indonesia, pandohan tubu sian ginjang diterjemahon  dilahirkan kembali manang istilah na asing didok ma i “Lahir Baru”.

Di bona taon 1970, di tingki parmulaan aliran Pentakosta dohot Kharismatik jotjot do tarbege istilah Lahir Baru manang Tubu Paduahalihon. Dijamitahon ma jotjot disi asa gabe Lahir Baru manang Tubu Paduahalihon, jala dipatupama disi Pandidion muse manang Pandidion Dewasa. Gariada sai adong dope ruas HKBP na olo mandohoti pandidion na paduahalihon on sahat do tu Aek Jordan di Israel. Alani gerakan on, gabe tubu ma sungkun-sungkun di angka ruas manang parhalado tarlumobi di horong huria mainstream (arus utama), termasuk songon hita HKBP ima naung dohot do hita lahir baru manang ndang dope? On ma na gabe patubuhon keragu-raguan jala sungkun-sungkun di Pandidion na pinatupa di hurianta, jala mambahen torop ruas ni HKBP laho tu aliran Pentakosta manang Kharismatik asa gabe “lahir baru” manang tubu paduahalihon.

Holan i, hurang do pangantusion ni ruas huria na mandohoti gerakan lahir baru manang tubu paduahalihon on songon na masa tu si Nikodemus. Nang pe sahalak guru bolon si Nikodemus, maol do dapot ni rohana hata ni Jesus “Ia so tubu jolma sian ginjang, ndang tarbahensa marnida Harajaon ni Debata”? Laos diuduti Jesus do hataNa mandok “Anggo so tubu jolma sian aek dohot sian Tondi, ndang habongotansa Harajaon ni Debata”. Aek dohot Tondi ima simbol pandidion dohot parpadanan naimbaru dibagasan Tuhan Jesus. Aek marlapatan do i pamurion (cleansing), dungi Tondi ima simbol ni hagogoon asa mampu jolma patupahon angka na denggan. Pandohan ni Jesus “tubu sian aek dohot sian Tondi” ima patuduhon halak naung dipaias (dibersihkan) sian angka dosa jala naung digohi Tondi ni Debata laho mangulaon angka na denggan na dihalomohon ni Debata.

Lahir baru manang tubu paduahalihon ndada maksudna asa dididi muse manang diihuthon pandidion na magodang (Baptisan Dewasa). Alai hidup baru manang tubu paduahalihon i ingkon torus do mardalan saleleng ni ngolunta di portibi on, ndada holan sahali i marhite na tardidi muse.  Saleleng mangolu hita di portibi on na rap mardalan do hita di angka rumang pangalaho na masa di portibion na boi mambahen gabe madabu hita tu bagasan pangalaho na so dihalomohon Debata. Tubu paduahalihon patuduhon naung terjadi perubahan di ngolunta secara mendasar (secara esensial). Perubahan mendasar ima marhusor ngolu on sian ngolu na dibagasan haholomon munsat tu ngolu dibagasan hatiuron, ngolu na so dibagasan Kristus gabe munsat tu ngolu dibagasan Kristus. Songon didok Apostel Paulus “ Asa molo dibagasan Kristus halak, na tinompa na imbaru ma i. Nunga salpu pangalaho na robi, gabe na imbaru” (2 Kor.5:17). Alani i do, asa margogo hita mangadopi portibi on ingkon sai mangolu hita dibagasan Hata ni Debata dohot Haporseaon na polin tu Kristus.

Ndang jadi ragu manang gabe ndang porsea hita di pandidion naung dipatupa hurianta di angka posoposo i. Sahali do pandidion na pinatupa di ngolunta siala sahali do Jesus mate manobus angka dosanta, jala marlangku do i rodi saleleng ni lelengna. Pandidion na pinatupa hurianta ima tanda (simbol) naung dipaojak manang diteguhkan naung sangkabona hita dohot Kristus. Dosa nabinahen si Adam mambahen hita mate jala ndang adong be hadomuanta tu Debata. Alai marhite asi ni roha ni Debata naung mangalehon Jesus Kristus tu portibi on gabe tajalo do haluaon na sian Debata.

Jadi unok manang inti laho marnida Harajaon ni Debata holan dibagasan Jesus Kristus do. Jesus Kristus do pamusatan saluhut Harajaon ni Debata asa malua (selamat) hita sian dosa dohot sian hamatean. Marhite haporseaonta tu Jesus Kristus, gabe sai dipauba do ngolunta jala dipaimbaru. Dipangke panurat Johanes on do 98 hali hata Porsea (kata kerja). Ia hata Porsea on bagas do hinanghamna, ima marlapatan pos ni roha, unduk, satia manghaholongi Jesus saleleng ni lelengna. Songon na masa tu halak Israel uju i, di tingki bangso i haruar sian Misir dipardalanan dipargut ulok tulung api nasida siala uhum na sian Debata ala ni hatangkangon bangso i. Godang do na mate di halongonan i siala dipargut ulok tulung api. Gabe mangangguhi ma bangso i jala dipangido ma asi ni roha ni Debata.  Disuru Debata ma si Musa mambahen ulok tombaga, angka ise na mamereng ulok tombaga i gabe malua ma. Ndada ulok tombaga i na mambahen malua nasida sasintongna, alai Debata do paluahon nasida siala porsea tu parsuruon ni Debata. Ulok Tombaga i digombarhon do i songon Silang ni Kristus naung pamalumhon hita sian angka sahitta dohot paluahon ngolunta sian hamatean na saleleng ni lelengna.

Panimpuli :

1) Ngolu hakristenon ima ngolu martudosan tu Kristus Jesus. Naeng do ngolunta marhaporseaon holan tu Jesus.Ibana do naung dipaojak Debata na paluahon portibi on, na ro sian banua ginjang tuat tu portibi on. Asa unang ma tarela-ela hita tu pangajarion di portibi on na mangajarhon sarupa do sude haporseaon na adong di portibion.  

2) Tontu tanda naung marhaporseaon hita tu Jesus ingkon lam tapahombar do ngolunta songon na pinangido ni Jesus. Tumiru panghataion, pangalaho dohot pambahenan ni Jesus asa tarida hita naung gabe jolma naimbaru, manang naung tubu na paduahalihon. Amen

Diskusi :

1. Beha do pangantusionta sahat tu nuaeng taringot tu tubu paduahalihon (lahir baru)? Adong dope sian hita na sai olo mangihuthon angka poda manang pangajarion na marasing-asing di portibi on asa bongot hita tu Harajaon ni Debata?

2. Adong do keraguan di hita taringot tu Pandidion naung tajalo sian huria di tingki dakdanak dope hita, naung gabe parsidohot dibagasan haluaon na pinatupa ni Debata?