Matius 10 : 28

Di zaman sinuaeng on, tung ringkot do jolma manjaga diri. Apalagi lam berkembang zaman laos berkembang do nang cara-cara ni jolma mangulaon hajahaton. Boi do tabereng na masa nuaeng on, marhite angka penipuan SMS didok :”Tolong kirim pulsa, mama lagi di rumah sakit”, manang “anda mendapat hadiah satu unit mobil”. Adong do marhite tugas PLN laho tu jabu sasahalak, hape holan pembantu tinggal di jabu dungi dibuat angka barang parjabu disi. Adong do sopirna sandiri diculik anak majikan laho mangido hepeng tebusan, molo ndang dilehon dibunu anaknai. Ido alana angka na marhepeng, dibahen ma keamanan di Jabuna, isarani angka satpam, dibahen pagar jabuna timbo, laos adong ma mar-body guard manang pengawal pribadi.

Hebatna, ndang adong nian salah diulaon tu manang ise, alai ingkon dohot do na so marsala i gabe manaon hajahaton na niula parjahat i. Ido alana didok angka na malo :”Ndang adong be inganan na aman di portibi on”! Gari na didok disan na aman, dison aman, hape laos disi do rarat angka hajahaton. Alani ido lam mabiar do jolma manang tudia, so tung adong na marsangkap na jahat tu diri niba, ninna godang halak. Di ringkot ni jolma manjaga dirina alai sipata lupa do manjaga Tondina, ima manjaga ngolu partondionna.

Angka dia ma na didok manjaga ngolu partondion? Ima asa unang gabe lam gale, lapatanna haporseaon na lam marpengpeng (kurus kering) siala ndang be disiram dohot ditambor-tambori. Asa unang gabe dirajai sibolis ngolu partondionta, ingkon do torus dipangido Tondi ni Debata margogoihon tondinta. Boasa tung ringkot hita manjaga ngolu partondionta?

1.      Molo ngolu pardagingon na laho salpu do i, songon didok daging mulak gabe tano. Alai molo tondi (haporseaon) ima na gabe ticket bongot tu bagasan Harajaon ni Debata dungkon tatadinghon portibi on.

2.      Didok si-Paulus melatih daging terbatas do gunana i, alai molo melatih Tondi tung godang do panghorhon na denggan. Ai boi do berengon jolma sehat secara fisik alai marsahit secara pikiran manang jiwa. Ido alana tompu-tompu jolma madabu tu parsahiton pikiran, songon stress, depresi dohot na asing. Molo sai dilatih partondion, botoon ma na dia na denggan, botoon ma mangorom hisap-hisap daging.

Songon ina hita di keluarga, dohot di tonga-tonga masyarakat jumotjot do hita perhatian/peduli marnida penampilanta. So binoto be, angka salon dia naung tadalani, dohot cara-cara padengganhon angka penampilan asa torus bagak/uli. Nian ndada na salah i, denggan do i. Ringkot do penampilan na bagak asa timbul percaya diri, asa sonang roha ni jolma mamereng. Alai laos unang ma lupa hita me-Salon Tondinta (haporseaonta), asa unang gabe tubu di hita NAUNG MERASA PUAS. Ai berbahaya do halak naung merasa puas manang nunga dihilala cukup marsiajar Hata ni Debata. Ujungna ndang ringkot be talalui parsaoran na lam tu dengganna tu Debata, ndang ringkot be ta padenggan rohanta laho manangihon Hata ni Debata. Hape anggo di hata portibi so adong jolma naung merasa cukup manang puas. Manat hita disi. Unang tadok : Nunga tammat be ahu di Hata ni Debata. Tarlumobi songon dia ma hita mangadopi angka na masa di portibi on, na torus gabe dipercanggih. Ndang adong na tammat marsiajar di Hata ni Debata.

Ingkon songon tano na koring manang gurun pasir ido rohanta marnida Hata ni Debata, molo sai disiram aek pintor dibondut. Lapatanna asa torus dipangolu roha partondionta. Angka naung mangolu tondi haporseaonna, pasti do marparbuehon angka parbue na denggan di ngolu na. Songon didok Jesus “Ndada na manjou goarNa bongot tu Harajaon ni Debata, alai na mangulaon lomo ni roha ni Debata do” (Mat.7:21). Apostel Jakobus mandok : Haporseaon tanpa parulaon dos na mate do i” (Jak.2:26).

Haporseaon na mangolu ingkon do tarida di parngoluon siganup ari. Ai ndang cukup holan mandok : AHU PORSEA...alai minus di parulaon. Alai ndang gabe mandok : gabe rumingkot ma parulaon na denggan tanpa marhaporseaon. Ai boi do jolma mangulaon na denggan ndang parjolo marhaporseaon. Na dumenggan ima, Haporseaon ingkon sadalan do di parngoluon siganup ari. Tung jorbut do paruhuman na dibahen Debata tu angka jolma parjahat dohot na so porsea i ima api naroko i. Ingkon do bahenonta di ngolunta songon pandohan si Marthin Luther na mandok : Aku melakukan kebaikan hari ini, karena esok akan mati”. Lapatanna, manang andingan panjouon i manang sogot pe taho i, alai nunga bersiap hita. Ai ndang mungkin hita mandao sian i molo tompu ro panjouon ni Tuhan i. Amen