Kolose 4 : 6

Hendaklah kata-katamu senantiasa penuh kasih, jangan hambar, sehingga kamu tahu, bagaimana kamu harus memberi jawab kepada setiap orang

Sai tong ma lambok hatamuna, songon na siniraan, asa botoonmuna alus na patut tu ganup jolma.

Hata na lambok

Adong do hata na mandok : fitnah itu lebih kejam daripada pembunuhan. Boasa gabe fitnah lebih kejam sian pembunuhan? Siala molo pembunuhan pintor sae do holan di tingki i, alai molo fitnah boi do leleng martaon-taon. Fitnah boi do gabe pembunuhan karakter ni sahalak jolma. Ai aha do sasintongna fitnah? Fitnah ima mandok hata na so tutu, na so tingkos alai laho paroahon sasahalak jolma.

Bangko ni jolma, sai olo do manang marsitutu do molo manangihon angka hata na so tutu, hata gosip; alai molo mambege hata na denggan manang angka hata na tingkos hira songon na bosan do.

Ndang salah memang, sada sian patik na sampulu i, ima patik pasiahon didok do tangkas : unang manghatindanghon hata na so tutu maradophon jolma. Dungkon madabu jolma tu dosa, nunga sai tubu di roha nang pingkiran ni jolma i laho margabus dohot manghatindanghon hata na so tutu. Boi do berengonta di tingki si Hawa dohot si Adam, gabe marsibalion do nasida. Songoni na masa di si Kain dohot Habil. Di tingki na dibunu si-Kain anggina si-Habil margabus do ibana tu Debata.

            Dosa mambahen sega do portibi on dohot jolma. Alani dosa sursar ma angka na markeluarga, marsahuta, dohot masyarakat. Tuani ma ro Barita Nauli na sai tongtong paingothon, laho manogu-nogu. Songoni do hata si-Paulus tu huria Kolose na mandok : Sai tong ma lambok hatamuna, songon na siniraan, asa botoonmuna alus na patut tu ganup jolma. Molo didok hata na lambok manang perkataan yang penuh kasih, ima hata na pangoluhon ndada hata pamatehon, hata na membangun (konstruktif) ndada hata na menghancurkan (destruktif).

            Songon didok angka na malo : molo ndang boi iba mambahen na denggan pinomat unang tabahen manambahi arsak ni halak. Ai olo do adong jolma on, nunga susah lam disusai; nunga marsingkor lam dipasingkor. Gariada halak Kristen ingkon do berusaha mambahen na denggan. Ai tarjou do hita halak Kristen on siboan SIRA dohot PANONDANG (Matius 5:13-16), manang dijou do hita asa NGOLU NA MARPARBUE (Joh.15:16). Molo didok gabe Sira dohot panondang manang ngolu na marparbue tontu marlapatan mai ASA GABE BERMANFAAT do hita tu angka humaliangta. Songon dia ma hita gabe bermanfaat tu humaliangta molo hita sandiri ndang boi gabe SIRA dohot PANONDANG.

            Sasintongna ndada pola maol i marhata na lambok, hata na gok holong di ngolu on? Holan i, olo do hita mangulaon manang ndang? Adong do Pepatah Indonesia mandok : Ala bisa karena Biasa ! manang Pasomal-somal ma dirim tu hadaulaton. Ingkon do pasomalanta mangulaon angka na denggan, manang manghatahon angka na denggan di ngolu on. Molo nunga somal pasti do songon na so tabo mangulaon angka na so denggan. Contoh sederhana, molo nunga somal sahalak dakdanak martangiang, molo didok halak unang pola martangiang ho, ninna; tontu maol do i di rohana. Alani do molo sai tapasomal marhadaulaton ngolunta, tontu maol do hita mangulaon na so daulat.

            Napaduahon, gumodang do panghorhon na denggan (keberuntungan) na tajalo molo sai marhata na lambok. Pasti do lam tambah angka dongan, lam tabo angka parsaoran di ngolu. Alai molo sai marhata na so denggan, pasti lam godang musuhta, lam jempek ma parsaoranta. Lam dao ma jolma sian hita molo sai marhata na so denggan. Gari na pagodanghu hata pe, godang do jolma ndang marlomo ni roha tusi. Pasti do dohonon ni halak : Hira ibana do na malo sian hita on?

            Napatoluhon, andorang so tadok hatata adong do nasehat na bijak mandok songon on ima RUMUS 3B, ima BENARKAH, BAIKKAH, BERMANFAATKAH. Rumuson ma na parjolo sipahusor-husoran di rohanta molo naeng dohononta angka hatata. Apalagi molo mandok hata si-NINNA. So binoto dope songon dia hata NINNA on, alani mansai porlu do rumus 3B i.

Ingkon boi do bahenonta ngolunta arga diadopan ni halak tarlumobi diadopan ni Debata. Amen