PANGUNGKAPON 1 : 4b – 8

Tema

Debata na manongtong rodi salelengnilelengna

Patujolo

Disurathon do buku pangkungkapon na tusi Johannes on di tingki masa parungkilon na bolon na niadopan angka halak Kristen na parjolo. Godang do halak Kristen na gabe mate martir (mate siala na mangihuthon Kristus) ima di tingki panggomgomion ni Kaisar Nero sian Romawi (taon 54 – 68 M) dohot Domitianus (taon 81 – 96). Si-Johannes sandiri dohot do mangadopi pangaleleon na jorbut i pola ingkon dibolongkon ibana tu sada inganan pambuangon na margoar pulau Patmos. Laos di inganan ido  disuruh ibana laho manurathon angka na diida naung diungkaphon Debata. Adong do 12 hali disuruh si-Johannes laho manurathon angka na diida ima angka na masa nuaeng dohot na naeng masa (ay.19; 2:1,8,12,18; 3:1,7,14 ;14:13; 19:9; 21:5).  Lapatanna disi, ia buku on ndada na ro sian jolma alai sian Debata do, si-Johannes holan na disuruh laho manurathon.

Ia sangkap ni buku on na diungkaphon Debata tusi Johannes ima laho mangalehon semangat tu ruas ni huria i asa margogo jala togu haporseaon nasida nang pe mangadopi parungkilon na bolon i. Tangkas do didok : angka na satia mangihuthon Jesus ido na manjalo tumpal hangoluan na salelengnilelengna (Pangk.2:10).

Dipasahat do suratna on tu pitu huria na di Asia. Asia na didok dison ima goar ni sada wilayah na dibagasan panggomgomion Rom uju i, ima na di sekitar Turki nuaeng on. 7 huria na didok dison ima huria Efesus, Smirna, Pergamus, Tiatira, Sardes, Piladelphia dohot Laodikea.

Hatorangan ni turpuk

Ay.4    dipasahat do tabe tu 7 huria i marhite hata Asi ni roha ma di hamu dohot dame sian Ibana na mangolu i, naung mangolu hian jala na naeng ro”. Hata tabe on jotjot do didok angka surat tarlumobi si-Paulus di angka suratna pola didok adong 100 hali , alai molo di buku pangungkapon on holan dua hali ima di bonana dohot di ujungna (1:4 dohot 22:21). Ndada holan hata sambing i na holan na dipandok songoni, alai na gabe meterai (sahap) na sian Tuhan i (Trinitas), jala gabe pasupasu i di angka na mambege dohot na pahusorhusoron dibagasan rohana be.

            Jala didok do muse tabe sian pitu tondi na diadopan ni habangsaNa. Godang do penafsiran taringot tuson. Adong mandok 7 surusuruan songon di Pang.8:2, alai gumodang do mandok 7 tondi i ima Tondi Porbadia sandiri dibahen disi hata Tondi (huruf kapital). Bilangan 7 ima songon simbol harimpason (kesempurnaan/kepenuhan), Ai molo didok pitu Tondi ima laho manggombarhon hasahatan buku on tu 7 huria na sidapothonna.

Asi ni roha ima patuduhon holong ni Debata na dipasahat tu hita jolma na so patut hian manjalo i. Songon didok apostel Paulus : Ai ndang adong imbar ni i, tung saluhut do nasida mardosa jala ndang dapot pujian ni Debata nasida, gabe dipintori do nasida dalan basabasa binahen ni asi ni rohana hinorhon ni panobusion na dibagasan Kristus Jesus (Rom.3:23-24). Sasintongna, alani dosa, nunga madabu hita tubagasan paruhuman, alai marhite asi ni rohaNa gabe dapotan pasupasu haluaon do hita.

Angka 7 na didok dison ima patuduhon kesempurnaan manang hasisingkop. Hombar na didok Homer Hailey dohot William Barclay pola adong 54 X bilangan 7 on didok di buku Pangungkapon, isarani rupani :

        7 huria/gereja (1:4  2:1,8,12,18  3:1,7,14).

        7 Tondi/Roh Allah (1:4  4:5  5:6).

        7 sahap/meterai (6:1,3,5,7,9,12  8:1).

        7 suru-suruan na marsarune/sangkakala (8:6,7,8,10,12  9:1,13  11:15).

        7 ronggur/guruh (10:3).

        7 saoan/cawan (16:1,2,4,8,10,12,17).

        7 ulu naga/kepala (12:3  13:1).

        7 berkat / ucapan bahagia = 1:3  14:13  16:15  19:9  20:6  22:7  22:14

Na mansai menarik sian tabe na dipasahat Debata didok do muse dohot hata “Dame” hape dibagasan parungkilon bolon do huria i? On ma patuduhon, dame ndada na holan manggombarhon situasi na denggan manang na aman-aman, manang situasi na so adong parsoalan; justru adong pe parungkilon alai laos disi do jumpang hadameon dibagasan haporseaon. Dipanghilalaon do na tongtong Debata mandongani, mangaramoti nang pe ro angka haba-haba dohot galumbang na gogo situtu di ngolu on. Lapatan ni dame disi ima parsaoran na rosu tongtong dohot Debata dibagasan Jesus Kristus.

Ay.5    Kristus na gabe sitindangi dohot sigomgom nasa na adong.

Haroro ni Jesus tu portibi on ima na gabe sitindangi. Molo gabe saksi ima na mamboto sude angka na masa asa sintong/tingkos na dipaboa i, jala ingkon rade do manaon angka na paet/na hansit alani panindangionna i. Ido alana hata saksi di bahasa Gorik didok MARTUS jala sian hata on ma haroroon hata MARTIR.  (patudos di Joh.3:11 : Na tutu situtu do na hudok on di ho, huhatahon hami do na huboto hami jala huhatindanghon hami do naung huida hami). Anggo ndang diboto angka na masa alai olo gabe saksi, on ma didok panindangion na palsu jala jorbut do uhum na mangonai tu ngolu na sai manghatindanghon hata na so tutu ( 2 Tim.2:16-17; didok disi songon baro=penyakit kanker).

Ay. 6   dijadihon do hita gabe harajaon Hamalimon ni Debata. Tangkas do dipatuduhon songon dia status angka na porsea i. Ai naung dipaunsat do hita sian hahomomon gabe na badia. Molo tapatudos songon na didok Apostel Petrus : Alai marga na pinillit do hamu, hamalimon na raja, bangso na badia…(1 Petrus 2:9). Boasa didok hita malim ni Debata? Siala hita angka na porsea jala naung manjalo haluaon sian Debata gabe parhitean ni Debata asa mamboan saluhut jolma i tu Debata, dipasahat Jesus do tugas tu hita taringot tusi (pat.Matius 28;19-20, Markus 16:15: Ul.Ap.1:8).

Ay.7    ditaringoti do haroro ni Kristus paduahalihon (the second coming manang eskaton) dison, On ma songon apul-apul dohot las ni roha tu angka na porsea dibagasan Goar ni Kristus, jala uhum na bolon tu angka na so porsea i. Dipabotohon do songon dia haroroNa aduan marhite dibagasan ombun, Ombun boi do songon tudos-tudos i taringot tu hadirion (keberadaan) ni Debata, ai di Padan Robi haroro ni ni Debata boi do marhite alogo, api dohot angka na asing, alani diarahon do haroro ni Jesus i dibagasan ombun i na manggombarhon tu HamuliaonNa, siala haroroNa naparjolo i dibagasan haleaon dohot hapogoson do.

Laos boi do nadidok disi ima patuduhon hasisintong haroroNa aduan. Sian mulana pe nunga dihatindanghon songon dia rupani haroro ni Kristus i, didok do : Ahu do i, jala idaon muna do Anak ni Jolma i hundul di siamun ni hagogoon, jala  ro marhitehitehon ombun na di langit (Markus 14:62), jala dihatindanghon angka suru-suruan ido muse ima di tingki nangkok Ibana tu banua ginjang, songoni ma muse tuat tu toru  (pat.Ul.Ap.1:9 – 11). Didok do muse idaon ni nasa mata do Ibana. Lapatanna, ndada holan patamorgana i  manang ilusi i, jala didok do angka na manullang Ibana pe ima soldadu rom na  tingki di golgata i marnidasa. Adong do sungkun-sungkun dison? Ai songon dia ma jolma sude na adong di portibi on mamereng i, ai bulat do bumi on? Alus tusi, ai ndang adong na so tarpatupa Debata (Lukas 1:37), jala molo ro tingki i ai boi do bahenon ni Debata songon dia asa dibereng saluhut jolma Ibana.  

Jala molo ro tingki i didok do muse laos gabe mangangguhi be ma saluhut bangso ni tano on mida Ibana, ima tu angka na so sanga manesa dosa, jala mabiar tu uhum na dipasahat tu ngoluna be, alai marlas ni roha jala marolop-olop do angka na porsea i. (pat.sakaria 12:10-11)

Ay.8    Didok do Ibana bonana dohot ujungna (alfa dan Omega = ima gombaran 23 huruf  na dibagasan hata Gorik, alfa ma parjolo jala omega parpudi, paboahon sian bona dohot ujungna). On ma patandahon diriNa na manongtong i, ndang songon na adong di portibi on holan parsatongkinon do saluhutna (fana). Ahu do Bonana jala Ujungna, ninna Tuhan Debata, Debata nuaeng, Debata naung adong hian, na naeng ro i, Sigomgom saluhutna! (Pangk 1:8), marlapatan holan Ibana do na marhak laho patontuhon langka dohot ngolu ni saluhut na adong di portibi on. Boasa ? ala Ibana do na manompa dibaheni Ibana do na patut pasaehon/ mangujungi hombar tu lomo ni rohaNa.

Skopus (sipahusorhusoran)

1.      Nunga sahat hita tu minggu ujung taon huria, andorang so bongot hita tu minggu advent (panomunomuon), jala laos dipadomu tu parningotan di angka naung monding, na pabotohon tu hita ia ngolu ni jolma i martingki, terbatas jala marhaujungan do di portibi on. Holan Debata do na hot jala marhuaso di ngoluna ni portibi on. Marningot ma hita, naung songon dia diadopan ni Debata. Ture do pangalahongki manang ndang dope? Adong do hamubaon ni roha di hita, jala boi do hita gabe parhitean ni angka pasupasu tu na humaliang? Atik na mardosdos do parngoluonta, ndang adong hamubaon dope di roha jala ndang adong parasingan na masa sian taon tu taon.

2.      HabangsaNa manongtong ro di salelengna ima harajaon ni Debata na gok hamuliaon, hasintongan jala huaso laho mangulahon panguhumon. RimasNa boi do mangagohon dohot maniaphon saluhut na mambahen paraloan di joloNa, alai las ni roha do tu angka na satia jala na hot dibagasan haporseaonNa di Jesus ima dapotan hangoluan salelenglelengna,  songon nadidok panurirang Daniel. (pat.Daniel 7:9-14). Dibahen Debata ima di haroro ni sada anak ni jolma na martahuluk hasangapon, huaso dohot hamuliaon na manongtong laho mangarajai gabe Raja di tonga harajaon na hot ro di salelengnilelengNa. Tung saluhut bangso do unduk diadopanNa, di jolo ni Anak naung gabe Jolma i, ima Jesus Kristus (Pangk 1:4b-8). Harajaon ni anak i, ima harajaon ni Ama naung dipasahat tu Ibana, jala sahat do harajaonNa i tu na so suda arina. Na so tupa munsat do sian Ibana harajaon i, jala na so tupa pesan do harajaonNa.

3.      Patuduhon songon dia Debata marhuaso di portibi on, ndang adong na boi martabuni sian joloNa. Marhite turpuk on, naeng ma sian haporseaon hita marpos ni roha di na so adong biar ni roha mamereng na masa on, ai mansohot do gogo nasida jala suda do ariarina, parsatongkinon do hasianganon. Molo porsea hita di hata ni Debata, sai na lehononna do gogo di hita asa hot marhasatiaon jala marbenget ni roha sahat tu haroro ni Jesus Kristus paduahalihon ima manguhumi di angka na mangolu dohot na mate, na jahat dohot na sintong. Amen       (h2pb2)