JESAYA 54 : 14

JESAYA 54 : 14

“Ingkon marhite sian hatigoran do ho pahoton sogot; dao ma sian ho pangarupaon, ai ndang be adong habiaranmu, jala dao sian ho hasonggoton, ai ndang hajonohansa ho”

“Engkau angka ditegakkan di atas kebenaran. Engkau akan jauh dari pemerasan , sebab engkau tidak usah lagi takut, dan engkau akan jauh dari kekejutan, sebab ia tidak akan mendekat kepadamu”

Godang do hita molo songgop angka parungkilon, isarani angka sahit, persoalan angka ianakhon nang angka parkarejoan, tarlumobi molo tung mansai borat situtu na tahadopi i mambahen ganggu rohanta tarlumobi haporseaonta.. Gabe tinggil do rohanta manangihon soara na adong di portibion, mangido pangurupion sian jolma dohot sian angka na asing i. Molo didok boasa ndang tu Debata mangido pangurupion? Didok do nunga sai dipangido alai songon na so adong do alusNa, jadi niluluan ma angka na adong di portibi on. Ai didok do ingkon marbisuk hita? Hape dung dipangido pangurupion sian jolma dohot portibi on boi ma mangurupi hita satongkin, alai sai ro ma muse angka parungkilon na asing jala naumborat muse sian parjolo i.

Debata ndada hea pasombuon ngolunta, tung ganjang do tanganNa laho mangurupi hita, jala tu bidang do rohaNa manjangkon hita, alai ndada ingkon songon lomo ni roha ni jolma na saut, holan hombar tu lomo ni roha ni Debata do. Manang songon dia pe alus ni Debata, ido alus na dumenggan. Songon didok di Jeremia 29 : 11 “ai nunga tangkas huboto sangkap ankga na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna”.

Ima holong ni roha ni Debata na gabe jaminan di ngolunta on. Na pasti pertolongan ni Debata ndada hea terlambat nang pe di rohanta be songon na palambathu do. Alai ditogihon do hita asa tongtong dibagasan roha na marbenget manang aha pe na masa. Ai nunga tangkas dipaboa angka na naeng disangkapi Debata di ngolunta, alani do asa tongtong hita dibagasan roha na paimaimahon. Ndada holan sadari, sabulan, manang sataon alai ingkon manongtong do rodi salelenglelengna. (Patudos songon si Abraham, si Hana na paimaimahon ianakhon).

Songon ido na masa di bangso ni Debata na tarbuang di huta ni halak jala dibagasan parungkilon bolon do nasida. Pasti nunga mago be haporseaon nasida, jala dibagasan pandelean ngoluna nasida. Ai molo nunga dibagasan pandelean jolma i manang aha pe na masa di ngoluna ndang parduli be. Marsigantung tu sibara (nasib), ia tudia diboan nasib tusi ma? Hape hita na porsea on ndada marsigantung tu nasib, alai marsigantung tu Debata do. Ai dibagasan Debata do adong kepastian nang jaminan.

Didok do angka na masa di tonga-tonga ni bangso i, holom, mabiar dohot dibagasan pangarupaon (pemerasan). Songon didok pepatah Indonesia i : sudah jatuh di timpa tangga, dan ditempa genteng pula. Lapatanna, nunga dibagasan matematene (antara hidup dan mati).

Ndada dipasombu Debata jolma i sai dibagasan haporsuhon manang parungkilon i, tarlumobi di angka na joujou di GoarNA nabadia i. Tongtong do tinggil pinggolNa laho manangihon angka alu-alu ni angka na porsea nang pe holan saotik na porsea di Ibana. (taingot ma jolo ditingki tawar-tawaran si Abraham dohot angka suru-suruan i taringot na naeng masa tu huta Sodom dohot Gomora). 

Sian cerita i boi do patudosanta di ngolu on, anggo sasintongna nunga ingkon godang inganan dohot keluarga hancur dibahen sibolis i, alai ala sai adong dope sada manang manang dua halak martangiang gabe mambiar sibolis malengsenghon saluhutnai. Ido umbahen ingkon sai torus ma hita pajongjonghon parsaoran na rosu dohot Debata. Holan ido sinjata dibagasan ngolunta on.

Didok do “ai munsat pe angka dolok, jala humuntal angka robean, alai anggo asiasingku na so tupa munsat sian ho, jala padan ni hadameongku na so tupa humordit, ninna Jahowa siasii ho” (Jesaya 54:10).

Marhite sian hatigoran di pahot, jala dao do sian pangarupaon, jala ndang be habiaran. Ai ndada hea munsat holong ni roha ni Debata asal ma hita manongtong manghaposi Ibana di ngolu on. Tapaloas ma Debata mangula hombar tu lomo ni rohaNa dibagasan ngolunta on.

Laho mangantusi pambahen ni Debata di ngolu on, adong do sada cerita na disurathon Joel Osteen di sada bukuna “Your best life Now”. Diceritaon do sahalak raja sian Arab Saudi dijou ma sahalak aleale na na mansai tangkas laho mar-golf. Jala tung songoni ima las ni roha Raja on rap margolf dohot ale-ale nai. Alani didok raja i ma tu Ibana, pangido ma aha na dihalomoon ni roham? Alai didok alealenai ma, ndang pola, holan diontang ho pe ahu tuson margolf dohot ho nunga tung mansai las situtu rohangku. Alai margogo do raja i mandok : pangido ma? Jadi ro ma aleale ni raja i mangido didok ma : hukoleksi do godang nuaeng tongkat golf alani lehon ma sada di ahu? Dung mulak nasida, sai marhusari ma dibagasan roha ni aleale ni raja on, pasti do lehonna raja i tungkot na berlapis berlian dohot emas, ninna.  Dung piga minggu, dijalo ma surat sian raja i, hape dibagasan surat i adong akte tano bidangna 232,2 hektar di Amerika. Laos didok ma di surat i : on ma hupasahat tu ho.

Songon ido Debatanta i, molo boi sonang tabahen Ibana songon alealena hita, ndada holan ale-alena laos anakhonna do hita. Ndada holan dipasahat hombar na tapangido, gariada lobi sian i jaloonta. Tauji ma di ngolunta on, molo holan na tapangido dipasahat Debata tontu sai torus do hahurangan ngolunta, alai dilehon do dao sian pingkiranta. Tabereng ma, pengorbananNa di ngolunta, dilehon tu hita hosa, dilehon tu hita ngolu, dilehon do tu hita haluaon. Nda tung umbalga i sian holan mangido pasupasu, hahipason dohot angka ganjang ni umur.

Beta ma hita sai mandok di ngolunta on asa hombar na dipasahat Debata ma tajalo. Asa unang torus manarita ngolunta, asa unang sai kecemburuan hita mamereng jolma di portibi on. Hea do angka dakdanak sikola minggu didok guruna asa dibuat be angka permen na adong di meja guru i. Jadi marlomba ma angka dakdanak mambuatsa, alai adong do sahalak dakdanak, sai siip. Boasa ndang dibuat ho? Didok dakdanak on ma : lomo rohangku molo guru ido na mambuat tu ahu? Marnida i, ro ma omakna manungkun : boasa, ndang ho mambuat songon na didok guru mi? didok dakdanak i ma muse : molo ahu do mambuat pasti do otik, ai metmet do tanganku? Alai molo guru na mambuatsa pasti do gumodang. Songon ido Tuhan, molo tapaloas ingkon hombar tu lomo ni rohaNa pasti do na denggan i , jala hasonangan do saluhutna i. (pat.Jer.29:11).

Tontu ndada hea mulus-mulus ngolunta di portibion, sai marganti soring do angka na masa di pardalanan ngolunta. Alai manang aha pe na masa ingkon do manongtong hita manghaposi Debata. Unang meret anggo Hata ni Debata sian ngolunta. Jala sai tongtong hita paimaimahon manang aha do na naeng sibahenon ni Debata. Sambil hita mangula, berusaha jala tongtong dibagasan lomo ni roha ni Debata, laos disi do hita dipanghulingi Debata.  Tiada satupun kekuatan yang bisa membuat kita kalah, kita akan ditegakkan di atas kebenaran, jauh dari pemerasan dan kekejutan. Amin