Tema
Manghalashon Taon Parolopolopon
Andorang so bongot bangso Israel tu tano Kanaan ima tano na dipadanhon Debata tu Ompu nasida sian parjolo, dijalo si Musa do parenta sian Debata di dolok Sinai ima patupaon parningotan Sabbat. Sabbat lapatanna maradian, ndang mangula, di hata Heber na didok (haresh) sian on muncul Hata Rest = istirahat, ido umbahen molo mate halak Luar negeri sai didok RIP (rest in peace=beristirahat di dalam damai); alai diistilah Gorik, Sabbat didok ma Sabbaton manang hari ke-7. Somalna Sabbat dilapati songon : 1) Parningotan tu jolma asa maradian sian ulaonna laho pabadiahon Ari i laho marparsaoran tu Debata. 6 ari ma hamu mangula alai ari Papituhon i ima ari napinarbadiahon mu tu Debata Jahowa (patudos tu patik IV di 2 Musa 20 :9-10). Ditogihon hita asa mamilangi angka ari-arinta asa dapotan roha na bisuk hita. 2) Sabbat naumbidang muse ima taringot Paluahon Tano (pembebasan tanah), lapatanna 6 taon ma diula tano i alai taon papituhon maradian ma diula tano i songon na somal. Jadi dibagasan 6 taon i botul-botul na dipake tingki i laho mangulaon tano i alai di taon papituhon maradian (berhenti total); dungi dipake angka hatoban dohot pinahan laho mambuat sian hasil ni tano i dbagasan taon papituhon i. Godang do ahli ekologi ima ahli di bidang ekosistim mandok molo dibahen maradian tano i humgodang do hasilna sian molo sai torus dipake. Songoni do ngolu ni jolma molo adong tingki maradian, humgodang do na boi diulaon sian na sai torus mangula ndang adong tingki maradianna. Alai ndang pola tusi naeng maksud Sabbat on, alai roha na manghaporseai molo sai taihuthon parenta manang tona di Debata sai na dipatuduhon do pasupasuNa. Alus ni Debata taringot na mangulaon Sabbat on ima di 3 Musa 25 : 20-21 i :”Tung sura dohononmuna : Tung aha ma panganonnami di taon papituhon i, ai ndang jadi hami manabur, jala ndang jadi hami papunguhon gogo ni tanonami? Ingkon dohononHu ma pasupasungKu songgop tu hamu di taon paonomhon i, asa tubuhononnna gogona di hamu singkop tolu taon”.
Pusupusu ni persoalanna ima : Tahaporseai do Hata ni Debata manang ndang ?
Taon Sabbat ingkon do dilapati songon tanda Teologi Perjanjian jala berhubungan tu teologi Penciptaan. Boasa ? siala sabbat ima songon parpadanan ni Debata tu bangso napinillitNa asa patuduhon Debata hasation nasida mangihuthon Debata.
Napaduahon, didok ma taon parolopolopon manang taon Jobel (Yobel) ima taon pa-50 taonon na nietong pitu hali pitu taon paradianan Sabbat. Hata Yobel (hata ibrani : Yovel lapatanna Domba Jantan). Hata on marharoroan sian manghuling ma sarune, ia sarune on dibuat sian Tanduk birubiru jantan. Taon Jobel ima Taon na khusus adong do 3 ulaon disi ima :
a. Taon Pembebasan. Ia dibagasan na sataon i di taon palimapuluhon sude jolma manjalo haluaon (kebebasan) songon silehon-lehon tu Debata; angka hutang dohot paulakhon sede arta ni halak na gabe targade ala ni hutang; angka naposo (hatoban) ingkon paluahon. Dison ma tingkina sude jolma manjalo Hak na ima Kemerdekaan.
b. Taon mulak muse tu tano na. Sude tano ingkon mulak do muse tu nampunasa.
c.
Taon parolopolopon tu Debata. Ia saleleng on nunga dijalo nasida angka pasu-pasu sian Debata marhite angka ulaonna be; jadi di taon on ndang mangula nasida manang aha pe; alai botul-botul nasida mandok mauliate tu Debata.
Mangulaon taon Sabbat dohot taon parolopolopon ndada gabe pilihan di hita, lapatanna boi diulaon manang ndang, alai wajib do hukumna siala parenta langsung Debata do i tu hita. Boi gabe sungkun-sungkun dirohanta be, ingkon do ulaon saluhutna i manang ndang? Lapatanna jotjjot do hita gabe ganggu siala parenta na di Padan Narobi do i, hape hita nunga mangolu dibagasan padan naimbaru. Alai sadalan do i Padan Narobi dohot Padan Naimbaru, ai so boi adong Padan naimbaru molo so adong padan narobi i. Holan i angka prinsip-prinsipna ma na ingkon togu taulahon ndada gabe 100 % ingkon ulaon saluhutna i. Contoh : ra, molo didok ari papituhon ima ari tu Tuhan i tontu ndang gabe susah hita laho mangulaon i, songoni molo didok di tingki taon paroloolopon ndang manjalo singir (laba) sian angka na marutang tu hita alai modal na i pe tajalo nunga luar biasa i. Siala nunga pasti maruntung hita saleleng 49 taon, tabahen ma i gabe pasupasu tu halak, jala mandok mauliate tu Debata. Na maol mungkin na paulakhon tano na gabe milikta sian puna ni halak dohot arta na digade on halak siala ni hutang.
Alai molo tahantusi teologi na umbagas sian lapatan ni taon Sabbat dohot taon parolopolopon i ndada gabe manghambati manang gabe batu na balga i di ngolunta asal ma porsea hita di huaso dohot hagogoon ni Debata.
Hahonaan ni Jamita
1. Debata do na tahaporseai songon na manompa dohot marmudumudu ngolunta sahat tu ujungna. Dibagasan pardalanan ni ngolunta i dijou jala dipillit Debata do hita bongot tu bagasan parpadananNa. Molo di Padan Narobi dipatuduhon do i songon pamilliton ni bangso Israel, alai nuaeng nunga bongot hita dibagasan parpadanan dohot Debata marhite AnakNa Tuhan Jesus Kristus.
2. Alani i molo nunga dibagasan parpadanan dohot Debata hita, angka na ditonahon Debata naeng do dohot taulahon. Songoni na mangulaon Sabbat dohot taon parolopolopon; laho patuduhon hahunduhonta dohot hasatiaonta mangihuthon parenta ni Debata. Sabbat ima songon Jaminan na dibahen Tuhan laho patuduhon hagogoonNa dohot marmudu-mudu ngolunta.
3. Angka na hunduk jala satia mangulaon na didok Debata ima na manghaporseai na binahen ni Debata dibagasan ngoluna. Laos ido didok di Matius 6 : 33 “”Sai jumolo ma lului hamu Harajaon ni Debata dohot hatigoranNa. Dungi tambahononNa do sude angka ondeng tu hamuna”.
4. Angka na mangulaon Sabbat dipatuduhon do hita mamasuhi sada fase ni ngolu na dibagasan krisis, alai unok naumbagas ima asa unang di rajai holsoan, hatahuton dohot biar ni ngolunta. (patudos di Matius 6:19+20; 25+32).
5. Ndang boi ngolunta on holan na marpos ni roha tu pingkiran dohot gogonta, alai holan tu Debata do. Anggo so tu Ibana be hita marpos ni roha di ngolu on tu ise ma pos ni rohanta, ai gari ngolu on martingki be do sude , suang songoni na markeluarga dohot na marale-ale manang tu ise pe?
Tidak ada komentar:
Posting Komentar