Tema
“Naung dihaholongi Debata hita, ingkon do hita masihaholongan”
Manghatai Holong ndang boi malua so manghatai Debata. Boasa ? siala holong i ima Debata, jala holong i marharoroan sian Debata. Dipatuduhon Debata do HolongNa na so halompoan dohot na so hatudosan i, disuru AnakNa sandiri ima Tuhan Jesus laho manghaholongi portibion asa ditanda portibion jala sumuang muse laho masihaholongan. Holong na pinatuduhon Debata ima holong na rimpas jala ndang adong disi embel-embelna, asa angka ise pe na manghaporseai Debata ingkon do mangolu dibagasan holong.
Nang pe parsiajaran taringot tu Holong ni Debata (Agape) nunga dipatuduhon tu portibion alai maol do jolma patuduhon di ganup ni ngoluna roha na masihaholongan i. Sai na martambah do bilangan ni halak Kristen alai lam moru do roha na marsihaholongan i. Sude do halak Kristen malo patorangkon holong alai songon na otik do halak na mangulahon holong songon Debata. Hasomalan na masa di portibion jotjotan dope holong na dipatupa ima holong na adong maksudna (holong gomak = godang maksudna) manang holong marnida bohi. ido umbahen lam tubu di roha ni jolma nuaeng on sifat “homo homini lupus = manusia menjadi serigala bagi manusia lain. Lam tubu ma egoisme, pasintong-sintongkon diri, sai manguhumi halak na asing, ujungna lam dao ma jolma sian angka sangkap ni Debata
C H Dodd mandok hira segitiga do holong i, ima na manghaholongi Debata, manghaholongi dongan jolma dohot na manghaholongi dirinta sandiri. Dalan laho patuduhon na holong rohanta tu Debata ndang boi ndang so manghaholongi dongan jolma doshon songon na manghaholongi dirinta sandiri. Songon didok turpuk on “pargabus do halak na mandok : holong rohana tu Debata hape dihosomi do donganna” ( 1 Joh.4:20a). Molo didok pargabus ndang na neang i alai tung mansai jorbut do i, siala dosa na mansai borat do i. Taboto dosa na parjolo diulaon jolma ima na margabus. Margabus do si Hawa dohot si Adam tu Debata asa unang dipangan naung diorai Debata, margabus do si Kain na mamunu angina si Habel. Tung mansai muruk situtu do Debata pola do gabe dipalao sian inganan na pinarbagabagaNa i.
Aha do gunana molo burju hita manghaholongi ?
1. Marhiras ni roha jala ndang mabiar di ari paruhuman i (ay.17)
Di ujungna masa do paruhuman na pinatupa ni Debata tu sandok portibi on, jala marguru tu naniula na be do paruhuman na masa tu jolma i. Ise ma na boi dirgak disi? Tutu ima halak na mangulahon holong di ngoluna. Songon didok apostel Paulus “asa tolu do na hot ima haporseaon, pangkirimon dohot haholongon, alai haholongon do na umbalga i” (1 Kor.13: 13); apostel Jakobus pe mandok “Haporseaon ipe songon ido : anggo so adong pangulaoona, naung mate do hadirionna” (Jak.2:17). Jala lam tangkas do boi berengonta di Evanggelium Matius taringot tu ari uhum sogot didok disi :”Nasa na binahenmuna tu sada sian anggingku angka na metmet on, na tu Ahu do i dibahen hamu” (Mat.25:40b).
2. Mago ma nang biar (ay.18)
Biar ima parbue parjolo alani mangulaon dosa. Jala ido na mambahen hita godoron (songon na dilelei/dibayang-bayangi) angka parulaonta i. Hape di angka na porsea ndang adong be roha mabiar siala nunga talu be “maut” dibahen Jesus. Barita taringot tu hasosorang ni Jesus pe tu portibion didok do :”Unang hamu mabiar” (Luk.2:10). Alani naeng ma hita mian dibagasan Debata jala mangula hombar tu halomoan Debata asa mago biar di ngolunta. Halak na jotjotan biar ngoluna ima na so mian ngoluna dibagasan Debata jala Debata pe ndang mian di ngoluna. Molo nunga mian hita dibagasan Debata jala Debata pe mian di ngolunta tontu marpangulaon ma ngolunta songon na niigil Debata. Ujungna dao ma ngolunta sian angka sangkap-sangkap na roa dohot na jahat. Hubungan dohot Jesus pasti do marparbuehon angka parbue na denggan. Songon hau anggur i ndang boi sirang rantingna sian batangna.
Halak Kristen naeng ma lam tambah umur lam naik kelas songoni di haporseaon nang di pambahenan asa lam rimpas hita mananda holong songon na pinatupa ni Jesus. Unang ma sebalikna halak Kristen lam godang tinggal kelas di haporseaon dohot angka parulaonna. Godang do jolma nuaeng on sai lomo rohana di situasi zona aman (comfort zone), ima na holan mangalului parsaoran na salevel, sependidikan, seagama, seetnis, sehobi. Tabereng ma jolo godang jongjong angka na margoar group-group, kelompok-kelompok dohot gang-gang di portibion. Hape ro do Jesus tu portibion maninggalhon zona aman i ima Surgo asa marsaor dohot sude jolma manang songon dia pe pangalaho ni jolma i. Songon na mangihuthon Jesus hita naeng ma borhat hita sian hasomalan dohot ingananta na eksklusif i gabe terbuka jala boi masuk tu sude houm dohot bangso.
Halak na mangulaon holong i pasti do jumpang las ni roha. Molo tangkas masihaholongan na marsaripe, marianakhon, na sapunguan dohot huria mago ma angka kecurigaan, haginjangon ni roha, roha na na so denggan dna. Didok angka na malo : Orang yang paling bahagia adalah orang yang mau menolong orang lain. Dungkon i tangkas ma hita ale-ale ni Jesus na sumurung. Ai holong i ima manifestasi = penjelmaan ni Debata dibagasan Jesus. Molo didok ale-ale ima na tangkas mamboto angka na masa di dongan, na olo mangurupi dibagasan hasusaan ni halak jala boi rap marlas ni roha di las ni roha ni dongan. Ndada sarupa i songon na niondolhon angka punguan halak hita na sai mandok : si sada anak, sisada boru; jala sisada arsak dohot las ni roha” jotjotan nama diida holong na marnida bohi do. Holan na rap mangan do berengon ribur jolma (ipe nunga lam moru), alai anggo di tingki na rap manumpahi pintor manabuhion bohina be do, lam ma molo dibagasan hasusaan angka jolma i, olo ndang tarida be (manang siip sude).
Sasintongna mangulaon holong i ndada pintor sian na balga alai tamulai ma sian angka na metmet sian dirinta be, alai lam leleng lam meningkat. Molo ndang tarbahen manumpahi marhite ekonomi, ndang manghurangi las ni roha ni dongan molo tapatupa marhite na manangiangkon dohot bersikap na manjangkon nasida dibagasan halambohon dohot haserepon ni roha.Dungkon i boi do tamulai sian na jumonok tu hita ima angka keluarga, angka na sahaporseaon dohot angka na asing. Molo nunga boi bahenonta sian angka hal-hal na metmet dohot sian tonga-tonga ni ngolunta, rajuman ma boi muse ulaonta tu na umbalga sian i. Amen
Tidak ada komentar:
Posting Komentar