Psalmen 34 : 5

“ Hulului do Jahowa, jadi dialusi ahu, jala dipalua ahu sian angka hagogotanku sudena”
“ Aku telah mencari Tuhan, lalu Ia menjawab aku, dan melepaskan aku dari segala kegentaranku”


Panindangion ni si Daud secara pribadi do turpuk jamita on. Godang do dijalo ibana angka pasupasu na sian Debata. Dipalua Debata do ibana sian hagogotan. Dipalua do ibana sian tangan ni angka alona manang musu na.
Persoalan si Daud marmula do sian Kesuksesanna songon soldadu Raja Saul. Di mulana i, dilehon Raja Saul do tu ibana tugas (kepercayaan) laho marporang maralohon angka musuh ni bangso Israel, tunduk do dibahen si Daud angka alo ni bangsona i alani hagogoon dohot hamonangan na pinasahat ni Debata tu tanganna, nang pe tung gogo situtu angka musuh na i. Mulai sian i ma gabe tarbarita ma goar ni si Daud di sandok bangso Israel, tubu do sada ende sian angka parompuan ni Israel na manggombarhon kehebatan ni si Daud on mandok :”Si Saul manaluhon marriburibu halak, alai anggo si Daud marloksaloksa do ditaluhon” ( 1 Samuel 21:12). On ma mambahen gabe tubu hansit ni roha raja Saul laos disangkapi ma laho mamunu si Daud. Ujungna on ma muse dalan ni si Daud gabe maporus tu sada luat tu luat na asing sahat tu huta Gad, musuna i. Di jolo raja Gat na margoar Akhis, molo di psalmen 34 on didok raja Abimelek (ay.1) hombar tu pandapot si A. F. Kirkpatrick, The Book of Psalms (Grand Rapids: Baker Book House [cetak ulang], 1982), hlm. 170. Didok ibana dos do raja Akhis manang Abimelek i. Akhis dijou manang digorahon ma Abimelek songoni na sebalikna. Asa maksud niba disi ia sasintongna psalmen 34 on ima na digombarhon sian 1 Samuel 21 : 1 – 16). Dina pajumpang si Daud dohot Raja Akhis pola dipaasing ibana pangalahona jala lalaen ibana, dipaula mangaruntarunta jala diransangi angka hinsuhinsu, jala mabaor gubogubona dibahen tu janggutna (pat.1 sam.21:14).
Nian ndang pola tangkas diiba aha do umbahen gabe songon na dipaasing si Daud pangalahona di jolo raja Gat gabe songon jolma na gila ibana. Alai sahalak ahli teologi na margoar Leupold mandok :Daud mengambil jalan ragu-ragu dan bijaksana” H. C. Leupold, Exposition of Psalms (Grand Rapids: Baker Book House [reprint], 1969), p. 278. ujungna ima dalanna gabe malua ibana sian parmaraan raja Gat.
*Hamu angka dongan, ruas sinode Distrik*
Marhite balga dohot godang ni pangurupion na jinalo ni si Daud sian Debata, gabe sahat do ibana tu pangantusion dohot panindangion na rimpas taringot tu Debata, ia pangurupion na tu ibana ima holan sian Jahowa Sitompa langit dohot tano on sambing do.
Sian panghatindanghonon ni ibana on, boi ma dohonon, ndang tarsirang si Daud sian pamujionna tu Debata. Mangolu dibagasan pamujion i do ibana. Dipamujionna tu Debata i do gabe gogo di ibana mangadopi hamaolon na jumpang di ngoluna. Dirajumi ibana do sude na masa di ngoluna diboto Debata jala diurupi do ibana. Alani i tama situtu do di rohana pujion Debata di hasangaponNa i.
Didok si Daud do: ‘Pujionku ma Jahowa sipatsipat ni ari, sai tong ma pujipujiana dibagasan pamanganku” (ay.2). sipatsipat ni ari dihata Inggrisna didok “All the time” lapatanna segala waktu. Ndada marsangombas ibana mamuji Debata, manang holan di tingki na sonang alai tung dipataridahononna do i di situasi manang aha pe tarlumobi di angka parungkilon na manosak na ro tubagasan ngoluna.

Tangkas do tu ise si Daud marpangidoan ima tu Debata na ni haposanna, ndang tu debata na asing na so tangi dijoujouna. Ala tangkas do alamat pangidoanna i, dihilala ibana ma na sahat do sombasomba na i, jala ditangihon Debata do ibana; ditangihon Debata do joujouna; ditangihon Debata do sombasombana.

Parsaoran na denggan dohot Debata patubuhon panghaposion tu Ibana. Jala tangi do Debata di angka na manghaposi Ibana. Parsaoran na so denggan dohot Debata mangambati roha laho pasahathon pujipujian tu Debata, jala ndang rade rohana laho manghatindanghon pangurupion na jinalona sian Debata.
Tung mansai singkop do pamujion ni si Daud on taringot tu hadirion ni Debata. Pola digoari ibana Debata songon Sipargogo. Lapatanna, Debata do na mangalehon gogo, semangat, hasabaron, dohot habengeton di ibana gabe tarbahensa mandalani ariari ni ngoluna, nang pe mansai borat diadopi ibana. Dihilalahi ibana do Debata songon Lombulombu (Perisai). Lapatanna, Debata do na mangondihon ibana sian angka hagogotan na masa tu ibana. Nang pe godang jala borat paraloan na ni adopanna, alai adong do Debata mangondihon ibana. Debata do Haposan di ibana, na satia ganup tingki manarihon na ringkot di ngoluna. Jala Debata do Partanobatoanna, na boi mangalehon haluaon na rimpas. Dihaposi ibana do dibagasan Debata adong haluaon ni tondina, jala ndang adong boi manang ise mangagohonsa.

Tung luhut do ngolunta on diramoti Debata. Di ganup tingki do Debata patuduhon pangurupionNa. Alani i, ingkon hangoluhononta do ngolu pamujion tu Debata. Mamuji Debata, na marlapatan do i, manghaposi jala rade manghatindanghon na gok do pangurupion ni Debata na tajalo dibagasan ngolunta i. Mamuji Debata marlapatan, rade mangulahon sangkap ni Debata; ungkap rohana mangido hagogoon sian Debata, ndang mangasahon dirina; ndang sian na asing luluan angka pangurupion. Jotjotan do hita nuaeng on parjolo mangalului pangurupion sian halak manang hagogoon na adong di portibi on, i pe molo nunga mentok manang na so adong be pangurupion na tarbahen angka jolma dohot hagogoon na adong di portibi on, baru pe tajou Debata, manang Tuhan selalu menjadi Pilihan terakhir di dalam kesusahan kita bukan pilihan yang utama dan terutama.

Jotjot do hita terjebak di angka na boi diida mata paltak jala na boi masuk pikiran. Ujungna maol ma jolma i mamake mata rohani manang mata iman asa mamereng sisi ngolu na asing. Nunga ra hita mambege hata si songon on : Na tonggi unang pintor dibondut so tung na rasun i; na paet unang pintor dimutahon so tung na ubat i”. Lapatanna ndada saluhut pengalaman na paet dibagasan ngolu on mambahen hita gabe tung mansai dokdok hian manang panghilalaan songon naung mago. Alai ubat do i laho mambahen hita lam tegar, lam margogo, jala marpanghirimon dibagasan Tuhan i molo tahaposi sude dalan ni Debata na denggan i. (pat.Jeremia 29 : 11) “Ai nunga tangkas huboto sangkap na husangkapi taringot tu hamu ninna Jahowa, sangkap hasonangan do tahe ndada sangkap hamagoan”.
Di tingki na lam marsiajar hita di Hata ni Debata, laos disi do taboto diungkap Debata DiriNa songon Pangurupi (penolong) na parjolo di hita di angka parsorihon ngoluta i. Naeng ma nian tongtong hita dibagasan haserepon marroha jala tongtong lulululu rohanta i tu IBANA. Marsiajar ma hita sian si Daud on. Ingkon tahaposi do Hata ni Tuhan i na mandok “Ai ndang tarula hamu agia aha, anggo so mardonganhon Ahu” (Joh.15: 5). Amen