Senin, 10 September 2012

Matius 4 : 19


Yesus berkata kepada mereka : Mari, ikutlah Aku dan kamu akan kujadikan penjala manusia”
Di pardalanan ngolunta di partingkian sinuaeng on tung mansai godang do jolma na mangarahon asa mangihuthon nasida. Adong ma i songon na mangalului karejo gabe dielek ma jolma na asing asa mangoloi ibana. Dipasahat do angka haulion dohot hinatabo molo mangihuthon ibana. Jala diperkembang jaman nuaeng on pe tung godang do angka iklan dohot reklame na mamboan hita asa tertarik mangihuthon i. ido alana adong budaya saonari na gampang manarik jolma asa diihuthon tusi. Hape olo do holan sugesti i manang hipnotis sambing.
Turpuk on pe mangarahon dohot manjouhon jolma i laho mangihuthon Jesus. Di Ulaon na parjolo dipatupa Jesus dung mamolus pangunjunan na dibahen sibolis ima laho mamillit angka siseanNa. Panjoun na diulaon Jesus marasing situtu do tu panjouon na pinatupa portibi on. Panjouon Jesus ndada holan patabo parbinegean dohot pasonang-sonang roha. Alai panjouon ni Jesus ima tu sada tanggungjawab manang ulaon na ringkot sipasahaton jesus tu angka na dijouNa.
Taboto do ulaon parjolo sian angka sisean i ima songon panjala dengke. Hasomalan nasida mangula ditongatonga ni galumbang dohot tao nunga marurat di ngolu nasida. Tung mansai maol do i molo munsat manang marhusor sian angka hasomalan naung diparmudarhon. Boi do masa paralohon na mansai bagas siala ndang dope diboto nasida ulaon naimbaru i.
Panjala jolma ima ulaon laho mamboan angka jolma tu bagasan Harajaon ni Debata. On ma tugas naimbaru na naeng siulaon ni angka sisean i. Tontu ndada na neang i  tung mansai borat do i. Siala jolma nunga adong pilihanna sandiri, nunga adong pikiranna sandiri jala bebas do nasida manontuhon lomo ni roha na. Diboto nasida do hamaolon na naeng siadopan nasida alai dioloi nasida do i (boi tabereng ayat na mangihut). Boasa pintor dioloi nasida panjouon i? Ndang pola tangkas di bibelta boasa pintor dioloi nasida i. Alai na boi berengonta ima na mangolu do sian bagasan roha nasida panjouon ni Jesus i. Boi dohonon niba na mangula do Tondi ni Debata dibagasan roha nasida.
Marhite turpuk on diondolhon do tu hita ringkot ni panjouon ni Jesus di ngolunta. Na parjolo, na dijou do hita sian haholomon tu hatiuron ima lapatan ni huria (eklesia), jala ndada holan tinggal hita disi alai dohot do hita ingkon mangula. Boi do hita gabe parhalado, parhobas manang pelayan. Di hurianta HKBP didok adong dua ragam parhalado ima parhalado partohonan (pandita, guru huria, Bibelvrouw, Diakones, Sintua dohot Evangelis), dohot parhalado na so partohonan ima songon pelayan di sikola minggu, guru koor, pemain music dohot angka na asing.  Nang pe Lansia (lanjut usia) ndada mandok ndang boi hita gabe parhalado manang panjala dengke, justru dihatuonta i do jala di pardalanan ni ngolunta na mar-Tuhan on boi gabe jamita na mangolu tu angka sundut naumposo.
Di godang ni angka ulaon dohot tuntutan ni ngolu di partingkian si nuaeng on ndang be taharingkothon ulaon panjouon ni Tuhan i. Hape  tona ni Jesus na mansai ringkot do i. (boi patudosonta di Matius 28:19 – 20; Markus 16:15; Johannes 16:15 ; Ulaon ni Apostel 1:8). Ndang tarbahenta manulak panjouon ni Tuhan i di sepanjang ni ngolunta siala nunga ampe di hita be tugas i mulai sian tardidi, sidi, dohot tardok songon halak Kristen.
Ra boi do hita mandok : Nunga lansia ahu/hami, jala nunga pensiun, ndang tolap gogonami be gabe sitindangi ni Jesus di portibi on. Ndang huboto manang adong do hita mandok songoni? Jala sai sungkun-sungkun di rohanta be : Aha ma naeng siulaon nami. Parjolo, ingkon rade do hita. Molo nunga taoloi jala rade rohanta ndada umur manundati ulaon ni Tuhan, laos dipake Tondi ni Tuhan Ido hita pasauthon ulaonna. Molo di umur, toho naung matua hita, jala molo di ulaon nunga pensiun hita, alai molo di ulaon ni Tuhan ndada hea pensiun hita. Songon lansia hita boi do hita gabe ula-ula ni Debata di angka poda, pangajarion (marturi-turian) tu angka pinomparnta be taringot tu Hata ni Debata. Jala gumodang do panghorhonan di ngolu angka pinomparnta be sian angka jolma na asing. Alani parjolo ma hita gabe hataridaan panjouon ni Tuhan i di ngolunta siganup ari tarlumobi di tonga-tonga keluargata be. Asa lam marsangap goar ni Tuhanta jala lam torop jolma na porsea tu Debata. Amen
Sungkun-sungkun
1.       Aha do na jotjot mambahen hita sundat na gabe panjala ni jolma?
2.       Angka dia ma na boi sipatupaonta di tingki na dipasahat Debatanta tu hita be?

Tidak ada komentar:

Mazmur 84 : 1 - 7

Mazmur 84 : 1 - 7 84:1 Untuk pemimpin biduan. Menurut lagu: Gitit. Mazmur bani Korah.  84-2 Betapa disenangi tempat kediaman-Mu ,  ya ...