Senin, 10 September 2012

Jesaya 50 : 4 - 9a


Patujolo
Somal do turpuk on digoari Ende naposo ni Debata/nyanyian hamba Tuhan (ebed Jahweh), alai dijou ma dibagasan turpuk on naposo ima sisean ni Debata.   Ise do na didok dison naposo ni Debata manang sisean i?  Angka penafsir mandok adong do 4 (halak) na dijou naposo ni Debata di bagasan turpuk Jesaya on (pat.di Jesaya 42:1-6; 49:1-6; 52:13 – 52:12) adong ma i didok dison : si-Jesaya sandiri, na asing mandok sahalak naposo ni Debata na so diboto goarna, adong muse na asing mandok ndada sahalak  jolma alai punguan na sai tongtong satia di Debata, jala parpudi martudu-tudu do turpuk on tu Jesus sandiri, dipahombar ma i tu pangalaho na masa di ngolu ni Jesus sandiri di tingki diportibion.
Boasa didok turpuk on ende naposo ni Debata? Tontu ingkon berengonta do angka na masa diujui. Dibagasan parhatobanon do bangso i, tung mansai bernit do na niae bangso i jala laos dihilala nasida ndang adong be na manarihon (na peduli) di ngolu nasida, tarlumobi Debata sandiri pe nunga mandao sian nasida. Ido alana sai tubu sungkun-sungkun di roha nasida : ise nama na mangurupi nasida, jala sadia leleng nari nasida manaon saluhutna i. Alani ro do soara sian Debata tu naposo ni Debata mangalehon apul-apul dohot pagomoshon roha nasida, sai dilehon Debata do hadirionNa marhite angka naposoNa i. Jala digombarhon ma marhite turpuk on pangalaho na masa tu angka naposo ni Debata dohot pambahenan ni Debata maradophon nasida.
Dibagasan turpuk on dipajojor do angka dia ma kelengkapan dohot turgas siulaon naposo ni Debata manang sisean.
Hatorangan ni turpuk
1.      Dila sisean
Dila ima sumber panghataion. Sian dila ido boi  haluar pasupasu jala laos sian dila na sarupa ido haluar angka torutoru (kutukan). Alani tung mansai jamot do laho mamake ‘dila’ di ngolu on. Didok angka na pistar : dila i tumajom do sian pisau, Ai marhite ‘dila’ na sai patubu-tubu hata manang mangalap dohot manaruhon hata ; boi do marpanghorhon angka hansit ni roha (maneat ate-ate). Ido umbahen di hita halak Batak tu tangkas do didok :”bibir lingga, bibir partali-tali, halak siginjang dila, unang pinatangitangi”. Par-Psalmen pe mandok taringot tu ‘dila’ on ima : hamagoan do ditahitahi dilam, ho ale siulahon sipaototo, sobokhon raut parnabung” (Psalmen 52:4). Alani didok sahalak naposo ni Debata (sisean) ingkon dila na digohi angka hata pasupasu ma manang angka hata na denggan. Mardila sisean ima  na olo pasahathon Hata ni Debata na jinalona laho mangurupi halak na maheu, na gabe aek tabar tu angka na mauas, mangalehon hamalumon tu angka na marsahit, mangalehon las ni roha tu angka na marsak, mangalehon semangat ni ngolu tu angka naung mandele.  Naeng dohonon disi ia ‘dila’ naposo ni Debata manang sisean ni Tuhan i ingkon “dila na berwibawa : berbobot jala bermutu”. Tung marasing situtu  do molo dila angka parjahat ima na sai mambahen halak mandele, dohot patah semangat.
2.      Pinggol na marbinege
Doshon songon dila, pinggol pe tung mansai ringkot do di pamatang on. Fungsi ni pinggol ima marbinege, alani sai boi do saluhutna dibege aha pe di ngolu on, termasuk ma disi marbinege di angka na roha; angka na jat; angka na gabeak, angka hata na so tutu (isu-isu manang gossip), jala laos boi do marbinege di angka na sintong dohot angka na denggan. Laos adong do halak na mamake pinggolna holan pamolusan barita sambing ima na masuk pinggol sihambirang laos haluar sian pinggol siamun songoni do sebalikna. Tung mansai marasing do molo didok “pinggol sisean/naposo ni Debata”, ima pinggol na tajom (tinggil) marbinege tarlumobi manangihon Hata ni Debata ndada angka soara na asing. Tinggil mambege angka na sai mangido pangurupion. Tinggil dina mambege jala manangihon angka na metmet (na pogos, na ginosa-gosa portibion). Marhite na tajom manang tinggil (peka) mambege dohot manangihon na masa di portibion gabe jongjong ma ibana songon “tangan” ni Debata laho patulushon angka na denggan/na sintong hombar tu lomo ni roha ni Debata. Songon dia ma cara na asa berfungsi denggan ‘pinggol’ jala tajom/tinggil di ngolu on? Asa unang songon didok : adong do pinggolna alai ndang berfungsi alias nengel (tumpul). Ndang boi ndang, ingkon do torus mangolu dipanangihon soara ni Debata marhite HataNa. Songon didok di Jesaya 55 :3 “tarehon hamu ma pinggolmuna, jala roma hamu tu Ahu! Tangihon hamu ma asa mangolu tondimuna i. Jadi bahenonHu ma tu hamu padan salelenglelengna”.
3.      Hasatiaon dohot habangeton roha
Sahalak naposo ni Debata ima sahalak na mampu manahan di angka pangunjunan. Siala pangoloionna di tuanna tung marbenget do ibana laho gabe tumbal di tuanna. Alai ndada marisuang naung dipatupa ibana saluhutna tung gabe halomohon ni tuanna do ibana. Dibagasan parungkilon nang sitaonon ido tandaon ma tangkas naposo ni Debata ‘na tulen’ dohot na holan ‘imitasi/palsu’. Sahalak Naposo ni Debata ingkon taruji do di godang ni angka pangunjunan na dibolus dipardalanan ngoluna. Jala na mansai menarik ima molo pe sai dibagasan parungkilon ibana, halak na manghosomi ngoluna, na manjahati tung so adong do saotik pe dibagasan rohana laho mamalos saluhutna i. Dipasahat do sude na masa di ngoluna tu Debata asa Debata na mangurupi dohot na mamintori ngoluna marhite uhum na sintong i. tung dihamonangkon  naposo ni Tuhan ido panjouon dohot pamillitonna jala tung ramot do denggan dibahen ibana haporseaonna, sarupa songon na didok Apostel Paulus : “Nunga hupasidung paraloan na denggan i, nunga hupaujung parlojongongki; ramot hubahen haporseaon i” ( 2 Tim.4:7).
Sipahusor-husoran
1.         Naposo ni Debata ndada dirina sandiri na mamillit dirina  alai Debata do. Alani  naposo ni Debata ingkon unduk jala satia do tu otoritas ni Debata. Ndada dirina sandiri be na manontuhon ngoluna alai nunga Debata, Molo Debata do na mamillit jala na marsuru nasida tu sude jolma dohot tu liat portibion tontu ingkon tangkas do Kualifikasi/kriteria naposo ni Debata  ima : ‘mardila sisean”, ‘marbinege na tajom jala tinggil’, jala mampu mangadopi sude angka na masa di ngolu on dibagasan roha na sai tongtong mangoloi parsuruon ni Tuhan i.
2.         Ndada na neang panjoun dohot pamilliton na gabe naposo (sisean) ni Debata. Asing ni tanggungjawa, ulaon na pe tung mansai borat do ; manjalo angka na bernit, na hansit jala na parir. Marragam do sitaonon dohot haporsuhon nata ain siala mangihuthon Tuhan i. Songon hea didok Jesus : manang ise na giot mangihuthon Ahu dituhuk ma silang na tu ibana jala  dipasoada dirina. Ima sada tanda hasatian na manongtong mangihuthon Debata. Alani tabahen ma angka na masa di pardalanan ngolunta i songon tanda na satia hita mangihuthon Ibana saleleng ni lelengna. 
3.         Sungkun-sungkun nuaeng di hita :Naposo manang sisean ni Debata na songon dia do hita nuaeng? Amen. (h2pb2)


Tidak ada komentar:

Mazmur 84 : 1 - 7

Mazmur 84 : 1 - 7 84:1 Untuk pemimpin biduan. Menurut lagu: Gitit. Mazmur bani Korah.  84-2 Betapa disenangi tempat kediaman-Mu ,  ya ...