Psalmen 62 : 6 - 13

EV.Psalmen 62 : 6 – 13                                                                                                           EP. Jona 3 : 1 – 10

TEMA

ARAHON ROHAM TU TUHAN SIHONGKOP HO

Sude do ra mandok ia ngolu on marsingkat sorin do, manang songon roda ni padati. Sipata jumpang do las ni roha songon dapotan angka jampalan na lomak, alai di tingki na asing boi do ro angka hasusaan songon harugian dohot angka sahit nang na asing dope. Nian sude do hita ndada manghalomohon ngolunta dibagasan hasusaan i. Alai ndang boi dohononta songoni ai so boi gurunta angka na masa di ngolu on. Anggo las ni roha dohot angka hasonangan ndada pola adong si arsakhon disi, alai beha do molo sai ro angka parungkilon dohot haporsuhon i. Dison do na jotjot diuji haporseaon ni sasahalak, tudia do ibana mangalu-alu, tudia do ibana mangido pangurupion dohot na marsigantung?

        Di pardalanan ngolu ni jolma di hasiangon on, ndang pola buni pe jala ndang pola maila sasahalak mangido pangurupion di jolma dohot di angka hagogoon na adong di portibi on, isarani datu, lotere, juji dohot angka na asing. Boasa tusi jolma laho? Adong do piga-piga alus taringot tusi :

1.       Mental ni jolma na so boi sabar alai naeng pintor hatop dapotan manang aha. Tauji ma jolo molo mamereng adong na marsahit, sasintongna godang do sahit ala ni pambahenan sandiri isarani na so olo manjaga sipanganon, stress dohot muse na so perduli tu kesehatan na sandiri, hape molo ro sahit pintor ubat do niluluan ndada diri niba i sipadengganon. Lapatanna jolma disi ndang olo sabar merubah cara hidup yang sehat.

2.       Nunga lam moru di haporseaon. Songon na masa nangkin di ginjang siala na so sabar ujungna ndang masuk di jolma sisongon on molo manghatai IMAN, ai aha do Haporseon i ninna di godang di jolma i. Hape Haporseaon ndada saguru ni jolma i alai saguru ni Tuhan do. Ai boi do hita sai holan martangiangi hape ndang malum manang malua sian angka haporsuhonta. Didia do letak persoalanna? Na Tuhan ido na so adong be manang jolma i sandiri do naeng pangasahon gogona sandiri. Ai nunga godang jolma jotjotan ima naeng mangatur Tuhan i hombar tu angka sangkapna.

3.       Mental na merasa humhebat sian angka na asing. Kompetisi ni ngolu ima na sai marlomba-lomba di ginjang ni angka halak na asing ,ido mambahen jolma i mangalului angka cara asa beha ibana di ginjang ni jolma na asing, baik sian materi, hasangapon, dohot huaso. Alani i sai diusahaon jolma do mangalului manang aha pe dalan laho mandapothon i.

Alai tabereng ma sude di tingkina? Ndang adong manang aha pe usaha ni jolma asa torus ngoluna marhasonangan, di ginjang dohot humhebat sian na asing hot rodi salelengnilelengna. Tong do adong tingkina dohot ujungna. Songon didok Parjamita ido i :”martingki be do luhutna na tinompa, martiti be do luhut nasa sangkapsangkap dihasiangan on” (Parjamita 3 : 1).

        Parpsalmen dison mandokhon Holan Debata ma ho marhuraja, Holan Ibana do partanobatoanhu dohot angka na asing (Psalmen 62 : 6….). Tontu adong do dasorna umbahen didok parpsalmen on sisongoni. dipatuduhon Raja Daud sandiri do di pengalaman ni ngoluna sahat tu na mate. Ndada na otik pergumulan na nialaman Raja Daud di tingki na marmahani biru-biru ni natorasna mangadopi angka binatang di ladang, dungkoni mulai sian na tarpillit ibana gabe raja, nunga dijolona persoalan na mansai balga ima mangadopi si Goliath; suang songoni naeng bunuon simatua na ibana, Raja Saul; dohot pergumulan na mansai borat  na ro sian angka gelengna ima naeng mandabuhon si Daud sian Harajaonna. Alai tabereng ma so hea Raja Daud mangido pangarupion sian jolma dohot angka hagogoon na adong di portibi on. Justeru sian pamanganna do haruar hata na mandok :”Ai nang pe mardalan ahu di rura linggoman ni hamatean, ndang huhabiari parmaraan, ai Ho (Tuhan)  do mandongani ahu tungkotMu dohot batahiM mangapuli ahu” (Psalm 23 : 4).

        Sasintongna ndada pola maol si Daud laho mamunu si Saul, suang songoni mamunu angka alona termasuk gelengna sandiri, ai raja do ibana jala tung godang dope jolma di tingki i manghaholongi ibana. Alai na diida si Daud do molo tu jolma ibana mangido pangurupion, tarlumobi tu angka hagogoon na asing, ndada hea sidung persoalan dibagasan rohana. Ai pasti do songon na didok di prinsip berperang na jolo molo mate halak dibahen podang ingkon balosna tong do hamatean. “Nyawa ganti nyawa, mata ganti mata”. Ndang olo si Daud mangulaon sisongoni alai tu Debata do dipasahat ibana sude angka na masa di gulmit ngoluna. Tabereng di ujung ni ngolu si Daud marhasonangan do ibana pasahaton harajaonna tu anakna si salomo.

        Di zaman sinuaeng on, ndada nian berubah pergumulan ni jolma na jolo dohot nuaeng, hira na dos do. Lapatanna sude do hita mengalami angka pergumulan ni ngolu, holan i ? adong na borat situtu alai ndang pola so borat hian dope. Alai na pasti sude do hita mengalami pergumulan na borat di tingkina, ai ido bangko ni jolma na mangolu. Nuaeng on, tung godang do dalan dipake jolma laho paluahon dirina sian angka pergumulan i. Adong do na mandok : HEPENG do SUDE MANGATUR? Toho do i.  Molo adong hepeng sude do boi bahenon : gari sapulu datu pe boi do jouhon, dohot mangalului angka pertahanan hidup mulai sian papua sahat tu aceh asal ma adong hepeng. Alai ndada i na mambahen gabe sonang ngolunta.

Nunga godang jolma nuaeng on MOGAP (bingung) dohot  na PANIK. Ujungna haluar ma hata angka si songon i. Songon dipaandar nangkin di Epistel taringot tu si JONA. Pintor parjolo do biar ni roha ujungna bingung dohot Panik ibana di pasuruon ni Debata tu huta Ninive. Aut tenang hita jala tongtong tapangolu haporseaonta i asa pos rohanta tu Tuhan i ndada gabe jolma na bingung dohot na panik hita on.  Semua persoalan hidup pasti punya jalan keluar. Nang pe borat nian dalan haluar i manang tung leleng situtu; alai ndada tu sangkap na roa i. Sipata adong do dalan haluar na dibahen Debata di ngolunta na maralo tu angka sangkap dohot pangidoanta, isarani molo adong keluarganta na marsahit molo sangkapta naeng ma hipas, olo do tadok : Sude pe nigadison asal ma malum, sipata holan hata do i. Boasa hu dokhon songoni, molo nunga sude habis alai ndang malum dope, didok ingkon tu luar negeri marubat marbiaya puluhan milyar ipe boi ma malum, aha ma hatata muse? Jangan-jangan kita menjadi orang yang munafik dan berdosa. Pasti do dohononta : Tole ma Tuhan alap ma ibana.

Nian denggan do usaha sampai titik darah penghabisan tapi kita juga harus menjadi orang yang legowo/pasrah kepada rencana dan keinginan Tuhan.  Nunga tingkina nian ingkon lam marsiajar hita tu angka sangkap dohot lomo ni roha ni Debata di ngolunta on. Asa unang holan pikiran dohot gogonta na tapangasahon. Songon na masa di tingki sisean i ndang dapottan dengke piga-piga ari, sai gogona dibahen; suang songoni di tingki na ro habahaba dohot alogo naeng malonongkon parau i sai bingung nasida hape disi do Jesus. Persoalan na borat nuaeng na tabereng di ngoluon ima halak na marugamo do hita, na porsea tu Jesus alai ndang tapaloas ibana mangula di ngolunta i.

Dohononta do manang andingan pe ro angka persoalan dohot pergumulan di ngolu on, ndada mabiar ahu ai adong do Debata mandongani ahu. Ndang tarbahenta lari sian angka pergumulan ni ngolu manang dohononta tu mahluk na sada asa unang ma ro. Justeru ingkon dohononta do  : ro pe ho tarbahenhu do manaluhon ho ai Debata na sun gogo Ido mangurupi ahu. Amen