Manghaholongi Debata unang ma gabe partuktuhan tu dongan
Asa ummura taantusi turpuk on denggan do sipatangkason angka na masa uju i di huta Korint on. Taboto do ia huta on na jolo ima inganan bisnis (perdagangan), alani sai marlaho ro jolma tu inganan i sian angka budaya dohot parugamoon na marragam. Nunga nian adong halak Kristen disi na manjalo barita nauli na diboan Apostel Paulus; alai laos godang dope di bagasan hasipelebeguon. Panghorhon ni ima, godang ma angka poda na marcampur di huta i jala ndang diboto pe dia poda na polin dohot poda naung marlaok. Sian i ma mangonjar parsalisian dohot parbolatbolatan di angka punguan dohot halak Kristen i sandiri.
Sada sian ima marhite turpukta dibagasan minggu on taringot tu juhut. Hasomalan hasipelebeguon di ujui ima na mamelehon juhut tu begu. Dung dipelehon, deba ma i diallang nasida di jalu, jala sipata dijou do tondongna naung Kristen i rap mangan dohot nasida. Alai gumodang ma i di gadis tu pasar. Ido na patubuhon parsoalan di tonga-tonga nasida. Boha, sala do halak Kristen mangallang juhut na songon i ? Angka pande bisuk na mardebatahon hapistaran dohot angka halak kristen na asing mandok : boi do i ai juhut do i.(ndada na porsea nasida adong begu manang tondi na hodar disi) hape nunga gabe partuktuhan i tu halak Kristen na asing ima parhaporseaon na poso dope. Di roha halak Kristen i sandiri tarlumobi na baru masuk tu Kristen mandok : molo pinangan juhut na pinalehon tu begu nunga dohot iba marsomba tu begu.
Ima alana disurathon si Paulus surat na on dipasahat tu angka halak Kristen na di huta Korint taringot songon dia ma poda na polin hombar tu Hata ni Debata.
Atik pe taringot tu juhut naung dipelehon tu begu do na dipaandar di turpuk on, alai jumolo do dipatorang si Paulus sibonsirina ima taringot tu parbinotoan. Mansai ringkot do nian hapistaran, parbinotoan dohot teknologi, alai sude do adong keterbatasanna. Ndada hapistaran nang parbinotoan i segala-galanya , ai godang do na so tardungdung ni utohutok ni jolma i sandiri. Didok si Paulus, Debata ma tapangasahon dohot tasomba. Molo naeng denggan hapistaran dohot parbinotoan ingkon marojahan tu Haporseaon na polin. Haporseaon gabe dasor berpikir dohot bertindak dibagasan ngolu on. Sian haporseaon na mangolu ido tung pita taringot tu pambahenan na denggan dohot berpikir na tama. Asa ndang pikiran i bahenon laho mangantusi pambahenan ni Debata alai haporseaon ido.
Sian haporseaon ido tubu haholongon ni roha tu Debata dohot tu sude jolma. Taringot tu holong tangkas ma tajaha muse di 1 Korint 13 songon dia do rumang ni holong ni roha i. Piga-piga sian i didok do ingkon lambas (sabar), olo manganju jala mangantusi halak, ndang paburnangburnang diri (sombong) alai lambok jala serep do i. Alani songon halak Kristen ingkon holong ido patujoloon di sude na masa, tarlumobi molo adong na maol songon na masa di huria korint on. UNANG MA GABE PARTUKTUHAN ngolunta tu angka jolma na asing. Molo adong na hurang di dongan manang di angka halak na asing naeng ma jumolo pasobokon diri (masuk ke dalam) tu hagaleonna ndada holan mandok salah nasida manang laos paleaon. Dungkon ipe nangetnanget ma podaan, togutogu tu hasingkopon ni parbinotoan i. Paulus pe mandok di Rom 14:1 “anju hamu ma na gale marhaporseaon unang uhumuhumi hamu pingkiran nasida” . Tingkos do ingkon patingkoson do angka na sala i alai ndang gabe musuhon halak na marsala justeru ingkon sitogutoguon do. Adong sada pandohan na mansai uli mandok : Tindakan baik tidak selalu merupakan tindakan kasih, tetapi tindakan kasih pasti selalu adalah tindakan baik.
Taringot tu parbadaan nasida taringot tu juhut na pinelehon tu “debata” manang tu begu ninna, tangkas do alus ni si Paulus ndada disi inti na. Inti na ima asa mangolu dibagasan panghaporseaon tu Debata dibagasan Jesus Kristus. Ai godang dope hita halak Kristen mangulaon ugamonta i holan alani ruhut-ruhut na dibahen jolma ndada na nionjar panghaporseaon na tutu tu Debata. Lapatanna, adong do pangajarion na mandok diorai mangan juhut na margota, sisubanghonon do sipanganon an manang sipanganon on alai ruhut-ruhut ugamo do i alai dao dope sian haporseaon na mangolu dibagasan Tuhan i. Alai molo taulahon angka na pinangido ni ugamo manang huria na marojahan tu haporseaonta mangolu ma haporseaon i. Ai ndada ruhut-ruhut i na parjolo niulaon alai dao rohana sian Debata, alai Debata do parjolo nioloan asa pe ruhut-ruhut ni huria manang ugamo sidalanhon.
Nian ingkon dohononta do ndada tapahorseai na adong pelean juhut tu begu manang tu debata na leban i. Paulus pe mandok : Ndang tutu adong begu (ima sumangot ni tondi naung mate; ninna halak batak) di portibi on, jala ndang adong debata dungkon ni nasasada i” (ay.4), alai adong do sibolis na torus mangonggop naeng mamoro hita. Alai asing do pangantusion ni jolma taringot tu sibolis nang begu dohot debata na asing i. Anggo di pikiran ni jolma begu ima songon angka tondi ni jolma naung mate, jala molo angka debata na asing ima na sai mangula di inganan-inganan na dihaporseai jolma adong nasida jala margogo situtu. Molo sibolis na nigoaran di bibeltai Lucifer manang beelzebul marasing situtu do i, ai na ro sian ginjang do i, songon didok Jesus “Huida do sibolis i madabu sian ginjang songon porhas” (Lukas 10:18). Alai laos dipadomu jolma ma sudenai gabe sada pangantusion jolma taringot tu begu manang debata na asing. Alani tangkas do didok Paulus nangkin ndang inti persoalan diallang manang na so diallang, lapatan : molo diorai jolma manganhon juhut na pinalehon i berarti PORSEA MA JOLMA NA ADONG BEGU, alai molo dipaloas manganhon juhut na pinalehon i gabe dihaporseai adong hagogoon dungkon mangalang i manang gabe pasupasu ni ngoluna. On do na didok “SIBUAH MALAKAMA” tidak dimakan mati ibu tapi kalau dimakan mati bapak.
Tangkas do didok si Paulus, sarupa do na manganhon manang na so manganhon na pinalehon i molo ala ni haporseaon tu debata manang begu i. Molo ndang porsea tu begu i niallang pe taho, nianggap juhut manang daging biasa i. songon didok Paulus “Alai ndang dipajonok sipanganon hita tu Debata, ndang na surut hita anggo so tapangan, jala ndang na umangat hita nang tapangan” (ay.8). “Ai na denggan do nasa na tinompa ni Debata jala ndang sisubanghononhon nasa na jinalo mardongan roha mauliate. Ai na gabe badia do i, binahen ni Hata ni Debata dohot tangiang” (1 Tim.4 : 4-5). Tuhan Jesus pe hea do mandok : “Ai so manang bongot i tu bagasan rohana, tu butuha do i lahom dungi bolong do i muse di inganan na soding, asa gabe ias do saluhutna sipanganon i” ( Markus 7 :19).
Kuncina sudena i didok dibagasan turpukta on ima : unang ma ngolu hakristenonta bage mambahen jolma ragu di haporseaonna jala tarlumobi gabe manimbil sian haporseaon i. didok si Paulus do, na denggan di ho i, boi do i gabe dalan ni sibolis mamboan halak na asing tu jorgong ni sibolis. Alani i, sipaingot tu hita molo naeng ulahononmu sada siulaon jolo pikkiri akibatna/dampakna, ai ndada holan tu diri niba panghorhonan i alai beha do jolma na asing songon isarani hombar jabunta dohot jolma na asing dope. Songon hea masa adong parhalado tu rumah bordir (pelacur) nian mambahen penelitian do taringot boasa anak boru godang gabe pelacur dohot manogunogu nasida asa bertobat, hape diida ruas jala parhaporseaon na poso dope; ujungna disonggopi sibolis ma didok ma : gari parhalado pe tusi lam iba ma ninna. Suang songoni molo pe didok ndang salah mangan na dipelehon tu begu asal ma ndang dihaporseai tusi alai botoonta do nunga hurang denggan na molo mangan tu inganan parsombaon i gabe mambahen gale haporseaon jolma na mambege tarlumobi na marnidasa. Songoni do muse molo taboto adong halak silom di lambung ni jabunta unang ma hita pateal-tealhon dirinta, gabe tadok : Memang gue pikirin” inikan rumah saya. Unang ma sai patujolo pikiran dohot parbinotoan niba alai naeng ma tongtong ngolunta marojahan tu Haporseaon na mangolu, jala padao ma dirim na gabe partuktuhan di halak. Amen
Tidak ada komentar:
Posting Komentar