Ev. Matius 10 : 34 – 39
Tema
“Ise do siihuthonta di portibi on”

Patujolo
Songon na maol do nian manjalo hata ni Jesus on? On ma sada sian piga-piga hata ni Jesus di Bibelta didok Perkataan Kontroversial (bertentangan). Toho do Jesus mamboan podang ndada mamboan dame? Hape molo tabereng sian panghobasionNa ndada Ibana mamboan Podang alai dame do. Dipatuduhon Jesus do holong ni rohaNa tu angka na pogos, angka na metmet jala angka halak pardosa. Alani dia do sasintongna didok disi :”Unang ma dirimpu rohamuna, na mamboan dame Ahu umbahen na ro tu tano on : ndada na ro Ahu mamboan dame, tung podang do”.

Hatorangan ni Turpuk
a. Dame na sejati vs. Dame na Palsu (ay. 34)
Tingkos do nian Jesus ro tu portibion mamboan dame, alai ingkon sungkunonta do muse dame na songon dia do maksudna disi? Boi do dame di sasahalak alai mangulaon hajahaton manang angka na so denggan. Tontu ndada si songoni maksud ni Jesus dison, alai dame na marasing situtu do di roha ni jolma nang portibi on. Ai mardame sada bangso tu bangso na asing manang sahalak tu halak na asing siala di mulanai marbadai dohot marporang dungkon i didok ma gencatan senjata laos ndang marsipangkulingon. Dame na diboan Jesus ima na didok Shalom (PL) manang Eirene (PB) na marlapatan do i situasi dohot kondisi na gok las ni roha jala jongjong Hata ni Debata. Ido alana Jesus ro mamboan podang. Podang dison lapatanna ima songon gaya bahasa metafora (perbandingan) na marlapatan HATA NI DEBATA (Firman). Di Heber 4 : 12 didok tangkas :”Ai na marngolu do Hata ni Debata jala marpanghorhon, jala tumajom sian nasa podang siduababa, jala torus do disirang hosa dohot tondi, ringring dohot utokutokna…”. Ido umbahen podang manang didok Hata ni Debata laho manirang/mamotong angka na so denggan sian na denggan; manirang na sintong sian na so sintong dohot angka na asing. Jesus ro laho manirang angka na palsu sian angka na asli, angka na munafik sian angka na sejati. Jadi dame na diboan Jesus ndada dame na palsu alai dame na sejati.
b. Keluarga na Semu vs. Keluarga na Sejati (ay. 35-36)
Podang (Hata ni Debata) na diboan Jesus mangonai do tong tu ngolu par-keluargaan, ngolu parbangsoan dohot ngolu pribadi. Didok do “Pabadahon anak tu amana, boru tu inana, parumaen tu simatuana boru, jala tung donganna sajabu gabe musu ni jolma i.”. Tangkas do taboto Natoras ingkon diparsangapi angka ianakhonna do. Tongkak manang tabu do molo ianakhon mangalaosi patik/poda ni natorasna. Nian tung denggan do i, alai porlu jamot jala tangkas do di hita natoras sisongon dia do na ingkon dioloi ianakhonna? Songon didok di bibelta on ndada natoras na mangintali ianakhonna, na mamboan tu ngolu na so denggan, alai natoras na unduk jala patuh tu Debata. On ma didok Jesus ingkon sirangon do i. Ndang boi sadalan lomo ni roha Debata tu lomo ni roha sibolis.
Alani i didok dison ingkon adong do prioritas di ngolunta, tu ise do rohanta dohot ngolunta? Ai jotjot do ngolu parumatanggaon mangabati hita laho marsaor dohot Debata, manang olo do keluarga (natoras, simatua, ama/ina, dna) manundati hita ro tu Debata.
Tung tangkas do didok Jesus molo mangihuthon angka na bonar manang na sintong mambahen hita dipasisi/dipaholang sian hariburon portibi on. Mangihuthon Jesus ndang boi haputusan ni halak manang keluarga alai ingkon haputusan pribadi do, panghorhonna pe tu pribadi marsasahalak do ndang tu halak na asing. Alanii konsekuensi/dampak na timbul molo botul-botul hita mangihuthon Jesus di portibi on, boi do sirang hita sian keluarga alani pilihan i, alai ingkon pos do rohanta gabe jumpang keluarga na baru dibagasan haporseaon tu Kristus.
c. Holong na Sementara vs. Holong na manongtong (ay. 37-39)
Diuduti Jesus do songon hatorangan na di ginjang i marhite pandohan :”Na humolong roha di amana manang di inana asa di Ahu, ndang tama i sisean Hu”. Naeng dohonon Jesus marhite hataNai asa unang terikat hita tu ngolu ni keluarga. Adong do saran na bijak sian apostel Paulus na mandok :”Saudara-saudara, inilah yang kumaksudkan yaitu waktu telah singkat! Karena itu dalam waktu yang masih sisa ini orang-orang yang beristri harus berlaku seolah-olah tidak beristri, orang menangis seolah-olah tidak menangis, orang-orang bergembira seolah-olah tidak bergembira, dll”. Ngolu di portibi on memang ingkon seolah-olah do nang pe nyata jala boi tahilalaon sudenai, alai di ujungna ingkon marujung do sudena.
Jala lam tangkas muse didok Jesus do taringot na mamorsan silang dohot na mangihuthon Ibana. Halak na mamorsan silang ima halak na siap manuhuk angka na hansit,parungkilon dohot na parir alani mangihuthon Jesus. Ido alana Jesus ndada holan manaringoti ngolu di portibi on manang ngolu na jempek i alai tu ngolu na manongtong do. Alai syarat asa manjalo ngolu na manongtong na sian Tuhan i, ingkon do na olo sumeahon hosanna tu Tuhan i.
Dison ma didok Jesus manang songon dia pe holongta tu keluarga nang natorasta dohot angka jolma na asing naeng ma ditoru holong tu Debata. Molo hummolong do rohanta tu keluarga sian holongta tu Debata pasti ndang adong loyalitas ta Debata, Alai molo holongta umbagas tu Debata hataridaan nai ingkon holong do muse hita tu keluarga, natorasta dohot angka jolma na asing.

Sipahusorhusoran ni Jamita :
1. Sada hal na mansai ringkot dipangido sian turpuk on ima LOYALITAS PENUH TU JESUS. Ndang boi tanggung-tanggung manang setengah-setengah. Ai molo hita unduk (loyal) tu Tuhan Jesus saleleng ni ngolunta, Ibana pe hatindanghononNa ma hita di jolo ni Ama i. Alai sebalikna molo ndang loyal hita/ manang unduk tu Debata, nang Jesus pe pasoadahononNa ma hita di jolo ni AmaNa.
2. Mamillit laho mangihuthon Jesus dos do i songon mamillit dongan saripe ima ingkon sahat do tu na mate. Alani adorang so pilliton dongan saripe niba porlu do pertimbangan na matang jala ingkon botoon saluhutna angka panghorhonna na naeng masa tu jolo, ndang boi holan manjalo na tabo alai ndang olo manuhuk na hansit. Sudena porlu do pertimbangan na bijak sian ngolunta termasuk mamillit Haporseaonta manang tu ise. Songon hea didok Jesus :”Ai ise hamu na giot pajongjong palas-palas na so jumolo hundul mangetongi sipalahoonna tusi manang na boi laho patulushon? Unang jolo dipauli jolo ojahanna, hape ndang tuk gogona pasahathonsa, gabe suraha ni sude halak na marnidasa ibana.” ( Lukas 14 : 28 – 29 )