Jumat, 24 Februari 2012

1 Musa 9 : 8 - 17


                                                                                   
Tema
Pardenggan basa do Jahowa jala parholong ni roha
Dijolo ni turpuk on dipatorang  do taringot tu haroro ni aek na sumar namangalengsehon angka namarhosa termasuk dohot jolma na so bongot tu parau ni si Noak. Ima dalan ni Debata manguhum nasa na marhosa, lumobi jolma ala pangalaosion nasida tu Debata.. Alani i didok ma di 1 Musa 6:6-7: Jadi disolsoli Jahowa ma rohana, ala tinompanai jolma di tano on, jala lungun rohana. Ripashononku ma sian tanoon jolma na Hutompa i, ro di pinahan dohot namanjirir, ro di pidong angka namartongatonga langit, ai nunga husolsoli  bagingku ala na hutompai nasida. Nang pe disolsoli Jahowa rohaNa, ndang naeng gabe soadahononNa portibion rodi isina. Ingkon lam ganda do nasa na marhosa lumobi jolma laho mangingani tano on ima marhite si Noak na olo mangihon hataNa.
Turpuk on ima bagian ni padan ni Debata tu si Noak dohot tu nasa na marhosa di tano on paboa sintong do hataNa naung nihatahonNa andorang so ro dope uhuman i. Dung marsik aek na sumar i sian tano i, jala dung ruar si Noak dohot sude pangisi ni parau i, naparjolo dipatupa ibana ima pasahathon pelean tu Debata marhite pelean situtungon. Lomo do roha ni Debata dipeleanna i, jala lomo do roha ni Debata tu si Noak. Alani didok Debata ma pahotongku ma padanhu tu hamu ro di pinomparmuna sogot. Pandohan on patuduhon inisiatif sian Debata sandiri. Parpadanan i ndada sian kesepakatan bersama kedua belah pihak (songon mambahen hubungan perjanjian) manang ndang si Noak na mamulai holan na manjalo parpadanan i do ibana. Namarlapatan do i, ia pandapot manang persetujuan ndang dipangido sian jolma i.
Marhite parpadan i dipatuduhon do na holan Debata do na boi paimbaruhon portibion dohot nasa pangisina, holan alat sambing do ianggo jolma i di haimbaruon ni portibion. Dijamin Debata do hangoluan ni na di tano on songon na nidokna di 1 Musa 8:22 “saleleng adong tanoon ndang jadi mansohot saburon dohot gotilon, ari ngali dohot ari las, ari logo dohot rondo ni ari arian dohot borngin”. Dungkon ni i di pasupasu Debata ma si Noak, ditonahon asa sopar jala dilehon do nang sahala maradophon nasa na marhosa di portibion, alai laos tongtong do dipatikhon angka aturan na ingkon siulahononna.
Alani i naeng tangkas songon dia do sangkap ni Debata tu jolma marhite si Noak. Naeng pita nian pangoloion ni jolma tu Debata jala ditadingkon angka pangalaosion dohot dosa sian ngoluna be. Sian na mamungka ro boaboa taringot tu aek na sumar, tangkas do dipatorang inisiatip ni Debata. Ndang si Noak nampuna inisiatip alai Debata sambing do. Debata do marsuru si Noak paulihon sada parau jala ditontuhon do ukuran ni parau i.
Dipatupa Debata do tanda ni padanNa, na tangkas boi idaon ni jolma dohot nasa namarhosa paboa naso uhumonNa be portibion marhite aek na sumar ima halibutongan na tarida di ombun. Halibutongan i, i ma tanda ni padan ni Debata dohot tano on (ay.13); tanda ni PadanNa dohot jolma nang dohot nasa namarhosa (ay.15); tu nasa namardaging di tano on (ay.16);. I do umbahen didok: “Jadi ingotonku ma padan na hubahen i tu hamu … Lapatanna, halibutongan i gabe tanda ni padanNa jala ia dung diida ro halibutongan i diingot ma padanNa tu jolma dohot tu portibion.
Ndada jolma naeng marningotsa alai Debata do. I do songon hataridaan ni hasintongan dohot  parsitutuonNa mangalehon jaminan taringot tu kelangsungan ni ngolu di portibion nang angka na marpardomuan tusi, isarani pargantian musim. Ndang adong ayat ni turpuk on namandok asa dibereng si Noak dohot angka pinomparna tanda i, dungi gabe jaminonna ma na so ro be aek na sumar. Ndang adong campur tangan ni si Noak laho patupahon tanda i, Debata sambing do namambuat haputusan di diriNa jala dipabotohon tu-jolma asa dihaporseai.
Peranan ni si Noak ima manghaporseai pambahenan ni Debata songon naung pinatuduhonna uju disuru Debata ibana paulihon sada parau hombar tu tona ni Debata jala pamasukhon tu bagasan parau angka binatang na marguru tu massamna. Ingkon tangkas si Noak dohot pinomparna porsea tu padan ni Debata.
Marhite sian i gabe taida ma, ia turpuk on mansoarahon barita las ni roha na pinatupa ni Debata. Ndang si Noak mangido tanda, ndang ibana mambahen prakarsa, Debata sambing do ala ni holongNa. Marhite padan nabinahenNa tu si Noak dipatuduhon ma Debata mangalehon jaminan masa depan na denggan.
SIPAHUSORHUSORON
v Barita taringot tu si Noak on gabe renungan na mansai arga do on di tingkinta saonari on. Ai torop do jolma na so parduli be tu patik dohot uhum ni Debata iam na sai tongtong madabu tu angka hajahaton dohot dosa. Nian godang do singot-singot di ngolu on na pinatuduhon ni Debata alai ndang hea pintor madabu pangharimasonNa. Alai unang lupa hita ndang hea marsombu-sombu Debata di hajahaton na binahen ni jolma. Cepat atau lambat Tuhan akan menunjukkan keadilanNya bagi kehidupan dunia ini.
v Didok agendanta do :”Pargogo na so hatudosan jala parrimas, siluluhon dosa ni amaama tu pinomparna, rodi sundut patoluhon, rodi sundut paopathon pinompar ni angka na sogo roha di Ahu, alai asi do rohangku di angka na marriburibu, angka na marholong ni roha di Ahu, na so mangalaosi patikHi”. Sian pandohan i botoonta ma : Tongtong do mardalan uhum sian Debata sahat tu na marsundut-sundut alai laos mardalan do holong ni RohaNa. Alani i asa jaga jala jamot ngolunta. Ndang tarbahen jolma sai torus mangolu dibagasan dosana, ai adong do tingkina sasudena.
v Unang hita sala, padan ni Debata na tu si Noak na tatean sahat tu tingki on ndang holan na marhahonaan tu haluaon tano on i, alai dohot do tu haluaon na saleleng ni lelengna na di bagasan dohot na marhitehite Tuhanta Jesus Kristus i. Ia diotapi jala dipasurut Debata pe rimasNa, dipalua jolma i sian panginona ni uhumNa, jala dipasiding portibi on sian kehancuran asa sahat do tu ari ni Kristus Jesus. Disi, pahimpuon ni Debata ma sandok hagogoonNa maralohon dosa i, jala usehononNa sandok rimasNa manguhumi pardosa i. Tu Kristus i do i diulahon, ai na gabe dosa do Ibana (pat.2 Kor.5:21) jala na gabe singkat ni saluhut pardosa dijadihon Debata. Nasa na porsea di Ibana malua do i jala mangolu saleleng ni lelengna. Amen

Tidak ada komentar:

Mazmur 84 : 1 - 7

Mazmur 84 : 1 - 7 84:1 Untuk pemimpin biduan. Menurut lagu: Gitit. Mazmur bani Korah.  84-2 Betapa disenangi tempat kediaman-Mu ,  ya ...