Tondi ni Debata na manogu hita
PATUJOLO
Molo pinaroahon di pardalanan ni ngolunta marragam do sungkun-sungkun taringot angka na masa na niadopan? Songon haroro ni udan dohot mataniari, songoni do pardalanan ni ngolunta na sai jumpang las ni roha dohot angka arsak ni roha. Boi do saonari songon na marbunga-bunga panghilalaonta alai marsogot maraburan ilu alani ni songgop arsak ni roha? Jala ndada marimbar i tu sude jolma, natape pe i sahalak na sai martangiang dohot burju mangulaon angka na denggan? Molo marungkil angka na parjahat ndada pola godang sungkun-sungkun disi, jala boi do dohonon na wajar i, alai beha muse molo marungkil angka jolma na sintong dohot na tigor i? On do na mambahen gabe polemik di ngolunta on? Alai marhite turpuk jamita di ari
Pentakosta i on, diuji patorangkon pangulaon ni Tondi Porbadia di ngolu ni
angka na porsea molo songgop sitaonon. Na torang, ndang malua na porsea i sian
sitaonon saleleng mangolu dope ibana. Baliksa, boi do lam tamba sitaononta
alani haporseaonta i.
HATORANGAN NI TURPUK
Torang do dihatindangkon Ap. Paulus di
ay. 22 paboa sude do na tinompa ni Debata rap marhoi jala mambebe. Ndada holan
jolma manisia, ndada holan angka na porsea, alai sude do na tinompa, ima angka
suansuanan, pinahan, hajanghajang ro di saluhut parlangitan, na porsea dohot na
so porsea. Sude ingkon mamolus sitaonon na dokdok situtu. Digombarhon do
haberniton i marhite na maheu dohot mabebe (mengeluh dan merasa sakit saat
bersalin). Somalna angka na maheu lumobi molo sahat pola mambebe, ima gombaran
ni na hansit situtu, na pola ndang diboto sada ina na naeng mangintubu
manggombarhon hahansiton na mambebe i. Alai tangkas do dihatindangkon Ap.
Paulus hasurungan ni angka na porsea. Dijolo ni turpuk on didok do, nasa na
tinogihon ni Tondi i, ima angka anak ni Debata na so olo mabiar mangadopi
kondisi pambebeon, ala nunga dibolus Kristus lobi sian i, ima di hau
pinarsilang i. Ibana do tudosan dipardalanan ni ngolunta. Ala anak ni Debata do
hita, tontu godang ma hasurunganta sian angka na so anakonNa. Parjolo, manghirim. Tondi i do
margogohon hita manghirim. Ndada saguru di angka na porsea i rumang, balga,
gogo ni na hinirimna i, tung saguru di Debata do. Manghirim patuduhon sahalak
jolma na sai porsea diangka sipaimahon. Manghirim ima mamereng na so diida alai
boi do diida dibagasan haporseaon. Contoh : sahalak na manuan bona ni mangga,
natape sian na metmet alai sai tong do ditambori denggan asa dapotan parbue na
denggan di tingki aduan, songon sahalak parsikola na sai nunut marsiajar asa
dapot angka citacita ni ngoluna. Songon didok apostel i :”Ai molo niida na
hinirim i, ndang pangkirimon be i dohonon” (ay.24). Dison do parasingonna dohot
angka jolma na so porsea ima na sai mamereng tanda, bukti dohot angka fakta di
ngolu, dungi pe asa pos rohana di angka siulaonna. Anggo jolma na porsea ndada
bukti/fakta na parjolo siluluan alai ingkon porsea do. Ido umbahen adong hea
didok Jesus :”Martua ma angka na porsea, atik pe so diida” (Joh.20:29). Paduahon, marhabengeton. Molo lam togu
panghirimon, lam margogo do manaon dina paimaimahon hasasaut ni na hinirim i. Molo
didok na marbenget ndada pola sai sungkunon andingan manang sadia leleng. Anggo
pola boi botoon tingkina dohot lelengna ndada pola marbenget hita disi, ai
cukup dohonon marpaima. Benget dohot paimahon, dua hal na mansai marasing do i.
Anggo benget ima marpaima alai dibagasan na manongtong, ndada bergantung tu
angka partingkian, alai monontong dibagasan ujian na borat. Ido alana halak na
marbenget songon tolak ukur menguji kesabaran, hasatiaon dohot kepastian. Alai
molo na marpaima sai bergantung do tu partingkian, jala boi do muba-muba roha
dohot pikiran jala olo madabu tu pandelean. Patoluhon, Mangarade, haradeonna ima marhite na mangaloas Debata
marhite TondiNa mangaturhonsa. Tangkas do pangurupion ni Tondi i, nang pe di
ombas na gale hita, ombas na so adong be gogonta, pingkiranta laho manghatahon
pangidoanta dibagasan hata na tingkos. Mangarade di sude angka na naeng masa,
ndada holan siparadeon di angka na jumpang las ni roha,alai mangarade di alus
na so saurdot di angka panghirimon niba. Na umborat ima di pangaradeon angka na
parir dohot na hansit ai godang jolma ndang mampu disi. (patudos angka keluarga
na mangadopi kejadian madabu pesawat Sukhoi, ndang mampu nasida manjalosa
dungkon leleng pe baru nenget-nenget lam tarjalosa). Porsea do ahu, sude hita
belum tentu mampu mangarade tu angka sisongoni, natape taboto
hamatean/parsirangan nunga jambar di ngolunta on. Paopathon, Martangiang. Dungkon manghirim, marbenget dohot
mangarade na mansai ringkot situtu ima martangiang. Tangiang ima dalanta
patuduhon haundukhonta dilomo ni roha ni Debata, jala marhite tangiang lam boi
tarjalonta sude angka na masa. Holan mangido do hita, alai ianggo na pasauthon
marguru tu lomo ni roha ni Debata do. Boasa? Holan Debata do na umboto na
dumenggan tu hita. Diajari Tondi i do hita asa taboto manghatahon pangidoanta
na umbuk (sesuai) tu lomo ni roha ni Debata, ndada mangasahon hagiot ni roha
dohot pingkiranta. Anggo holan mangasahon pingkiranta dohot rohanta ndang tarbahenta
mangantusi sangkap dohot lomo ni roha ni Debata, ido alana porlu “pengantara”
ima Tondi Porbadia. Mangula do Tondi i laho patingkoshon pangidoanta tu Debata
(ay 26), asa ditongos Debata pangurupionNa laho mangatasi hagaleonta i. Na
ringkot, asal tongtong hita dibagasan panghirimon i jala manghirim holan tu
Ibana sambing
SIPAHUSORHUSORON
1.
Saleleng
mangolu angka na porsea i, sai taadopi do angka sitaonon i. Marhite angka
sitaonon i patubuhon godang hagaleon di ngolunta, isarani songon : gale
haporseaon, gale marpanghirimon, gale
marbenget ni roha. Boasa? Siala angka persoalan dohot sitaonon ido na
mangarajai rohanta, hape lupa hita na adong Debata marhite Tondi Porbadia na
sai tongtong mandongani dohot mangurupi hita. Toho do jolma na gale hita alai ndada
mandok siala mamereng angka hagaleonta gabe ndang taboto be na adong do Debata
dohot Tondina mangalehon gogo tu hita. Justru, ingkon adong do kelemahanta asa
sai ro hita mangido hagogoon sian Debata. Ai molo jolma na margogo hita dohot
jolma na sempurna 100 % nunga hatop-hatop dao Tuhan i sian ngolunta. Gari na
godang kelemahanna pe dohot angka sitaonon di ngoluna nunga sai manghalupahon
Debata.
2.
Asa nang pe di na marhoi hita, lomo
dohot sangkap ni Debata do na ingkon saut. Ia lomo roha ni Debata dihagaleonta
i, dao dumenggan do i sian isi ni hoihointa i, ala sahat rodi ngolunta si
salelengnilelengna do lomo ni roha ni Debata. Adong do mandok : Justru di
godang ni angka hoihoi ni ngolunta i lam
tahangoluhon hagogoon ni Debata. Anggo holan na mulus-mulus do ngolunta, jotjot
ndang tarajumi be na mangula Debata di ngolunta. Nian boi do maol tahantusi
sangkap ni Debata di pardalanan ni ngolunta, alai molo sai taihuthon angka
sangkap dohot lomo ni rohaNa i, nang pe sipata songon na marbelok-belok
ditogihon hita songon bangso Israel i alai tu dalan hasonangan do tahe. Amen