Markus 11 : 1 - 11

JANGKON MA TUHAN JESUS I DINGOLUM

Bangso Israel nunga tung tarpaima-ima diharoro ni sada raja naimbaru songon Raja David , na boi mamboan haimbaruon sian segi perekonomian, politik, sosial dna. Taboto do di tingki mangolu Jesus di hatiha i, tongon bangso i dibagasan gomgoman halak Rom. Nian adong do Raja di nasida ima Raja Herodes dohot Malim di nasida ima Malim Sahendrin alai gabe Boneka Kaisar Rom do nasida, na holan pasonangkon kaisar rom dohot dirina sandiri.  Ndang pola diharingkothon nasida padengganhon ngolu ni bangso i.  Dung tarsar barita taringot tu huaso dohot hagogoon na adong di Tuhan Jesus, tung mansai las situtu do rohani bangso Israel, tarsunggul ma rohanasida naung mulak rohani Tuhan Jahowa paluahon nasida, ala di hadirion ni Tuhan Jesus tung mansai singkop do saluhutna diida nasida taringot tu Huaso dohot Hagogoon ni sada raja. Tuhan Jesus boi mangalehon mangan 5000 halak (ndang tagamon anturaparon bangso i), Tuhan Jesus boi pamalumhon ragam ni sahit (ngolu na sai tongtong dibagasan hahipason ma nasida, gabe boi mulaulaon nasida, bangkit ma perekonomian nasida), jala  molo masa parporangon maradophon Halak Rom, pasti monang do nasida ala Tuhan Jesus do manguluhon nasida. Ido umbahen torop ma jolma na mangihuthon Jesus di tingki i.

Turpuk on ima patuduhon nunga tingkina naeng pasangaphon jolma natorop i Anak ni Jolma i. Dibongoti Jesus do Huta Jerusalem ima pusat inganan halak Jahudi (pusat ekonomi, politik, sosial dohot ugamo). Andorang sahat tu inganan i dipatuduhon Tuhan Jesus muse huasona tu angka sisean. Huaso ni Tuhan Jesus dison ima na boi marnida aha na adong di Huta Betfage dohot Betania ima na boi mambahen halak mangoloi na nidokNa. Disuruh ma angka siseanNa laho mangalap Anak Halode na so hea dope nihundulan. Tingkos do songon na didok Jesus, adong ma anak halode di huta i na so dung dope hinundulan. Laos adong do nampuna halode i, alai songon na didok Jesus molo adong na mandok : na marhua do hamu”?  dok hamu ma na ringkot do i di Tuhan i?. songon na muruk do nian nampunasa halode i disi di ida ibana adong halak mangharhari tambat ni anak halodena, alai disi umbege hata ni Tuhan Jesus napinasahat ni angka sisean I, gabe diloas ibana ma diboan angka sisean i anak ni halodena i. 

Ia anak halode i naeng pangkeon ni Jesus laho mambongoti huta Jerusalem i. Songon aneh do on? Hape ndada terjadi sangombas songoni na masa disi na pinatupa Jesus i. Molo pamanatontan di Padan Narobi nunga disurirangkon taringot tusi marhite Panurirang Sakaria na manurirangkon taringot haroroni Tuhan Jesus tu huta Jerusalem na marsihundul di anak ni halode (Sakaria 9:9). Nagabe sungkunsungkun di rohanta boasa ma ingkon anak ni halode dihunduli Tuhan Jesus? Halode ima binatang na di pangke laho mangusung angka barang manang jolma. Halode dang dipangke tu parporangan ala lambat do ibana mardalan.

Alus ni sungkunsungkun on laos ido mangalusi sude nadibagasan rohani bangso Israel “na sai tarpaima diharoroni Tuhan Jesus Kristus tu Jerusalem songon sada raja na manggomgomi harajaan Israel suang songon na ujui ima di tingki nanirajaan ni Raja David”. Molo Tuhan Jesus masuk tu Jerusalem marsihundul di anak ni halode, naputuduhon tu bangso ndang na laho manggulut harajaon ni portibi jala mamboan bangso Israel malua sian gomgoman ni Halak Rom; alai Ibana ro mamboan hadameon jala mangusung sude dosa ni hajolmaon on tu abaraNa, songon anak ni halode i namangusung angka boban di tanggurungna.

Panjangkonon ni bangso Israel diharoroni Tuhan Jesus tu Jerusalem tung mansai meriah do, ragam dipatupa nasida dipenyambutan ni Tuhan Jesus masuk tu Jerusalem, sudena i patuduhon na tung mansai las situtu rohanasida di haroroni Tuhan Jesus di Jerusalem. Boasa tung mansai las rohanasida? Alusna ima : nanihirim rohani bangsoi asa bangkit raja Tuhan Jesus manggomgomi bangso i jala mamboan bangso i malua sian angka parungkilon nasida na sai laon. Pamujion tu Tuhan Jahowa dipatupa nasida do di acara penyambutan i, ala dipanghilalahon nasida do ndang adong hagogoon na tung mansai gogo situtu, ndang adong huaso na tung mansai marhuaso situtu molo dang ro sian Tuhan Jahowa. Huaso dohot hagogoon naung niida nasida na adong di hadirion ni Jesus pasti sian Tuhan Jahowa do, dibahen i Pamujion tu Tuhan Jahowa dipatupa nasida songon tanda mandok mauliate nasida tu Tuhan Jahowa ala nunga diparrohahon Tuhan i nasida disitaonon naniadopan nasida na sai laon, dilehon Tuhan Jahowa di nasida ima Jesus na marhuaso dohot marhagogoon situtu, natuk paluahon nasida sian angka parungkilon nasida, na boi mamboan nasida tu kejayaan ni Harajaon ni Si David na jolo, na dipanghilalahon nasida na sian Tuhan Jahowa do huaso dohot hagogoon na adong di raja David sian Tuhan Jahowa.

Tuhan Jesus masuk tu Jerusalem, ima dang naeng bangkit raja songon na nihirim ni bangso Israel. Ibana masuk tu Jerusalem ima parmulaan di angka nanaeng siadopanNa taringot na paluahon jolma manisia sian angka dosa nang hajahaton. Raja do nian Tuhan Jesus, alai ndang raja ni portibion na holan mangharingkothon dirina sandiri, alai Ibana Raja ni Hadameon, ala harajaon na sian Banuaginjang do na pasahathon dame tu sandok portibion. Tuhan Jesus masuk tu Jerusalem naeng marnida songon dia do situasi dohot kondisi ni Jerusalem nang Bagas Joro ni Debata di nalaho mandapothon ari pesta na bolon i, ima Pesta Paskah, parningotan di haluan ni bangso Israel sian parhatobanan Misir. Jala naeng marnida huta na balga i inganan na ingkon disi Ibana di boan tu hau pinarsilang. Dungkon diida situasi dohot kondisi ni Jerusalem i, ruar ma nasida sian Huta i mulak tu Betania, disi ma nasida marborngin.

SIPAHUSORHUSORON

1.         Panjangkonon di Tuhan Jesus naeng ma ingkon patar di ngolunta on,  songon na pinatupa ni bangso Israel na manjangkon Tuhan Jesus tung mansai meriah huhut mangendehon ende parlasnirohaon na mandok mauliate tu Tuhan Jahowa, nang pe di ujungna gabe marbalik nasida siala ndang songon panghirimon nasida haroro ni Jesus i. Sungkun-sungkun nuaeng di hita ima : Aha do naung tapelehon tu Tuhan i songon tanda naung tajalo haluaon dohot haimbaruon ni ngolu on? Nda jotjot hita sai marpingkir molo dipangido pasahaton tanda puji-pujianta tu Tuhan i? Unang ma jolo harta na adong di hita dohot ngolunta sandiri, holan marparsaoran denggan tu Ibana nunga sai busisaon dirinta, ndang olo hita hot, jala jotjot dua haporseaonta (haporseaon ganda).  Jala jotjot do hita lupa (amnesia), ia sude na di ngolunta on sian IBANA do i jala dipasahat do i tu hita songon parhitean laho manggohi/mencukupkan na adong di ngolu on asa boi hita mangula-ulaonta, pasikolaan gelengta, dohot angka na asing i.

2.         Di tingki on laho manomunomu Jesus di ngolunta ndada porlu mambahen Karpet Na rara jala jongjong di dalan i huhut manjouhon goarNa. Ndada porlu laho mambahen hias di dalan dohot angka na asing songon na pinatuduhon portibi on laho manomunomu sahalak pejabat, alai cukup do mamparadehon Rohanta. Laho paradehon roha on do na maol, ai ingkon ias jala badia do asa boi Jesus mian tusi. Na paduahon  ima mamuji Ibana di sandok gulmit ni ngolunta. Ai ndada mamuji Debata holan di Gareja alai di sandok inganan. On pe songon na maol do on, boi do merek Kristen alai mutu na ndang Kristen. Napatoluhon ima ngolu na sai manatap jala mangigil haluaon na sian Tuhan Jesus. Molo ngolunta sai manatap tu Haluaon na pinarade ni Jesus tontu orientasi ni ngolunta pe ingkon tusi do. Lapatanna : ringkot di haluaon laos ringkot do paradehon diri laho tusi.

3.         Sitiruon do na dibahen Jesus di minggu on. Dipatuduhon Ibana do haserepon ni rohaNa dohot kesederhanaan ni ngoluNa. Hape di partingkian si nuaeng on nunga lam marasing tujuan ngolu ni jolma i, sai marlomba-lomba do jolma holan na mangalului Huaso dohot Hasangapon dohot penonjolan diri.  Hape na tu hamagoan do sudena i di ujungna. Holan na olo paserephon rohana do di tingkina gabe sipatimboon Debata. Amen

Johannes 12 : 20 – 33

                                                                                             

PASAHAT MA DIRIM TU DEBATA

                Halak batak ditanda sian uli ni soarana do, halak Cina ditanda sian hamaloona martigatiga, halak Jerman ditanda sian kedisplinanna, jala halak Gorik ditanda sian uas ni rohana marsiajar manang aha pe. Turpuk on marmula do ima dina ro deba halak Gorik mandok tu angka sisean ni Jesus :”Naeng idaon nami Jesus”. Didok nasida songoni siala nunga sai tarbarita Goar ni Jesus jala sahat tu pinggol ni angka halak Gorik I angka na dipatupa Jesus. Alani ido naeng pajumpang dohot Jesus jala naeng marsiajar tu Jesus taringot angka na binahen ni Jesus i. Hape tangkas do angka halak sipelebegu do nasida ima na so manghaporseai Debata.

                Didapothon nasida ma si Pilippus alai ibana sandiri pe bingung, dungi dioper ma muse tu si Andreas hape ibana sandiri ndang mangantusi. Ujungna sahat ma nasida tu Jesus laos dipatorang Jesus do piga-piga marhite turpuk di minggu on.

a.       Naung dapot ma tingkina, asa marsangap Anak ni jolma i! Nunga diboto Jesus angka na naeng masa tu dirina, alani i langsung do dipatorang Jesus taringot silang (hamatean). 

b.      Ndang na ganda eme i molo so madabu tu tano jala mate, dung pe mate asa denggan parbuena. Hata na pinatolhas Jesus on ima sada tudutudu taringot tu hamamate dohot haheheonNa. Jala laos ido ringkot botoon ni angka siseanna. Boluson ni Jesus do hau pinarsilang i, songon eme na ingkon suantononhon asa gabe boni, dungi marparbue. nunga sada uhum dibagasan ni hangoluan, na ingkon boluson ganup jolma do hamatean. Holan on, hamatean ni Jesus ndang marujung holan dihamatean i sambing alai mamboan torop jolma tu bagasan hangoluan.

c.       Agoan hosa ma na marhamaolhon hosana. Hata on gabe sada sipaingot tu angka halak na laho mangihuthon Jesus. Halak na mangihuthon Jesus ingkon tontong dibagasan hasetiaon. Molo pe ingkon agoan hosa ibana naeng ma tongtong satia. Didok Jesus do, manang ise na agoan hosana alani mangihuthon Ibana lehononna ma hangoluan sisaleleng nilelengna.

d.      Patutoru diri. Ndang tumimbo sahalak sisean sian guruna; ido na berlaku dihajolmaon. Alai diuba Jesus do sikap sisongoni marhitehite patuduhon haserepon ni rohana, mamburi simanjojak angka siseanna (Joh. 13). Naeng ma nian angka sisean ni Tuhan Jesus marhaserepon ni roha, olo manghobasi donganna songon naung dipatupa Kristus. Ndang dihobasi alai manghobasi. Manang ise naeng “balga” di harajaon ni Debata, naeng ma ibana manghobasi donganna, paserephon rohana bahen harajaon ni Debata. Holan angka na olo songon Kristus i do na patut manjalo hamuliaon dohot hasangapon. Digombarhon do Jesus na olo patutoru diri sahat rodi na mate tarsilang (Filipi 2:5-11), olo manghobasi ulaon ni Debata doshon songon panjouon ni Debata di ibana. Dungi lehonon ni Debata ma tu ibana hamuliaon, hasangapon, dohot huaso. Angka sisean na marsitutu, satia jala sian bulus ni roha mangkaholongi Debata dohot donganna, tu angka sisongoni do lehononna hamuliaon dohot hasangapon.

e.      Dapot hamuliaon dohot hasangapon na sian Debata. Nunga diboto Jesus be na ro ma tingkina songon na didok angka naung tarsurat i. Jala i nunga diboto jesus ditingki martangiang Ibana di Getsmani, tung mansai bonsa do rohaNa. Asa bonsa roha ni Jesus di pesta Paskah on songon udut na sian getsemani i do. Di getsemani do bonsa roha ni Jesus na umbalga. On ma tingkina pangarimangan bolon di roha ni Jesus sian saluhut ulaon naung pinatupana (Karya PenebusanNya). Alai ndang adong diroha ni Jesus laho pasidingkon hamatean i. Dungi tarbege ma soara sian banua ginjang; “Nunga hapasangap, laos pasangaponku do muse!”.  Ronggur na ro i pabotohon naung tutup sipareon nasida manjalo Hata ni Debata.  Na tangkas holan Jesus do mananda soara na sian Debata. Gabe didok Jesus ma di ujung na :”Nuaeng jumpang tingkina asa diuhum portibi on, sipabalion ma nuaeng raja ni portibi on, alai taiton ni Debata do jolma na porsea jala na satia mangihuthon Jesus, lehononNa ma hamuliaon dohot hasangapon sisaleleng ni lelengna.

SIPAHUSORHUSORON

a.              Dihalungonhon halak do naeng pajumpang dohot Jesus, songon halak Gorik i. Hita pe halak na porsea naeng ma sai sihol rohanta pajumpang dohot Jesus, ima marhitehite parpunguan di huria i dohot pamujionta dibagasan partangiangan manang parmingguon. Sihol roha naeng pajumpang i ndada holan na nionjar pasupasu pardagingon, alai ingkon tahangoluhon do naung dibahen Jesus di ngolunta. Di partingkian si nuaeng on sai marasing do motivasi ni jolma laho gabe halak Kristen (manang siihuthon ni Kristus). Nunga toropan halak Kristen nuaeng on digoari Kristen turun temurun (Kristen natoras niba, Kristen ma iba) alai molo ngolu dao dope sian hakristenon i. Adong dope na gabe Kristen nuaeng on  didok Kristen jampi-jampi (Kristen mistis) ima na dirajumi molo Kristen ro ma pasupasu pardagingon, boi dialo setan manang sibolis, dna. Marmacam do nian na gabe halak siihuthon ni Kristus i, alai diigil do sian hita nuaeng asa mansoadahon hosana, haportibion. Nunga torop be angka sitiruon diangka na mangihuthon Jesus, lumobi ma i angka siboan barita nauli uju i. Ndang adong biar dinasida mamolus angka luat na so hea didalani jala na so adong fasilitas. hira so arga do di nasida hosana. Alai marhitehite ulaon nasida i nunga lam torop halak na porsea tu Tuhan i. Didok William Barclay :”Kita harus rela mengubur ambisi-ambisi pribadi agar kita bermanfaat bagi Yesus”.

b.             Kecenderungan ni jolma nuaeng ima holan mangido, manjalo jala mangolom gomos na di iibana, alai tung maol situtu marsilehon-lehon, mangalehon jala berbagi. Ndang holan di sinamot alai sahat do di pambahenan dohot di angka pangalaho ni ngolu. Ido umbahen lam godang halak Kristen “partanga na metmet, par-langka na jempek, par-pinggol naung nengel, par-ateate na so bidang”, lapatanna : ndang olo be hita mangurupi, mangholongi, unang ma jolo tu angka jolma na so tinanda ; gari naung tatanda pe nunga lam moru. Alai na negatif ima gampang muruk, naeng marbadai jala sangat sensitif, parhosom, par-elat dna. Tung tingkos do didok Buku endenta i : Tung godang do sisabion alai otik na olo gabe panabi”. Ai panghobasion ndada holan na maragenda manang marjamita nuaeng, alai panghobasion lintas fungsionarl dohot structural. Ima panghobasion ngolu nag ok dame, parasi roha, na olo manjangkon, parjabu na partamue, par-ateate na bidang situtu. Ido na binahen ni Jesus di di tingki tarsilang i. Ndang adong anggo sabortik dendam di ngoluNa, tung tangkas do Holong ni RohaNa tu hita on.

c.              Minggu pra-paskah ima tingki di hita laho meng-evaluasi ngolunta maradophon Tuhan i. Unang ma sahat hita tu minggu Paskah ganup taon alai so taboto be aha do sasintongna lapatan PASKAH I di ngolunta. Paskah sasintongna Pengorbanan do. Alani ido hita pe ingkon HIDUP DI DALAM PENGORBANAN. Pengorbanan di tingki, di ngolu, di sinamot dohot angka na asing. Alai taingot ma Pengorbanan na tabahen di ngolu on ndada Pergorbanan na KONYOL manang na so adong argana, justeru pengorbanan na tabahen di ngolunta tarlumobi di Tuhan i manubuhon pasupasu na balga muse di ngolunta on, jala di perhitungkan Tuhan do sude angka naung tabahen i. Songon didok angka na malo :Hidup di dunia ini hanya sekali, dan mati di dunia ini juga sekali” tetapi apa yang kita lakukan di dunia ini menjadi jaminan untuk : Hidup yang kedua kali atau mati yang kedua kali. Manang ise na agoan hosana bahen harajaon ni Debata lehononna ma hangoluan, hasangapon dohot hamuliaon sisalelengnilelengna. Amen

1 Korintus 1 : 18 - 25

                                                                                                    

Huria Korint on ima huria na unik na hea dipajongjong apostel Paulus di tingki uju i. Didok unik siala nunga rarat angka pangajarion na diboan angka jolma na torop i sian angka desa nawalu tu huta i.  Ai na jolo nunga songon kota metropolitan kota korint on ima angka jalur perdangangan. Alani ido sai na lao ro do jolma tu huta on marboniaga dohot na mangadis angka parbinotoan. Di uju i pe nunga pesat (maju) angka parbinotoan na pinajongjong angka halak Gorik ima na margoar Kaum Gnostik. Kaum Gnostik on ma na sai mangondolhon taringot tu parbinotoan ni jolma dohot habisuhon ni portibi on. Alani ido di tingki ro na mamboan barita nauli tu tonga-tonga bangso i nunga pasti godang paraloan, siala dianggap do angka na pinasahat angka parbarita nauli i pangajarion na so masuk akal, tarlumobi taringot tu hamamate ni Jesus marhite na diparsilangkon. Tubu do sungkun-sungkun di roha nasida Ima taringot : Songon dia do boi marhite Silang gabe malua jolma i sian dosa?? Hape tangkas do diboto nasida ia silang i uhum do i tu angka na mangulaon hajahaton.

Alani i ma gabe mambahen tubu ganggu di roha di angka halak Kristen disi “Beha do tutu, na boi do marhite na diparsilangkon gabe Malua angka pardosa i sian angka hajahatonna? Ido alana porlu hian Apostel i sandiri pasahaton suratna tu huria i laos mangondolhon asa sada ruas ni huria i. Didok do di jolo ni turpuk on “Asa sahata hamu saluhutna, unang ma adong parbolatan di hamu ; hot ma hamu binahen ni sada ni roha dohot sada ni pingkiran”(ay.10). Siala sahat do tu pinggol ni apostel Paulus na gabe tubu parsalisian di nasida taringot tu silang i.

Marhite turpuk on naeng tangkas alusanta di dirinta be : beha do sasintongna silang i ? Aha do silang I Jesus i di ho? Jala beha do panjaloonmu di silang ni Jesus i ?

Naparjolo ima sikap dohot panjangkonon ni angka halak na sai patujolohon parbinotoan dohot habisuhonna na mandok haotoon do silang i. Angka nasida na mandok haotoon silangi i siala ndang tarjalo nasida na binahen ni Jesus marhite hamamateNa di hau pinorsilang i. Ndang diantusi aha do alana dibahen Debata i marhite AnakNa Jesus Kristus.  Songon gabe partuktuhan do i di nasida, ai ndang boi masuk tu utohutok (pingkiran) ni jolma i.  Di angka na mardebatahon hapistaran dohot habisuhonna, gabe partuktuhan jala gabe haotoon do silang i. Siala debata nasida sandiri ima utohutokna.  Hape tangkas do didok si Paulus ndada cukup holan marhite utohutok manjalo pambahenan ni Debata, ndang cukup marhite habisuhon portibion manjalo rahasia na binahen ni jolma. Patudos na didok si Jesaya : haotoon do na sai mangalului lomo ni roha ni Debata marhite bisuk ni portibi on”(Jesaya 44 : 45). Gariada didok Paulus na sai mamake habisuhon portibion laho mangantusi angka sangkap ni Debata tu na lao mago na do i.  Boasa? Siala pasti ndang tarjalo nasida na dibahen Debata marhite silang i. Ai nunga marlaok dosa angka pingkiran dohot habisuhon ni jolma.

Napaduahon, Molo sangombas berengonta silang i toho do songon haotoon i, hape ido habisuhon na dibahen ni Debata. Boasa ? Ai ndada terjadi sangkap na naeng parsilangkon Jesus di bagasan ombas na jempek i alai nunga adong i sian na jolo.  Boi do i berengonta di Jesaya 53 : 5 “Hape ala ni pangalaosinta ibana tartullang, binahen ni hajahatonta ibana mabugang. Ampe tu ibana pinsangpinsang parhitean ni hasonanganta, jala binahen ni bugangna malum itahilala”.  Aut tabahen rentang waktu berarti nunga hira-hira 600 taon na salpu disurirangkon do angka  na naeng masa tu Messias i. paduahon :silang ima patuduhon Holong ni roha ni Debata tu hita jolma.

Ai pasti do maol hita berkorban apalagi agoan ni hosa tu angka na so tatanda. Gari keluarga sandiri pe belum

tentu hita olo berkorban di Harta lam ma HOSA. Alai Tuhan i nunga dibahen i marhite Anak Na sandiri.  Napatoluhon, marhite silang i naeng dohonon ni Jesus tu hita ia hamatean ndada ujung ni saluhut pardalanan ni ngolunta. Ai adong dope haheheon jala dibuktihon Jesus do i marhite haheheon Na laos ido mambahen hita gabe ro tu parsaoran ni Huria. Songon didok Apostel Paulus :”Ai anggo so hehe Kristus sian angka na mate, rumar ma jamita name, laos rumar ma nang haporseaonmuna”. (1 Kor.15:14).  Ima habisuhon ni Debata, ia marhite Silang  i lam godang na barani berkorban demi Kristus. Jala dipatuduhon do i di angka halak na marsitutu gabe Kristen pola godang magoan ni hosa. Ndang tarbahen jolma patupahon i molo holan sian pikiranna sambing manang mustahil orang mau melakukan pengorbanan nyawa demi Kristus bila dianggap salib adalah Kebodohan.

                Natape pe sai dianggap jolma na so porseya i haotoon na pinatupa ni Debata, alai haootoon ni Debata ido na jotjot didok angka na so porseya gabe habisuhon di hita. Siala marhite “haootoon” na didok jolma na so porseya ido malua hita sian uhumon ni dosa dohot hamatean na saleleng ni lelengnai.

Sipahusorhusoran

1.        Tung maol situtu do patorangkon Silang i tu angka jolma na so porseya, tarlumobi ma molo mamake sian kaca mata pingkiran manang utokutok ni jolma. Tabereng ma na jolo angka halak farise dohot siboto surat i, hape naung rap do nasida dohot Jesus ipe ndang boi siat tu roha dohot pingkiran nasida sandiri. Di partingkian si nuaeng on pe godang do na sai meragukan dohot na manulak “Silang I”. Didok angka na so porseya ido : apakah hanya dengan salib seseorang bisa diselamatkan? Silang sasintongna tidak punya arti apaapa tetapi seseorang yang telah digantung disana membuat silang itu menjadi berbeda. Alani ido unang holan sahat hita di Silang na sian hau i. Apalagi silang di jaman nuaeng on nunga marmasam taringot tu silang I adong do sian emas, sian perak jala nunga godangan holan aksesoris nama. Anggo holan disi hita sahat TIDAK ADA ARTINYA SAMA SEKALI, alai ingkon sahat do hita tu Jesus na olo diparsilangkon holan alani dosanta. Asa beha? asa malua jolma i dohot hita si nuaeng on.

2.        Dipaingot do hita asa unang adong na sai manenganengahon hapistaran dohot habisuhon ni jolma, siala terbatas do i. ai ndang mampu pikiranta membuka Rahasia Kerajaan Allah. Holan na dipargogoi Tondi Porbadia do hita asa lam mangantusi angka sangkap dohot lomo ni roha ni Debata di ngolu on. Molo sai tapake do utokutokta sandiri, pasti di ujungna sahat hita tu dalan na BUNTU. Lam tapatimbo dirinta di jolo ni Tuhan i, ingkon lam patoruonNa do hita; lam tapabongak, lam pailaonNa do hita, lam tapahebathebat ingkon lam pajepolonNa do hita. Jotjot do jolma madabu tu na manguhumi-uhumi halak, isarani rupani : “Ipe ndang boi gol ninna tu angka pemain bola i hape aut ibana sandiri tong do ndang diboto marmeam bola;  So niantusan parende ni amanta an ninna, hira songon na malo ibana marende hape ibana sandiri na mandok i so diboto marende. Hape sian Debata do Hapistaran dohot parbinotoan i. Ido umbahen ingkon dibagasan unduk ni roha dohot haserepon mangido tu Tuhan i asa ipe dipatorang Tuhan ima di hita saluhutna.

3.        Sangkap ni Debata ndada Haotoon i nang pe sipata maol tarjalo jolma. Sarupa do molo marsahit jolma i, godang angka pangunjunan di ngolu gabe didok ma : Boasa ma ingkon songon on na hujalo hami? Hape na dipaloas Debata do i di ngolunta on ima Asa lam Tarida ise hita maradophon Ibana, jala asa lam tangkas di Tuhan i holan na monang ido manjalo Upa sian angka halojaoona laho mangihuthon Kristus i. Amen

Markus 8 : 31 - 38

                                                                                                      

Dung tajaha nangkin turpuk jamita di minggu on boi do tubu sungkun-sungkun di rohanta :”toho do na ingkon marsitaonon angka halak na mangihuthon Kristus i”,  “manang sebalikna ingkon marlas ni roha”?. Molo toho do na ingkon marsitaonon na mangihuthon Tuhan i, pasti do dohononta :”borat nai ate? Tolap niba do i?  Godang do angka halak Kristen di partingkian si nueng ndang be rade manjalo sitaonon (parungkilon), alai sai mangigil pasupasu sian Tuhan i. Lapatanna ima na holan ringkot di pasupasu alai ndang siap mandalani sitaonon manang haporsuhon. Tarlumobi di partingkian si nuaeng on na jotjot didok jaman serba instan, sude naeng instan termasuk ngolu pe na ingkon instan nama so pola be adong perjuangan, kerja keras.  Hape tangkas do didok Jesus marhite turpuk on songon dia do dampak molo olo mangihuthon Ibana di portibi on, jala naeng mandapothon angka hasonangan na saleleng ni lelengna i.

Kristen marlapatan do i siihuthon Kristus. Molo didok siihuthon Kristus ndada holan na tabo i siihuthon sian IBANA alai ingkon sude do na masa di ngolu ni Jesus i termasuk ma disi angka parungkilonNa i jala  na sahat tu au pinorsilang. Songon na didok Jesus :”Nasa na giot mangihuthon Ahu disoadahon ma dirina, dituhuk ma silang na tu Ibana i, diihuthon ma Ahu” (ay.34). Pasoadahon diri dohot manuhuk silang ima songon symbol PENDERITAAN (sitaonon). Alai ndada holan sahat di symbol penderitaan i , ai molo monang hita mamolus penderitaan i, silang i berubah gabe symbol Hamonangan. Patudos tu angka na marsitutu marsikola dohot na karejo ima di tingkina dapot nasida do hasil na dumenggan sian perjuangannai.

Joujou mangihuthon Jesus ndada na mura  i manang neang. Jotjot do i maralo tu pikiran ni jolma dohot konsep ni portibion.  Molo pikiran ni jolma dohot konsep portibion naeng ma mulus mandalani portibion, songon adong pandohan na mandok : Kalau bisa dipermudah untuk apa dipersulit. Ido alana muruk situtu Jesus tu si Petrus siala maralo pandohan na pinasahat Jesus tu roha dohot pingkiran siseanNa i. Anggo di pingkiran angka sisean i tarlumobi si Petrus naeng ma torus mangolu dibagasan suasana nyaman (ndang kuatir tu sipanganon siala rade do dipatupa Jesus, songoni molo marsahit boi do dipamalum dna).

Tangkas do didok Jesus ia Tujuan ni ngolunta ndada BERPUSAT tu PORTIBION. Songon na didok Jesus di ay.36 i, “Ai aha ma antong gunana di jolma nang liat portibi on diomo, anggo mago do hosanna”. Dosa na niula jolma mambahen hita ingkon manadingkon portibion laho tu inganan naung pinarade ni Debata. Molo pe didok ndada portibi on Tujuan ni Ngolunta, alai ndang boi marlomo-lomo hita disi. Adong do na bisuk mandok : HARI ESOK ditentukan oleh HARI INI, lapatanna molo naeng sahat hita tu tujuan na naeng sipasahaton Tuhan i ;ndang boi malua i sian naung taula di ngolunta di portibi on. Tarlumobi ma i songon dia ma parsihohotonta na mangihuthon Tuhan i di ngolu on.

Ido alana parjolo didok Jesus syarat na mangihuthon Ibana “Pasoadahon diri” (menyangkal diri).  Ngolu na pasoadahon diri ima ngolu na ingkon saurdot di lomo ni roha ni Debata (hidup benar). Ndang cukup molo didok na pasoadahon diri ima gabe mangihuthon Jesus alai sai hot di ngolu pardagingon ima angka hagiot-hagiot ni roha. Ngolu pasoadahon diri ima ngolu songon si Abraham, di tingki dijou Debata ibana ndang adong keraguan di ngoluna mangihuthon Debata. Ditadingkon do sude angka haulion dohot hasonangan di keluarga na. (boi do patudosonta di Rom.4 : 20 “Ndang olo ganggu rohana tumadingkon haporseaon di bagabaga ni Debata; na lam tu toguna do tahe haporseaonna…”).

Napaduahon didok muse manuhuk silang na tu ibana. Adong sahalak teolog Jepang ima na margoar Kosuke Koyama dibagasan bukuna “Tidak ada gagang pada Salib”. Lapatanna : siala ndang adong gagang di silang i berarti ndada boi sitiop-tiopon (manang ditengteng) silang i songon na maniop hudon boi ditengteng siala adong pinggolna. Ai ndang na neang silang i alai borat do, ido alana ingkon situhukon asa mampu hita mamboan. Sitaonon manang parungkilon ndang hea mamereng boi, olo manang na so olo hita di tingkina ingkon ro do i. Alai tung marasing situtu do cara ni halak na mangadopi parungkilon manang sitaonon i. Halak na sintong mangihuthon Tuhan i pasti dohonan do i bagian na mangihuthon Tuhan i. (tapatudos ma songon na masa disi Job na mandok : “Jahowa do na mangalehonsa, Jahowa do muse na mambuatsa” Job 1:21b).

Napatoluhon ima : rade agoan hosa. Dipatudos do songon tantara na laho marporang ndang parjolo dipingkiri ngoluna alai beha do asa monang songon dia pe carana. Na mangihuthon Jesus ndada holan modal tangan kosong alai ingkon adong do pengorbanan, Pengorbanan di tingki, di gogo, di roha termasuk pengorbanan di hosa. Molo nunga bahenonta pengorbanan tu na mangihuthon Ibana, jaloonta ma na sebanding sian pengorbananta i jala ndang holan sebanding alai dao umbidang jala humtimbo sian pengorbanan i termasuk ngolu na salelengnilelengna. Songon jotjot tabege :”Bila ingin makan nangka harus mau kena getahnya”.

Naparpudi, molo pe didok na borat mangihuthon Jesus pola ingkon marsitaonon (marungkil) dohot agoan hosa, ndang na mandok asa talului sitaonon i tanda na mangihuthon Jesus hita. Ai ndang siluluon sitaonon manang hamatean asa ipe didok hita botul-botul siihuthon Kristus. Alai na ingkon rodo sitaonon i molo sai manongtong hita mardalan dibagasan Tuhan i, siala marasing situtu do pangidoan portibion dohot pangidoan ni Debata, marasing do ulaon ni Tondi ni Debata tu ulaon ni angka tondi na adong di portibion. Anggo portibion sai lohot dope umpama na mandok : Eme na masak digagat ursa, ia i na masa ima na niula”. Ido umbahen sai godang dope hita ndang olo asing sian portibi on alai sai berkompromi di angka na masa di portibi on.

SIPAHUSORHUSORON

1.         Via dolorosa (jalan salib/penderitaan) ndada holan marlangku na jolo i alai sahat do tu tingki on. Alani unang pola sai tarsonggot hita molo ro parungkilon alani mangihuthon Ibana. Justeru ingkon tahamuliatehon do i songon dalan pajonokhon diri, patorashon haporseaonta dohot pendewasaan diri. Songon didok Apostel Paulus : kita tidak hanya ingin makanan yang lembek tetapi perlu juga makanan yang keras.(patudos tu Heber 5:12)

2.         Molo pe ingkon marsitaonon hita ala mangihuthon jala manghatindangkon Jesus di ngolu on, unang ma holan marnida parungkilon i. molo holan tusi do rohanta nang pikiranta tontu dohononta ma : Ndang tabo mangihuthon Jesus i, alai ingkon tong do berengonta angka dia ma sijaloonta molo mamolus sitaonon alani GoarNa. On do mambahen ngolunta asa tongtong bersemangat (ndang kendor) patupahon angka lomo ni roha ni Debata. Sarupa doi molo dijanjihon sahalak pimpinan tu anggotana, angka haulion dohot hasonangan isarani rupani: Jabu, mobil, tunjangan masa depan dna, tontu bahenon ni karyawan i do ulaon na na dumenggan. Jesus pe dibahen do jaminan (garansi) na mangihuthon Ibana, Songon didok di 2 Kor.4 : 17 :” Ai haporsuhonnami na martingki jala na neang porsanon, ido patupahon di hami hasangapon na sumurung na lumobi hamuliaonna na salelenglelengna”. Ndang sadia sitaonon na satongkin on martimbangkon hamuliaon sipapataron ni Jesus tu hita angka na manghamonangkon sitaonon i.

3.        Godang do angka pilihan di ngolu on, termasuk pilihan mangihuthon Jesus dohot ndang olo mangihuthon Jesus. Songon siihuthon Tuhan i hita manang aha pe na masa ingkon do dohononta : Ingkon Jahowa do Oloan nami (Josua 24:15c). Tung haulion na so adong boi patudosan do i molo di tingkina dohonon Jesus ma di jolo ni DAMANG i :” Ai ganup na mangkatindangkon Ahu di jolo ni jolma, ido hatindangkononku di jolo ni Damang na di Banua ginjang” (Mat.10:32). Amen