Sabtu, 09 Juli 2011

Ev. Psalmen 33 : 1 – 9

Sermon
Ev. Psalmen 33 : 1 – 9
Tema
“Mangasahon Jahowa, marolopolop angka na unjur marroha”


Marragam do tutu na boi taida sian isi ni Psalm na 150 bindu on, adong ma i angka ende pujipujian, tangiang mangido pangurupion, tangiang mandok mauliate tu Debata, tangiang mangido haluaon asa diurupi Debata dna. Ima na somal dipangke bangso Israel di angka ulaon parsombaon nasida di bagasan Joro ni Debata. Sada hal na patut jala na masai arga do i tutu di parngoluon ni bangso Israel na hea manghilala angka pangurupion ni Debata. Na patut ingkon sombaon jala pujion nasida do Debata marhite na pasahathon hamauliateon ni rohana dohot pamujion tu Debata, songon hataridaan ni pangoloion dohot panindangion ni angka na tangkas mananda Debata ; jala dihilala paboa Debata do na boi mangurupi dohot na patupahon angka na denggan di parngoluonna siganup ari.
Sian pambagian ni buku Psalm i, tangkas do taboto ia turpuk Psalm 33 : 1 – 9 masuk di bagian na parjolo parsagi ni buku psalmen on ima namarumanghon Pujipujian ni hagogoon, habasaon dohot hagostongon ni Debata. Diarahon parpsalmen on do asa saluhutna mamuji Debata siala pambahenan ni Debata ndada holan dipasahat tu sasahalak alai tu sude jolma do “Tapanghuling ma ende mardongan hasapi na martali sampulu dohot soara ni sarune na marsahut-sahuton”. Secara khusus didok tu angka halak na partigor dohot na unjur marroha. Boasa didok songoni? Siala halak partigor dohot na unjur marroha mananda dohot manghilalaon saluhutna angka na dibahen Debata tu ngoluna. Panandaon na tangkas naung dipatupa Debata ndada holan marnida na adong nuaeng alai dohot do angka na so adong dope alai gohinonNa tu tingki naeng ro. Holani na gabe sungkun-sungkun dia do naung dibahen Debata tu ngolu nasida asa ingkon mamuji jala marolopolop tu Debata ? Jala didok mangendehon ende naimbaru tu Debata (ay.3)? Molo didok mangendehon ende naimbaru tutu marhadomuan doi tu Padan Naimbaru songon didok di Yeremia 31:31-34 “Ida ma na ro do angka ari sogot, ninna Jahowa, pungkaonku ma padan naimbaru tu pinompar ni si Israel dohot tu pinompar ni si Juda. Ndada songon padan na hubahen i na jolo tu ompunasida, uju na hutangkup tangan nasida i laho manogihon nasida ruar sian tano Misir, hape diose nasida do padan na hubahen i, atik pe ahu harajaan nasida ninna Jahowa, ai on do padan sibahenonku tu pinompar ni si Israel dung salpu angka ari on, ninna Jahowa : Lehononku ma patikku tu bagasan ateate nasida jala surathononku do i tu bagasan roha nasida, asa ahu gabe Debata nasida jala nasida gabe bangsongku”.
Nang pe ndang sude nasida mangoloi Debata manang na gabe manimbil sian Padan na parjolo i alai ndang gabe sundat bahenon ni Debata Padang naimbaru tu angka na manghaholongi Debata dohot na naeng marsomba tu Debata. Dos do i, nang adong halak Kristen na so mangolu di Patik ni Debata manang na gabe manimbil sian dalan-dalan ni Debata, ndang gabe sundat manang batal ma naung diulaon na tu angka jolma na asing i ? tontu ndang.
Asa tangkas pangolophonon dohot pamujionta tu Debata naeng tangkas botoonta dia do naung dibahen Debata di ngolunta on?
1. Ai na sintong do HataNa jala marhaburjuon sude pambahenanNa (ay.4)
Ndang adong gabus manang sala di Debata. Sude bagabagaNa jala Padan na dipasaut do hombar tu angka tingkina. Dipatuduhon Debata do JanjiNa tu bangso napinillitNa jala diampehon do tu nasida angka na denggan dohot nauli, nang pe jotjtot dipardalanan ngoluna nasida sai mambahen marsak jala tubu rimas di Debata. PambahenanNa naung tangkas tajalo ima dipasaut do baga-baga na didok di Padan Nairobi marhite angka panurirang taringot tu Messias manang Immanuel, digonophon ma i marhite na tubu, mate jala hehe Ibana dibagasan Jesus Kristus. Ido
Alana hita pe ingkon ditogihon asa gabe sintong Hatanta jala marharbujuon pambahenta di ngoluon asa unang holan Hata didok halak. Adong do siparungkilonta dibagasan partingkian sinuaeng on : Aha do panghorhon naung dijou jala dipillit Debata hita ? adong mandok adong manang so adong halak kristen so adong panghorhonan di ngoluon ? Boasa songoni, on ma tasungkun dibagasan ngolunta i ?
2. Ibana mangkaholongi hatigoran jala gok asi ni rohaNa do tano on (ay.5)
Didok do Debata tigor jala gok asi ni rohaNa, anggo holan na tigor do Ibana tontu ndang tolapta be jongjong dijolo huaso dohot habadiaoNa i, ai so adong hita na sintong jala tigor, na dipatigor jala dipasintong Debata do hita marhite mudarNa i (sola gratia). Hatigoran ni Debata ndang sarupa tu hatigoran na pinajongjong ni jolma di portibion na sipata boi mamereng boi, hepeng dohot huaso (jabatan) ni jolma. Mate do anak ni si Daud siala dosana, ai ndang boi bongot si Musa tu tano na pinarbagabagai; alai dipamalum do raja Ahab siala muba rohana dohot angka na asing. Hatigoran (keadilan) ni Debata dipatuduhon do sampai batas yang melampaui kesabaran ni jolma. (Patudos Hes.33 : 11 “songon sintong na mangolu Ahu, ninna Tuhan Jahowa ndang lomo rohangku mida hamatean parjahat…..”), alai anggo so olo be muba jala mulak tu Debata ndada Debata manguhumi nasida disi alai uhum i sandiri ma manguhumi nasida disi.
3. Ibana do manjadihon saluhutna (ay.6 – 7)
Hombar tu 1 Musa 1 dohot 1 Musa 2 dipatuduhon do Pargogo na so hatudosan Debata, ai sudena i ditompa Ibana holan marhite HataNa. Alai naeng ma tarpahatopoton sude na adong i ai naung diparade Debata do i laho pakeonta. Ai molo sai adong manghatingkon na punanai jala alani gogo dohot huasoNa, on ma mambahen jolma gabe marhaginjanghon roha. Halak sisongonon ingkon marjea do, ai lupa nasida jala pasodahon na dibahen Debata saluhutna na adong di ngoluna i.
4. Marhuaso situtu (ay.8-9)
Ndang tarbahen manang huaso aha pe na adong diportibion holip molo mangkuling Debata. (ise ma songon Ho ale Jahowa di tongatonga ni angka debata? Ise ma songon Ho marmulia dibagasan habadiaon, na songkal marpujipujian, na mambahen halongangan” 2 Musa 15:11) (“suruk hamu ma dolok batu, jala martabuni ma hamu dibagasan orbuk maradophon pangonggoti ni Jahowa, dohot maradophon hamuliaon ni hasangaponna” Jes.2:10) Songon dia ma hita asa tongtong manghaporseai na marhuaso do Debata di sandok ngolunta dohot portibion, natape sai dipaloas masa angka mambahen maheu ngolunta di portibion. Molo olo hita marhaposan tu Jahowa mambahen gabe Jahowa sijaga hita, ndang tarbahen angka parjahat manusai hita nang pe sai jotjot disangkapi angka na roa.
Mamuji dohot mangolophon naung dibahen Debata di ngolunta patut jala naeng ma tahangoluhon ganup tingki di sandok ngolunta on. Jala ndang pola taporluhon angka tanda naung dibahen Debata, ai tangkas do naung tahilala dohot taida. Dasorta laho mamuji jala mangolophon Debata ima : a. na songkal do pambahenan ni Debata, b. jala na satia tongtong mandongani hita. Tarlumobi di minggu on tongon minggu parolopolopon di sandok HKBP siala Manjunjung Baringgina taon 1940. Nang pe dimulanai songon na tarsonggot do HKBP siala mulak angka halak Jerman na mangula di HKBP saleleng on gabe dipasahat tu Halak Batak sandiri mangurus Huria na balga on. Tarida do sahat saonari jongjong do huria i, siala mangula do Debata di tonga-tonga huriana.
Tauji ma jolo ngolunta on, manang na patut do hita mamuji Debata manang ndang ? Amen

Mazmur 84 : 1 - 7

Mazmur 84 : 1 - 7 84:1 Untuk pemimpin biduan. Menurut lagu: Gitit. Mazmur bani Korah.  84-2 Betapa disenangi tempat kediaman-Mu ,  ya ...